ނަގޯނޯ-ކަރުބާކުގެ މައްސަލާގައި އަރުމީނިއާއެކު ވެވުނު ސުލްހައިގެ އެއްބަސްވުމުގެ ދަށުން، ވަކިވެގަތުމަށް މައްސައްކަތްކުރި ނަގޯނޯ-ކަރުބާކުގެ ބޮޑު ސަރަހައްދެއް އާޒަރުބައިޖާނަށް ލިބިގެން ދިއުމުގެ ކާމިޔާބީ ފާހަގަ ކުރުމުގެ ގޮތުން، ވެރިރަށް ބަކޫގެ ބޮޑެތި މަގުތަކުގައި ޕެރޭޑެއް ބާއްވާައިފިއެވެ.
ނަގޯނޯ-ކަރުބާކުގެ މައްސަލާގައި އަރުމީނިއާ އާއި އާޒަރުބައިޖާންއާ ދެމެމު ކުރެވުނު ހަގުރާމައަށްފަހު، އާޒަރުބައިޖާނަށް ލިބިގެންދިޔަ ކާމިޔާބީ ފާހަގަކުރުމުގެ ގޮތުން ބޭއްވުނު މިޕެރޭޑް ބައްލަވާލެއްވުމަށް ތުރުކީގެ ރައީސް ތައްޔިބު އެރެދޮގާންވެސް ވަނީ މިއަދު އާޒަރުބައިޖާނަށް ވަޑައިގެންފައެވެ.
އަރުމީނިއާއާއި އާޒަރުބައިޖައިނާ ދެމެދު ނަގޯނޯ-ކަރުބާކުގެ މައްސަލާގައި 6 ހަފްތާވަންދެން ކުރެވެމުން އައި ހަގުރާމަ ހުއްޓުމަކަށް އައީ، ރަޝިއާ މެދުވެރިވެގެން ގާއިމް ކުރެވުނު ސުލްހައިގެ އެއްބަސްވުމަކަށް ފަހުއެވެ. މިއެއްބަސްވުން ވެވުނީ މީގެ އެއްމަސްކުރިންނެވެ. މިއެއްބަސްވުން ވެގެންދިޔައީ އާޒަރުބައިޖާނަށް ލިބިގެންދިޔަ ވަރަށް ބޮޑު ކާމިޔާބީއަކަށެވެ. ސަބަބަކީ، ދެފަރާތުގެ ދެމެދުގައި ހަގުރާމަ ހުއްޓާލާ، ސުލަހްވުމަށް ވެވުނު ސުލްހައިގެ އެއްބަސްވުމުގެ ނަތީޖާއެއްގެ ގޮތުން، ނަގޯނޯ-ކަރުބާކުގެ ބޮޑުބައެއް އާޒަރުބައިޖާންގެ ބާރުދަށަށް ގޮސްފައި ވުމެވެ.
އެެހެންނަމަވެސް، މިދެގައުމުގެ ދެމެދުގައި ސުލްހަވުމަށް ވެވުނު މިއެއްބަސްވުމުގެ ނަތީޖާއެއްގެ ގޮތުން އަރުމީނިއާގެ ސަރުކާރާ ދެކޮޅަށް އެގައުމުގެ އެތައްހާސް ރައްޔިތުންނެއް ވަނީ މުޒާހިރާ ކޮށްފައެވެ. އަދި އިދިކޮޅުފަރާތްތަކުން ވަނީ އަރުމީނިއާގެ ބޮޑުވަޒީރު އިސްތިއުފާ ދިނުމަށްވެސް ގޮވާލާފައެވެ.
އަރުމީނިއާގެ ބޮޑުވަޒީރު ފަހުން ވިދާޅުވެފައިވަނީ، ނަގޯނޯ-ކަރުބާކުގެ ބައެއް ސަރަހައްދުތައް ދޫކޮށްލުމަށް އެބަސްވެ، އާޒަރުބައިޖާންއާ އެކީ ސުލަހް ވުމަށް އެގައުމުން ނިންމީ، ވަކިވެގަތުމަށް މަސައްކަތް ކުރާ މިސަރަހައްދުގެ އިތުރު ބިންތައް އާޒަރުބައިޖާންގެ ބާރުގެ ދަށަށް ދިޔަ ނުދިނުމަށްޓަކައެވެ.
