ފަލަސްތީނުގެ މިނިވަންކަމަށް ޖިހާދު ކުރަމުންދާ ހަމާސް ޖަމާއަތުން މިމަހުގެ 7 ވަނަ ދުވަހު އިސްރާއީލަށްދިން ކުއްލި ހަމަލާއަށްފަހު ރަހީނު ކޮށްފައިވާ މީހުންގެ ތެރެއިން އެމެރިކާގެ ދެމީހަކު އެ ޖަމާއަތުން ދޫ ކޮށްލައިފިއެވެ.
އިޒްރޭލުގައި ނުރައްކާތެރި ހަމަލާއެއް ދީ، ގާތްގަނޑަކަށް 200 އެއްހާ މީހުން ރަހީން ކުރިތާ ގާތްގަނޑަކަށް ދެ ހަފުތާ ފަހުން ހަމާސް އިން ދޫކޮށްލާފައިވަނީ ވަނީ އެމެރިކާގެ ދެ މީހުން ކަމަށްވާ ޖުޑިތު ޓައި ރާނާން އާއި އޭނާގެ 17 އަހަރުގެ އަންހެން ދަރިފުޅު ނަތާލީ ރާނާން އެވެ.
އިސްރާއީލުގެ އަސްކަރިއްޔާގެ ތަރުޖަމާނު ޑެނިއަލް ހަގާރީ ހުކުރު ދުވަހު ވިދާޅުވީ އެމެރިކާގެ ރައްޔިތުން ޣައްޒާގެ ބޯޑަރު ސަރަހައްދުގައި ހަވާލުކޮށްފައިވާ ކަމަށާއި މިހާރު ތިބީ އިޒްރޭލުގެ ދިފާއީ ބާރުތަކުގެ ބެލުމުގެ ދަށުގައި ކަމަށެވެ.
އެމެރިކާގެ ދެ މީހުން ކަމަށްވާ މަންމައަކާއި އޭނާގެ އަންހެން ދަރިފުޅު މިހާރު ތިބީ އިސްރާއީލުގެ ކަމާބެހޭ ފަރާތްތަކާ އެކުގައި ކަމަށް އިސްރާއީލުގެ ބޮޑުވަޒީރުވެސް ވިދާޅުވެފައި ވެއެވެ.
އިސްރާއީލުގެ އަސްކަރީ މަރުކަޒެއްގައި އެމެރިކާގެ ރައްޔިތުން އާއިލާއާ އަލުން ގުޅެން ނިންމާފައިވާ ކަމަށް އެގައުމުގެ އޮފިޝަލުން ބުނެ އެވެ. އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން ވަނީ އެމީހުން ދޫކޮށްލުމަށް ތައުރީފު ކުރައްވައި، އޮކްޓޯބަރު މަހުގެ 7 ވަނަ ދުވަހު ހަމާސް ޖަމާއަތުން ދިން ހަމަލާގައި އެމެރިކާގެ ހުރިހާ ރަހީނުންނާއި އެހެނިހެން ހޮސްޓެޖުންވެސް މިނިވަން ކުރުމުގެ "އަވަސް މަސައްކަތް" ކުރިއަށް ގެންދަން ޖެހޭ ކަމަށް ވިދާޅުވެފައެވެ.
އިސްރާއީލުގެ އަސްކަރީ އޮފިޝަލަކު ވިދާޅުވެފައިވަނި ހަމާސްއިން ދޫކޮށްލި މަންމަ އާއި އަންހެން ދަރިފުޅު ދޫކޮށްލީ "އަސްކަރީ ޕްރެޝަރާ" ހެދިކަމަށް ބުނެފައެވެ.
