ރައްޔިތުންގެ މަޖިލީހަށް ދޭންޖެހޭ ފުރިހަމަ އެއްބާރުލުން އަބަދުވެސް ދެއްވާނެ ކަމަށް އިންތިޚާބީ ނާއިބު ރައީސް އަދި ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް ވިދާޅުވެއްޖެއެވެ.
ފާއިތުވެދިޔަ ރައްޔިތުންގެ މަޖިލީހުގެ ދެ ދައުރުގައިވެސް ރައްޔިތުންގެ މަޖިލީހުގެ ސޯޝަލް ކްލަބު، "ޕެމާ" އާއި ގާތް ގުޅުން ބައްވާ މެމްބަރުންގެ ތެރޭގައި ހިމެނި ވަޑައި ގަންނަވާ ސެމްބެ ޤައުމުގެ ނައިބް ރައީސް ކަމުގެ މަޤާމަށް އިންތިޚާބު ވުމުން އެކުލަބުން އިސްނަގައިގެން ބޭއްވި ޚާއްސަ ހަފްލާއެއްގައި އިންތިޚާބީ ނައިބް ރައީސް ވިދާޅުވީ މިހާރު ހަވާލުވެވަޑައިގަންނަވަނީ މުޅި ގައުމުގެ ޒިންމާ އެކުލެވޭ މަސައްކަތަކާއި ކަމަށާ، އެމަސައްކަތުގައި އުޅުއްވަމުންވެސް މަޖިލީހުން އެދިވަޑައިގަންނަވާ ކޮންމެކަމެއްވެސް އަމިއްލަކަމެއްގެ ގޮތުގައި ދެކެވަޑައިގެން ކޮށްދެއްވާނެކަމަށެވެ.
ގައުމީ މަސައްކަތަށް މިނުކުތީ ޕާޓީއެއްގެ ސިޔާސަތުތަކަކާއެކީގައި، މި މަގާމަށް އައުމަށް ޕާޓީގެ ފަރާތުން ލިބުނު އެއްބާރު ލުމަށް ޝުކުރުއަދާކުރަން، އަދި މި ފުރުސަތުގައި ޔަޤީންކަން އަރުވަން އިންތިޚާބީ ރައީސްއަށާއި، މަޖިލީހަށް އަދި މަޖިލީހުގެ ސޯޝަލް ކްލަބަށް އެއްބާރުލުން ދޭނެކަމުގެ ޔަގީންކަން އަރުވަން.
– އިންތިޚާބީ ނައިބު ރައީސް ހުސެއިން މުޙައްމަދު ލަތީފް ވިދާޅުވިއެވެ.
އިންތިޚާބީ ނައިބް ރައީސަކީ ކޮންމެ އަހަރަކު އޮންނަ ކަލަބް މޯލިޑްވްސް ކަޕް ފުޓްސެލް މުބާރާތުގައިވެސް މަޖިލީހުގެ ޓީމަށް ކުޅެދީ ޓީމުގައި ގޯލް ޖެހުމަށް މުހިންމު ދައުރެއް އަދާ ކުރައްވާފައެވެ. އަދި އިންޓަރ ޑިޕާޓްމަންޓް އެކި މުބާރާތްތަކާއި، އެހެން ކުޅިވަރުތަކުގައިވެސް މަޖިލީހުން ބައިވެރިވުމުގައި ސެމްބެގެ އެއްބާރުލުން ވަނީ ދެއްވާފައެވެ.
މިރަސްމިއްޔާތުގައި ހުސައިން މުހައްމަދު ލަތީފު މަޖިލީހުގައި ހޭދަކުރެއްވި ދެ ދައުރުގައިވެސް ޕެމާއަށް ވެދެއްވި އެހީތެރިކަމާއި، އެއްބާރުލެއްވުން ފާހަގަކުރައްވާ ޕެމާއިން ވަނީ ހަނދާނީ ފިލައެއް އަރުވާފައެވެ.
"ޕެމާ"އަކީ ރައްޔިތުންގެ މަޖިލީހުން އެކިއެކި ހަރަކާތްތައް ހިންގުމަށް ހަދާފައި އޮންނަ ސޯޝަލް ކްލަބެކެވެ.
