ފަލަސްތީނުގެ ޣައްޒާގައި ހުންނަ އަލް ގުދުސް ހޮސްޕިޓަލް ހުސް ކުރުމަށް އިސްރާއީލްގެ ސިފައިން އިންޒާރު ދިން ކަމުގައި ވިޔަސް، އެ ތަން ހުސް ކުރަން ޖެހޭ އެއްވެސް ސަބަބެއް އިސްރާއީލަށް ދެއްކެން ނޯންނާނެ ކަމަށް ގުދުސް ހޮސްޕިޓަލުން މިއަދު ބުނެފިއެވެ.
އިސްރާއީލުން އިއްޔެ އިން ފެށިގެން އަންނަނީ ގުދުސް ހޮސްޕިޓަލަށް ބޮން އަޅާނެ ކަމަށް ބުނެ، އެތަން ހުސް ކުރަން އަންގަމުންނެވެ. އެކަމަކު، ހޮސްޕިޓަލް ތެރޭގައި އާއި ހޮސްޕިޓަލް ބޭރުގައި ހިޔާވަހިކަން ހޯދައިގެން ތިބި މީހުންގެ އަދަދު 14،000 އަށް އަރައެވެ. ހޮސްޕިޓަލްގައި އެތައް ބަޔަކު ޒަހަމްވެގެން ފަރުވާ ވެސް ދަނީ ހޯދަމުންނެވެ.
ފަލަސްތީނުގެ ރެޑްކްރެސެންޓް ސޮސައިޓީ (ޕީއާރުސީއެސް) އިން ބުނީ ގުދުސް ހޮސްޕިޓަލް މިހާރުން މިހާރަށް ހުސް ކުރަން އިސްރާއީލްގެ ސީރިއަސް އިންޒާރެއް ލިބިފައިވާ ކަމަށެވެ. މި ހޮސްޕިޓަލް ހުންނަނީ ޣައްޒާ ސިޓީގެ ތަލް އަލް-ހަވާ ސަރަހައްދުގައެވެ. އިސްރާއީލުން ދަނީ އެ ހޮސްޕިޓަލް ހުސް ކުރަން އެންގުމަށް ފަހު އަލް ގުދުސް ކައިރީގައި ހުރި އިމާރާތްތަކަށް ބޮން އަޅައި، އިމާރާތްތައް ބިމާ ހަމަ ކުރަމުންނެވެ.
އެ ހޮސްޕިޓަލްގެ ޑިރެކްޓަރަކު އަލް-ޖަޒީރާ އަށް ބުނީ އިސްރާއީލުން އެ ހޮސްޕިޓަލް ހުސް ކުރަން އަންގަން ޖެހޭ ސަބަބެއް ނެތް ކަމަށެވެ. އަދި އެ ހޮސްޕިޓަލް ކައިރި އަށް ހަމަލާތައް ދޭން ޖެހޭ ސަބަބެއް ވެސް ނެތް ކަމަށް ހޮސްޕިޓަލްގެ ޑިރެކްޓަރަކު ބުންޏެވެ.
"ހޮސްޕިޓަލް ތެރޭގައި ފުލުހުން ހަރަކާތްތެރިއެއް ނުވޭ. ސިފައިންނެއް ތިބީކީ ނޫން. އެކަހަލަ އެއްވެސް ކަމެއް ނުހިނގާ. އެތައް ހާސް ފަލަސްތީނުގެ ރައްޔިތުން ތިބީ. ގިނަ ބައެއްގެ ގެތައް ވަނީ ސުންނާފަތިވެފައި. އެތައް ބަޔަކު ޔޫއެންއާރުޑަބްލިއުއޭ ސްކޫލްތަކުގައި ހިޔާވަހިކަން ހޯދައިގެން އެބަތިބި،" އޭނާ ބުންޏެވެ.
"އިސްރާއީލުން ގުދުސް ހޮސްޕިޓަލްގެ ވަށައިގެން ކޮންމެ އިމާރާތަކަށް ހަމަލާ އެބަދޭ. ކީއްވެ؟ އެއްވެސް މީހަކަށް އެއެއް ނޭނގޭ،"
ޕީއާރުސީއެސް އިން ބުނާ ގޮތުގައި ހޮސްޕިޓަލް ތެރޭގައި އާއި ބޭރުގައި ގިނަ އިން ތިބީ ކުޑަކުދިންނާއި އަންހެނުން ކަމަށެވެ.
ޑަބްލިއުއެޗްއޯގެ ޑިރެކްޓަރު ޓެޑްރޯސް އަދަނޮމް ވިދާޅުވީ ބަލި މީހުންނައިގެން ފުރިފައިވާ ހޮސްޕިޓަލެއް ހުސް ކުރުމަކީ ވާނެ ކަމެއް ނޫން ކަމަށެވެ. އެފަދަ ކަމެއް ކުރާ ނަމަ، އެތައް ބައެއްގެ ފުރާނަ އަށް ނުރައްކާ ވާނެ ކަމަށް ވެސް ޑަބްލިއުއެޗްއޯ އިން ބުނެފައިވެއެވެ.
އިސްރާއީލުން އޮކްޓޯބަރު 17 ވަނަ ދުވަހު ވަނީ ފަލަސްތީނުގައި ހުރި އަލް އަހްލީ އަރަބް ހޮސްޕިޓަލަށް ބޮން އަޅައި 500 އާ ގާތް ކުރާ އަދަދަކަށް މީހުން ޝަހީދުކޮށްލައިފައެވެ.
