ފަލަސްތީނުގެ ޣައްޒާގައި ހާލުގައި ޖެހިފައިވާ ރައްޔިތުންނަށް އެހީ ފޯރުކޮށްދިނުމަށް، ޔޫއެންގެ ޖަމިއްޔާތަކުން އެހީގެ ތަކެތި ރައްކާކޮށްފައި ހުރި ގުދަންތައް ގާޒާގެ ރައްޔިތުން ލޫޓުވާލައިފިއެވެ.
ޔޫއެންގެ އެހީދޭ ޖަމިއްޔާ UNRWA އިން ބުނެފައިވަނީ ގާޒާގެ އެތައްހާސް ރައްޔިތުން ނިކުމެ އެ ޖަމިއްޔާއިން ރައްކާކޮށްފައި ހުރި އެހީގެ ތަކެތި ލޫޓުވާލުމާއެކު، ގާޒާގެ އާންމު މަސްލަހަތު ގެއްލިގެން ހިގައިދާނެކަމުގެ ނުރައްކާ މިހާރު ކުރިމަތިވެފައިވާ ކަމުގައެވެ.
ޔޫއެންގެ އެހީދޭ ޖަމިއްޔާ UNRWA އިން ބުނެފައިވަނީ ގާޒާގެ މެދުތެރޭގައާއި އަދި ދެކުނުގައި އެހީގެ ތަކެތި ރައްކާކޮށްފައިހުރި ގިނަ ގުދަންތަކެއް ގާޒާގެ ރައްޔިތުންވަނީ ފަޅާލާ، އެތަންތަނުގައި ރައްކާކޮށްފައި ހުރި ފުށާއި އަދި އެހެނިހެން އަސާސީ ތަކެތިވެސް ގެންގޮސްފައިވާކަމުގައެވެ.
އެ އޭޖެންސީން ބުނެފައިވަނީ ގުދަންތަކުން ތަކެތި ގެންގޮސްފައިވަނީ ދުވާލުގެ ވަގުތުގައި ކަމަށެވެ.
އިސްރާއީލުން ޣައްޒާއަށް ދެމުންދާ އުދުވާނީ ހަމަލާތަކާއި ގުޅިގެން ޙާލުގައި ޖެހިފައިވާ އާންމު ރައްޔިތުންނަށް އެހީވުމަށް، މިސްރުގެ ބޯޑަރާއި ގުޅިފައިވާ ރަފާ ބޯޑަރު ހުރަސްކޮށް ހަނގުރާމަ ފެށުނުފަހުން މިހާތަަނަށް ޣައްޒާއަށް އެތެރެވެފައިވަނީ 80 ލޮރީއެވެ. އެހީދޭ ޖަމިއްޔާތަކުން ބުނެފައިވަނީ، އާންމު ގޮތެއްގައި ޣައްޒާއަށް ދުވާލަކަށް 100 ލޮރީގެ އެހީ ބޭނުންވާ ކަމުގައެވެ. މިގޮތުން މިހާރު ކުރެވެމުންދާ ހަނގުރާމައިގެ ސަބަބުން މިއަދަދު މިހާރު އެތައް ގުނައެއް މަތިވެގެން ގޮސްފައިވާކަމުގައެވެ.
އިސްރާއީލުންވަނީ ޣައްްޒާއަށް ތެޔޮ އެތެރެކުރުން މަނާކޮށްފައެވެ. އެގައުމުން ބުނެފައިވަނީ ޣައްޒާއަށް އެތެރެކުރާ ތެޔޮ ހަމާސްޖަމާއަތުން ބޭނުން ކުރަމުންދާ ކަމުގައެވެ.
