މި މަހުގެ ހަތް ވަނަ ދުވަހު ހަމާސް އިން އިސްރާއީލަށް ދިން ހަމަލާތަކުގެ ސަބަބުން ފަލަސްތީނުގެ ޣައްޒާ ގުޅޭ ބޯޑަރާއި ލުބުނާންއާ ގުޅޭ ބޯޑަރު ސަރަހައްދުގައި ދިރިއުޅޭ އިސްރާއީލް އެތައް ބަޔަކު ގެދޮރު ގެއްލިފައިވާ ކަމަށް އިސްރާއީލުން ހާމަކޮށްފިއެވެ.

އިސްރާއީލު ސަރުކާރުން ބުނެފައި ވަނީ ޣައްޒާ ޣައްޒާއާއި ލުބުނާނު ބޯޑަރާ ކައިރި ހިސާބުތަކުގެ 105 އަވަށަކުން މީހުން ނިކުތުމަށް މިހާރު އަންގާފައިވާ ކަމަށެވެ. މި އެންގުން އެންގުމުގެ ކުރިން ވެސް މި ސަރަހައްދުތަކުގައި ދިރިއުޅޭ ދެބައިކުޅަ އެއްބައި މީހުން މި ސަރަހައްދު ދޫކޮށް ގޮސްފައިވާ ކަމަށްވެއެވެ.

މިއާ އެކު، ގެދޮރު ގެއްލިފައިވާ މީހުންގެ އަަދަދު 200،000 އަށް އަރާ ކަމަށާއި ގެދޮރު ގެއްލުނު މީހުންގެ ތެރެއިން ދެބައިކުޅަ އެއްބައި މީހުން ދިރިއުޅެމުން ދިޔައީ އިސްރާއީލާއި ލުބުނާން ގުޅޭ ބޯޑަރާއި ފަލަސްތީނާއި އިސްރާއީލް ބޯޑަރު ގުޅޭ ސަރަހައްދު ކައިރީގައި ކަމަށް އިސްރާއީލުން ބުންޏެވެ.

ޑިފެންސް މިނިސްޓްރީން ބުނި ގޮތުގައި ގެދޮރު ގެއްލިފައިވާ މީހުންގެ ތެރޭގައި ހިމެނެނީ ހަނގުރާމައިގެ ސަބަބުން ބައެއް ސަރަހައްދުތަކުން ސަލާމަތީ ސަބަބުތަކަށްޓަކައި އެހެން ސަރަހައްދުތަކަށް ބަދަލުކޮށްފައިވާ މީހުންނާއި އެގައުމުގެ ދައުލަތުން ފޯރުކޮށްދެމުން އަންނަ ސަބްސިޑައިޒްގެ ދަށުން ހަނގުރާމަ ކުރާ ސަރަހައްދު ތަކުން ރައްކާތެރިވެ ހަމަޖެހިލުމަށް އެހެން ސަރަހައްދުތަކަށް ގޮސްފައިވާ މީހުންނެވެ.

މި ހަމަލާތަކުގެ ސަބަބުން އިސްރާއީލުގެ އުތުރުގައި އޮންނަ ކިރިޔާތު ޝްމޯނާ އިން 23،000 މީހުން ނެރުމުގެ މަސައްކަތް އެގައުމުގެ ނޭޝަނަލް އިމަޖެންސީ މެނޭޖްމަންޓް އޮތޯރިޓީ އިން ކޮށްފައިވާ ކަމަށާއި އަދި ޣައްޒާގެ ބޯޑަރު ކައިރި 14 އަވަށެއްގައި މިހާރުވެސް ދިރިއުޅެމުންދާ އެގައުމުގެ 11،000 ވުރެ ގިނަ ރައްޔިތުން އެހެން ސަރަހައްދުތަކަށް ބަދަލުކުރުމުގެ މަސައްކަތް ކުރެވެމުންދާ ކަމަށް ޑިފެންސް މިނިސްޓްރީން ބުންޏެވެ.

އިސްރާއީލަށް މިހާރު ހަމަލާ ދެމުން ދަނީ އެންމެ ދިމާލަކުން ނޫނެވެ. ޣައްޒާ އިން ވެސް ރޮކެޓް ހަމަލާތައް އިސްރާއީލަށް ފޮނުވާލާ އިރު، ލުބުނާންގައި ތިބި ހިޒްބުﷲ ހަނގުރާމަވެރިން ވެސް ދޭތެރެ ދޭތެރެއިން އިސްރާއީލަށް ހަމަލާދެއެވެ.

އިސްރާއީލުގެ އަސްކަރިއްޔާއިން ހާމަކޮށްފައިވާ ގޮތުގައި އެގައުމުން ފަލަސްތީނަށް ދެމުންދާ ހަމަލާތަކަކީ ހަމާސްގެ އިންފްރާސްޓްރަކްޗާ ހަލާކުކޮށް، ހަމާސް ވުޖޫދުން ފޮހެލުމަށް ކުރަމުންދާ މަސައްކަތެކެވެ. ނަމަވެސް މި ހަމަލާތައް އަމާޒުވަނީ ކުށެއް ނެތް އާންމު ރައްޔިތުންނަށެވެ.