މިސަރުކާރުން ހުޅުވާލި ގެދޮރިވެރިޔާ އަދި ބިންވެރިޔާ ސްކީމުގެ ދަށުން ފްލެޓާއި ގޯތި ލިބޭ މީހުން ދައުރު ނިމުމުގެ ކުރިން ކަނޑައަޅާ ނިންމާނެކަމަށް ސަރުކާރުން ބުނެފިއެވެ.

ހައުސިން މިނިސްޓްރީގެ ސްޓޭޓް މިނިސްޓަރ އަކުރަމް ކަމާލުއްދީން ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، ފްލެޓާއި ގޯއްޗަށް ކުރިމަތިލި މީހުންގެ ފޯމުތައް މި ދައުރު ނިމުމުގެ ކުރިން ޕްރޮސެސްކޮށް ނިންމުމަށް ހަމަޖެހިފައިވާ ކަމުގައެވެ.

އަދި އޭނާ ވިދާޅުވެފައިވަނީ އެ ލިސްޓު މިދައުރު ނިމުމުގެ ކުރިން އިއުލާންވެސް ކުރާނެކަމުގައެވެ.

މާލޭ ސަރަހައްދުގައި ކުރިމަތިވެފައިވާ ބޯހިޔާވަހުކަމުގެ މައްސަލައަށް ހައްލެއް ހޯދުމަށް މި ސަރުކާރުން ކުރިޔަށްގެންދާ ބިންވެރިޔާ އަދި ގެދޮރުވެރިޔާ ސްކީމްގެ ދެވަނަ ބުރުގައި 40،000އަށް ވުރެ ގިނަ ފޯމް ހުށަހަޅާފައި ވެއެވެ.

ބިންވެރިޔާއާއި ގެދޮރުވެރިޔާ ސްކީމްގެ ދެެވަނަ ބުރުގައި 4000 ގޯއްޗާއި 6000 ފްލެޓަށް ކުރިމަތިލުމަށް ސަރުކާރުން ހުޅުވާލީ މިދިޔަ މަހުއެވެ. އަދި ކުރިމަތިލުމުގެ މުއްދަތު ހަމަވީ މިމަހުގެ 24 ވަނަ ދުވަހުގެ މެންދުރު ފަހު 15:00އަށެވެ.

މި މުއްދަތުގެ ތެރޭގައި ދެ ސްކީމަށް ފޯމު ހުށައެޅި މީހުންގެ ޖުމްލަ އަދަދު 40594 އަށް އަރާކަމަށް ޕްލޭނިން މިނިސްޓްރީން ބުނެފައި ވެއެވެ.

މިހާރު ކުރިޔަށްދާ ގޯއްޗާއި ފްލެޓް ދިނުމުގެ ދެވަނަ ބުރުގައި ފުރުސަތު ހުޅުވާލާފައިވަނީ 6،000 ފްލެޓާއި 4،500 ގޯއްޗަށެވެ. މިބުރުގައި ގޯތި ދޫކުރުމަށް ހަމަޖެހިފައިވަނީ ގިރާވަރު އުތުރު ފަޅުންނެވެ.

މިފުރުސަތުގައި ހުށަހަޅާ ކޮންމެ އެޕްލިކޭޝަންއަކަށް ލިބޭނެ ގޯތީގެ އެންމެ ކުޑަ ސައިޒަކީ 1،250 އަކަ ފޫޓެވެ. ޖޮއިންޓްކޮށް ހުށަހަޅާ އެޕްލިކޭޝަނެއްނަމަ، އެކަކަށް ވުރެ ގިނަ މީހުންގެ ނަމުގައި ހުށަހަޅާ އެޕްލިކޭޝަނުގައި އިތުރަށް ބައިވެރިވާ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރު ކުރެވޭނެއެވެ. ހަތް މީހުންނަށް ވުރެ ގިނަ މީހުން ޖޮއިންޓް އެޕްލިކޭޝަނުގައި ބައިވެރިވާނަމަ އެ އެޕްލިކޭޝަނަށް ލިބޭނީ، ޖުމުލަ 4,000 އަކަފޫޓެވެ.

މި ބުރުގައި ގޯތި ދޫކުރުމަށް ހަމަޖެހިގައިވާ ޖުމްލަ ބިމުގެ ބޮޑުމިނަކީ 5,525,000 އަކަފޫޓެވެ. ސަރުކާރުން ބުނެފައިވަނީ ދޫކުރާ ގޯތީގެ ޖުމްލަ އަދަދު ކަނޑައަޅާނީ ގޯތި ދިނުމަށް ހޮވޭ ވަކިވަކި އެޕްލިކޭޝަންތަކަށް ދޫކުތާ ގޯތީގެ ބޮޑުމިން ކަނޑައެޅުމުންނެވެ. މިފަހަރުވެސް ސަރުކާރުން ފުރުސަތު ހުޅުވާލާފައިވަނީ މާލޭގެ މީހުންގެ އިތުރުން މާލޭގައި ދިރިއުޅޭ މީހުންވެސް ހިމެނޭ ގޮތުންނެވެ.

މިގޮތުން މާލޭގައި ދިރިއުޅޭ މީހުންގެ ތެރެއިން ގޯއްޗަށް ޝަރުތު ހަމަވަނީ މާލޭގައި ދިރިއުޅޭތާ 20 އަހަރު ވެފައިވާނަމައެވެ. ފްލެޓަށް ޝަރުތު ހަމަވަނީ މާލޭގަ އުޅޭތާ 15 އަހަރު ވެފައިވާ މީހުންނަށެވެ.

އިންތިޚާބީ ރައީސް ޑރ. މުހައްމަދު މުއިއްޒު ވިދާޅުވެފައި ވަނީ މި ސަރުކާރުގެ ގެދޮރުވެރިޔާ އާއި ބިންވެރިޔާ ސްކީމްގެ ފުރަތަމަ ބުރާއި ދެވަނަ ބުރުގައި ގޯއްޗާއި ފްލެޓަށް އެދި ހުށަހެޅި މީހުންގެ ފޯމުތައް ބާތިލް ނުކުރައްވާނެ ކަމަށެވެ.