ދެ ދުވަހެއްގެ ތެރެގައި ދެފަހަރެއްގެމަތިން އިސްރައީލުން ފަލަސްތީނުގެ ރެފިއުޖީން ދިރިއުޅެމުންދާ ޖަބަލިއާ ރެފިއުޖީ ކޭމްޕަށް ހަމަލާދީ 195 މީހަކު ޝަހީދު ކޮށްލައިފިއެވެ.
ހަމާސް ޖަމާއަތުން ހިންގާ ޣައްޒާގެ ސަރުކާރުގެ މީޑިއާ އޮފީހުން އެންމެ ފަހުގެ ރިޕޯޓުކޮށްފައިވާ ވާގޮތުން 24 ގަޑިއިރު ނުވަނީސް ޖަބާލިއާ ރެފިއުޖީ ކޭމްޕަށް އިޒްރޭލުން ދިން ފުރަތަމަ ބޮމުގެ ހަމަލާއާއި ދެވަނަ ބޮމުގެ ހަމަލާގައި މަރުވި މީހުންނާއި އަނިޔާ ލިބިފައިވާ އަދި ގެއްލިފައިވާ މީހުންގެ އަދަދު 1000 އަށް ވުރެ މައްޗަށް އަރައިފިއެވެ. އޭގެ ތެރޭގައި މަރުވި 195 މީހުންނާއި އަދިވެސް ގެއްލުނު 120 މީހުންނާއި ޒަހަމްވި 777 މީހުން ހިމެނެ އެވެ.
މިދިޔަ އަންގާރަ ދުވަހާއި ބުދަ ދުވަހު ޖަބާލިއާއަށް އިސްރާއީލުން ދިން ހަމަލާތަކަކީ ބިރުވެރި ހަމަލާތަކެއް ކަމަށް އދގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ސިފަކުރައްވާފައިވާއިރު، އދ.ގެ އިންސާނީ ހައްގުތަކާ ބެހޭ ހައިކޮމިޝަނަރު ވިދާޅުވީ އެ ހަމަލާތަކަކީ "ހަނގުރާމައިގެ ޖަރީމާތަކެއް" ކަމަށް ވެދާނެ ކަމަށެވެ.
ޔޫއެންގެ ސެކެޓްރީ ޖެނެރަލް އެންޓޯނިއޯ ގުޓަރޭޒްގެ ތަރުޖަމާނު ވެސް ވިދާޅުވެފައިވަނީ ދެ ދުވަހުގެ ތެރޭގައި ދެ ފަހަރެއްގެ މަތިން އިޒްރޭލުން ޖަބާލިއާއަށް ދިން ހަމަލާތަކާ ގުޅިގެން އދ.ގެ ވެރިޔާ ވަރަށް ބޮޑަށް ހިތާމަކުރައްވާ ކަމަށެވެ.
އިޒްރޭލުން ބުނީ ހަމަލާ އަމާޒުކޮށްފައިވަނީ ހަމާސްގެ ކޮމާންޑަރަކަށް ކަމަށެވެ.
އިސްރާއީލުން ހުއްޓުމެއްނެތި ޣައްޒާއަށް ދެމުންދާ ހަމަލާތަކުގައި މިހާތަނަށް ޝަހީދުވެފައިވާ ފަލަސްތީނުގެ އާންމުގެ އަދަދުވަނީ 8،000 އަށްވުރެ މަތިވެފައެވެ.
