ފަލަސްތީނުގެ ޣައްޒާގެ ސިއްހީ ނިޒާމު އޮތީ މީގެކުރިން ނުދާހާ ގޯސް މަރުހަލާއަކަށް ގޮސްފައި ކަމަށާއި ރައްޔިތުންނަށް ބޭނުންވާ އެހީތައް ބައިނަލްއަގުވާމީ ގައުމުތަކުންނާއި ކަމާބެހޭ ފަރާތްތަކުން ފޯރުކޮށް ދިނުމަށް ޣައްޒާގެ ހެލްތު މިނިސްޓްރީން ގޮވާލައިފިއެވެ.
އިސްރާއީލުން ޣައްޒާ އަށް ދެމުން އަންނަ ވައިގެ ހަމަލާތައް ވަރުގަދަކޮށްފައިވާ މި ދަނޑިވަޅުގައި ތެލުގެ ދަތިކަމުގެ ސަބަބުން ކުރިއަށް އޮތް މަދު ދުވަސްކޮޅުގެ ތެރޭގައި ހޮސްޕިޓަލްތަކަށް ކަރަންޓުގެ ހިދުމަތް ފޯރުކޮށްދެމުންދާ ޖަނަރޭޓަރުތައް ހުއްޓިދާނެކަމަށް އެގައުމުގެ ހެލްތު މިނިސްޓުރީން ވަނީ ހާމަކޮށްފައެވެ.
މިނިސްޓްރީގެ ތަރުޖަމާނު އަޝްރަފް އަލް ގުދްރާ ޓެލެގްރާމްގައި ނެރުނު ކުރު ބަޔާނެއްގައި ވިދާޅުވީ ޣައްޒާއަށް އިންސާނީ އެހީތައް ލިބުމަށް ކުރިމަތިވި ހުރަސްތަކުގެ ސަބަބުން މި އެހީތައް ލަސްވެ، މިކަމުގެ ސަބަބުން ޣައްޒާގެ ރައްޔިތުން ވަނީ ވަރަށް ނިކަމެތި ހާލަތަކަށް ވެއްޓިފައި ކަމަށެވެ.
ހެލްތު މިނިސްޓްރީން ހާމަކުރިގޮތުގައި އިސްރާއީލުން ހުއްޓުމެއްނެތި ދެމުންދާ ބޮމުގެ ހަމަލާތަކުގެ ސަބަބުން އެގައުމު ރައްޔިތުން ދިރިއުޅެމުންދާ އަވަށްތައް ބިމާހަމަވެ، އެގައުމަށް ތެޔޮ ލިބުން ހުއްޓުމުގެ ސަބަބުން ފަލަސްތީނުގެ އެކި ހިސާބުތަކަށް ކަރަންޓު ދިނުމަށް ބޭނުންކުރަމުންދާ 32 އިންޖީނުގެއެއްގެ ހިދުމަތް މިހާރުވެސް ވަނީ ހުއްޓިފައެވެ.
އދ އިން ހާމަކޮށްފައިވާ ގޮތުގައި ޣައްޒާއަށް އެންމެ ބޭނުންވާ އެހީތަކުގެ ތެރޭގައި އިސްރާއީލުގެ ހަމަލާތަކުގައި ޒަހަމްވާ އެގައުމުގެ އާންމު ރައްޔިތުންނަށް ފަރުވާ ދިނުމަށް ބޭނުންވާ ސާމާނާއި، ހޮސްޕިޓަލުތަކަށް ބޭނުންވާ ބޭހުގެ އިތުރުން ޣައްޒާ އަށް ކަރަންޓު ދިނުމަށް ބޭނުންވާ ތެޔޮ ހިމެނެއެވެ. އެހެންކަމުން ގައުމުތަކުން އެހީ ދިނުމުގައި އެގައުމަށް އެންމެ ބޭނުންވާ އެހީތަށް ދިނުމަށް އިސްކަން ދިނުމަށް ވެސް އަދ އިން ވަނީ އެދިފައެވެ.
ފަލަސްތީނުގެ ހާލަތު މިހާ ނާޒުކު އިރު، ޣައްޒާގެ އުތުރުގެ ބެއިތު ލާހިއާ ސަރަހައްދުގައި ހުންނަ ހޮސްޕިޓަލްތަކުން ވެސް ތެޔޮ ހުސްވުމުގެ ސަބަބުން ކަރަންޓު ދެވޭނެ ގޮތެއް ނެތި ވަނީ ހިދުމަތްތައް ދިނުން ހުއްޓާލަން ޖެހިފައެވެ.
އަލްޖަޒީރާއިން މިހަފްތާގައި އާންމުކުރި ވީޑިއޯތަކުން ފެންނަގޮތުގައި ކަރަންޓު ނެތުމުގެ ސަބަބުން ޣައްޒާގެ ގިނަ ސަރަހައްދުތައް އޮތީ ކަނު އަނދިރީގައެވެ. ވީޑިއޯތަކުން ފެންނަ ގޮތުގައި ހޮސްޕިޓަލުތަކުގައި މެޑިކަލް ޓީމުތަކުން އެންބިއުލާންސްގައި ޒަހަމްވެފައިވާ މީހުން އުފުލާއިރު ވެސް ބޭނުންކުރަމުން ދަނީ ޕޯޓަބަލް ޗާޖް ލައިޓްތަކެވެ.
އިސްރާއީލުން ވާށާލާފައިވާ ޣައްޒާ އަށް އިތުރު އެހީ ޓްރަކްތަކަށް ވަނުމުގެ ހުއްދަ ލިބޭނެކަމަށް ރައްޔިތުން ތިބީ އުންމީދުކޮށްގެން ކަމަށް މީޑީއާތަކުން ވަނީ ރިޕޯޓުކޮށްފައެވެ. އަދި ރައްޔިތުން ތިބީ މި ދަތި އުނދަގޫ ހާލަތުން އަރައިގަނެވި، އިސްރާއީލުން ދެމުންދާ ހަމަލާތައް ހުޓާލާނެ އިރެއްގެ އިންތިޒާރުގައި ކަމަށް ވެސް މި ރިޕޯޓުތައް ބުނެއެވެ.
އިސްރާއީލުން ޣައްޒާއަށް ވަރުގަދަ ވައިގެ ހަމަލާތަކެއް ދޭންފެށީ ފެށީ މިމަހުގެ ހަތް ވަނަ ދުވަހު އިސްރާއީލުން ހިފާފައިވާ ދެކުނުގެ ސަރަހައްދުތަކަށް ހަމާސް އިން ވަރުގަދަ ހަމަލާތަކެއް ދިނުމުގެ ސަބަބުންނެވެ. އިސްރާއީލުގެ ހަމަލާތަކުގައި ފަލަސްތީނުގެ 7،000 އަށް ވުރެ ގިނަ މީހުން ޝަހީދުވެފައި ވާކަމަށް ޣައްޒާގެ ހެލްތު މިނިސްޓްރީން ވަނީ ހާމަކޮށްފައެވެ.