ނަގޯނޯ ކަރުބާޚްއަކީ ބައިނަލްއަގުވާމީ ގޮތުން އާޒަރުބައިޖާނަށް ނިސްބަތްވާ ސަރަހައްދެކެވެ. އެހެންނަމަވެސް 145،000 މީހުން ދިރިއުޅެމުންދާ މިސަރައްހައްދުގައި ދިރުއުޅެމުންދަނީ އަރުމީނިޔާ ދަރިކޮޅުގެ ރައްޔިތުންނެވެ. ބައިނަލްއަގުވާމީގޮތުން މިސަރަހައްދަކީ އާޒަރުބައިޖާނުގެ ސަރަހައްދެއްކަމުގައި ބަލައިގެންފައިވި ނަމަވެސް މިސަރަހައްދުގައި އަމިއްލަވަންތަ ވެރިކަމެއް ކުރަމުންދަނީ މިސަރަހައްދުގައި ދިރިއުޅެމުންދާ އަރުމީނިޔާ ދަރިކޮޅަށް ނިސްބަތްވާ މީހުންނެވެ. އަދި ކަރުބާކުގައި ދިރިއުޅެމުންދާ އަރުމީނިއާ ދަރިކޮޅުގެ ރައްޔިތުން ބޭނުންވަނީ އެސަރަހައްދަކީ އަރުމީނިޔާއަށް ނިސްބަތްވާ ސަރަހައްދެއްގެ ގޮތުގައި ދެމިއޮތުމަށެވެ.
މީގެ 30 އަހަރުކުރިން ސޯވިއެޓް ޔޫނިއަން ރޫޅިގެން ދިއުމާއިގުޅިގެން، އާޒަރުބައިޖާން އަތުން ވަނީ މިސަހައްދުގެ ކޮންޓްރޯލް ގެއްލިފައެވެ. އެހެންނަމަވެސް، 1994 ވަނަ އަހަރުން ފެށިގެން ދެފަރާތުން އަމަލުކުރަމުންދާ ސުލްހައިގެ އެއްބަސްވުމެއް އެކުލަވާލެވިފައި އޮވެއެވެ. ކަރުބާޚުގެ މައްސަލަ އާޒަރުބައިޖާންއާއި އަރުމީނިޔާއާއި ދެމެދު އުފެދިފައިވަނީ 1988 ވަނަ އަހަރުއެވެ.
މި ހަގުރާމައިން އާޒަރުބައިޖާނަށް ލިބިގެން ދިޔަ ކާމިޔާބީ ފާހަގަކުރުމަށް ބުރާސްފަތި ދުވަހު ބޭއްވުނު މިލިޓަރީ ޕެރޭޑުގައި، އެގައުމުގެ 3000 އަށްވުގެ ގިނަ ސިފައިން ބައިވެރި ވެފައި ވެއެވެ. އަދި ގިނަ އަދަދެއްގެ ހަގުރާމަ މަތީ އުޅަދުތައް މި ޕެރޭޑުގައި ބައިވެރި ކޮށްފައިވާއިރު، މިލިޓަރީ ސިފައިންގެ ހެލިކޮޕްޓަރތަކާއި، ފައިޓަރ ޖެޓުތައްވެސް ބައިވެރި ވެފައިވެއެވެ.
މިޕެރޭޑް ބައްލަވާލެއްވުމަށް ތުރުކީގެ ރައީސް ތައްޔިބު އެރެދޮގާން ވަޑައިގެންނެވިއިރު، އެރެދޮގާން ވެގެންދިޔައީ، އަރުމީނިއާއާއި އާޒަރުބައިޖާންގެ ހަމަނުޖެހުމުގައި، ފާޅުގައި އާޒަރުބައިޖާނަށް ތާއީދު ކުރެއްވި ލީޑަރެއްގެ ގޮތުގައެވެ.
ތުރުކީއާ އާޒަރުބައިޖާނަކީ، ސަގާފީ ގޮތުންނާއި އަދި ދަރިފަސްކޮޅުގެ ގޮތުންވެސް ވަރަށް ބޮޑަށް ގުޅި ލާމެހިފައިވާ ދެގައުމެވެ.
