ފަލަސްތީނުގެ މިނިވަންކަމަށް ޖިހާދު ކުރަމުންދާ ހަމާސް ޖަމާއަތުން ރަހީނު ކޮށްފައިވާ 200އަށްވުރެ ގިނަ މީހުންގެ ތެރެއިން އިތުރު ދެ މީހަކު ދޫކޮށްލައިފިއެވެ.
މިފަހަރު ހަމާސްއިން ދޫކޮށްލާފައިވަނީ މުސްކުޅި ދެ އަންހެނެއް ކަމަށްވާ، ނޫރިތު ކޫޕަރ އާއި ޔޫޗެވްޑް ލިސްޝިޒް ނަމަކަށް ދެ އަންހެނެކެވެ. އެހެންނަމަވެސް މި ދެމީހުންގެ ފިރިން އަދިވެސް ތިބީ ހަމާސްގެ ހައްޔަރުގައެވެ.
މި ދެމީހުންގެ ތެރެއިން ލިސްޝިޒްގެ އަންހެން ދަރިފުޅު ބުނެފައިވަނީ އެމީހުންގެ ހުރިހާވެސް އުއްމީދަކީ ހަމާސްއިން ރަހީނު ކޮށްފައިވާ އެމީހުންގެ ބައްފަ ދޫކުރެވޭނެ މަގެއް ހޯދުން ކަމުގައެވެ.
އިޒްރޭލުން އެންމެ ފަހުން ދޫކޮށްފައިވާ ދެމީހުންނާއެކު، މިހާތަނަށް މިނިވަންކުރި ރަހީނުންގެ އަދަދު 4 އަށް އެރީއެވެ. ފާއިތުވި ހުކުރުދުވަހު ހަމާސްއިން ވަނީ އެމެރިކާ އިޒްރޭލުގެ އެމެރިކާ ދަރިކޮޅުގެ މުސްކުޅި މަންމައަކާއި އޭނާގެ ދަރިފުޅު މިނިވަން ކޮށްފައެވެ.
ހޮސްޓެޖުން މިނިވަން ކުރުމުގައި މެދުވެރިއެއްގެ ދައުރު އަދާކޮށްފައިވަނީ އިންޓަރނޭޝަނަލް ކޮމިޓީ އޮފް ރެޑް ކްރިސްއިންނެވެ. މިމީހުން ދޫކޮށްލުމުގައި ހަމާސްއާއި ދެއްކުނު ވާހަކަތައް ކުރިޔަށް ގެންގޮސްފައިވަނީ ޤަތަރުންނެވެ.
އިޒްރޭލުން އެންމެ ފަހުން ބުނެފައިވަނީ ހަމާސްއިން 200 އަށްވުރެ ގިނަމީހުން ރަހީނު ކޮށްފައިވާކަމުގައެވެ. އެ އެންމެންވެސް ރަހީނު ކޮށްފައިވަނީ މި އޮކްޓޯބަރުމަހުގެ 7 ވަނަ ދުވަހު ހަމާސް ޖަމާއަތުން އިޒްރޭލަށްދިން ކުއްލި ހަމަލާގައެވެ.
މިހަމަލާއަށްފަހު އިޒްރޭލުން ގެންދަނީ ހުއްޓުމެއްނެތި ޣައްޒާއަށް ބޮން އަޅަމުންނެވެ. އެގޮތުން ރޭ އެކަނިވެސް ޣައްޒާއަށް ދިން ހަމަލާތަކުގައި ފަލަސްތީނުގެ 471 މީހުންވަނީ ޝަހީދުވެފައެވެ. އަދި ޝަހީދުވެފައިވާ ފަލަސްތީނު މީހުންގެ ޖުމްލަ އަދަދު ވަނީ 5،000 އަށްވުރެ މައްޗަށް ގޮސްފައެވެ. ހަމާސްގެ ހަމަލާތަކުގައި އިސްރާއީލުން މަރާލާފައި ވަނީ 1،403 މީހުންނެވެ. އަދި 4،932 މީހުން ވަނީ ޒަހަމްކޮށްލައިފައެވެ.
