އިސްރާއީލުން ފަލަސްތީނުގެ ރައްޔިތުންގެ އަޅުވެތިކޮށް، އެގައުމުގެ ބިންތައް ގަދަކަމުން ހިފާ ފާއިތުވި 70 އަހަރުތެރޭ ހިންގަމުންދާ ބޮޑެތި ޖަރިމާތަކާ ދެކޮޅަށް ފަލަސްތީނުގެ ރައްޔިތުން ކުރަމުންދާ ޖިހާދަށް ތާއީދު ކުރުންމަތީ އަބަދުވެސް ދެގޮތެއް ނުވެ ދެމިތިބޭ އެއް ރައްޔިތެއްގެ ގޮތުގައި ފާހަގަ ވެފައިވަނީ، ސައްތައިން ސައްތަ މި ދިވެހި ގައުމުގެ އެކި ރަށްރަށުގައި ދިރިއުޅެމުންދާ މުސްލިމް ރައްޔިތުންނެވެ.

މިގޮތުން އެކި އަހަރު ތަކުގައި، ފަލަސްތީނުގެ ރައްޔިތުންނާ ދެކޮޅަށް އިސްރާއީލުގެ އަނިޔާވެރި އަސްކަރިއްޔާއިން ހިންގާ އުދުވާންތަކާއި ދެކޮޅަށް މާލެއައާއި އެކި ރަށްތަކުގައި އަޑު އުފުލާފައި ވެއެވެ.

މިއަޑު އުފުލުންތަކުގައި އިސްރާއީލާ ދެކޮޅަށް އެކި ޝުޢޫރުތައް ފާޅުކޮށް، އިސްރާއީލުގެ އަނިޔާވެރިކަން ދިވެހި ކުށްވެރި ކޮށްފައިވާއިރު، އެހެން ފަހަރުތަކާއި ޚިލާފަށް، އިސްރާއީލުން ފަލަސްތީނާއި ދެކޮޅަށް މިހާރު ހިންގަމުންދާ އުދުވާންއާއި ގުޅިގެން މާލެއާއި ރާއްޖޭގެ ރަށްތަކުގައި މިހާރު ކުރިޔަށްދާ އެއްވުންތަކުން ފާހަގަވެގެންދާ އެއްކަމެއް އޮތްކަން މިފުރުސަތުގައި ފާހަގަ ކޮށްލާން ޖެހެއެވެ.

އެއީ އިސްރާއީލު އެކީ ބޮއިކޮޓްކޮށް، އެގައުމުގެ ރައްޔިތުން ރާއްޖެއަށް އެތެރެވުން މަނާކުރުމަށް އެދި ދިވެހިންގެ އެތައްހާސް އާންމު ރައްޔިތުން އުފުލަމުންދާ އަޑުތަކެވެ.

ދިވެހިން ބޭނުމީ އިސްރާއީލް ބޮއިކޮޓްކޮށް، އެގައުމުގެ ޕާސްޕޯޓުވެސް މަނާ ކުރުމަށް!

ފަލަސްތީނު ރައްޔިތުންނާ އެކީ ތިބިކަން ހާމަކޮށް، އިސްރާއީލު ބޮއިކޮޓުކޮށް، އަދި އިސްރާއީލު ރައްޔިތުންގެ ޕާސްޕޯޓު ރާއްޖެއިން ބަލައި ނުގަތުމަށް، ރޭ މާލޭގައި ބޭއްވި ބޮޑު މުޒާހިރާގައި އެތަކެއް ދިވެހިންނެއް ވަނީ ގޮވާލާފައެވެ.

މިހާރު މާލޭގައި، އިސްރާއީލާ ދެކޮޅަށް އިންތިޒާމް ކުރަމުންދާ މުޒާހިރާތަކުގެ ތެރެއިން ރޭގެ މުޒާހިރާއަކީ "ރައިޓް މޫވްމަންޓް"ގެ ފަރާތުން އިންތިޒާކުރި ބޮޑު މުޒާހިރާއެކެވެ. މިހިގާލުން ފަށާފައިވަނީ މާލޭ ސޯޝަލް ސެންޓަރު ކައިރިންނެވެ. ގިނަ އަދަދެއްގެ ދިވެހިން ބައިވެރިވެ، އިސްރާއީލުން ފަލަސްތީނުގެ ޣައްޒާގައި ހިންގަމުންދާ ޖަރީމާތަކާއި ދެކޮޅަށް އަޑުއުފުލި މި ބޮޑު އެއްވުމުގައި އެންމެ ކުރީސަފުގައި ތިބެފައިވަނީ އަންހެނުންނާއި ކުޑަކުދިންނެވެ.

މި އެއްވުމުގައި ތިބި މީހުން ފާޅުކުރަމުން ގޮސްފައިވަނީ ފަލަސްތީނާއި އެކީ އަބަދުވެސް ދިވެހިން ދެމިތިބޭނެކަމާއި، ފަލަސްތީނު އެކަނިވެރިކޮށް ނުލާނެކަމުގެ އިހުސާސްތަކެވެ. އެތައް ސަތޭކަ އާންމުން ބައިވެރިވަމުން ދިޔަ މި މުޒާހިރާގައި ފާޅު ކުރަމުންދިޔަ ޝުއޫރުތަކާއި އަދި ޕޯސްޓުތަކުގައި ލިޔެފައި ޝުޢޫރުތަކުގައި ގޮވާލާފައި ވަނީ އިސްރާއީލުގެ އުފެއްދުންތައް ބޮއިކޮޓް ކުރުމަށާއި އަދި ރާއްޖެއަށް އިސްރާއީލުގެ ރައްޔިތުން ވަނުން މަނާ ކުރުމަށެވެ.

މި އެއްވުމުގައި ބައިވެރިވި ގިނަ މީހުންތިބީ ދިދަތައް އުފުލާލާއިގެންނެވެ. ގިނަ މީހުން ތިބީ ދީނީ ޝުޢޫރުތަކާއި، ޝަހާދަތުގެ ކަލިމަފުޅު ލިޔެފައިވާ ޕޯސްޓުތައްވެސް އުފުލާލައިގެންނެވެ.

މި އެއްވުން ރަސްފަންނުން ފެށިގެން ގޮސް، މަޖީދީމަގުން ހިނގާފައި ގޮސް ނިންމާލާފައިވަނީ ހެންވޭރު ދަނޑަށެވެ. ހެންވޭރު ދަނޑުގައި، ބޮޑު ހިނގާލުން ނިންމާލުމުގެ ކުރިން ވަނީ ފަލަސްތީނުގެ ރައްޔިތުންނަށްޓަކާ ޚާއްސަ ދުއާއެއް ކޮށްފައެވެ.

ރޭ "ރައިޓް މޫވްމަންޓް"ގެ ފަރާތުން ބެއްވި ބޮޑު އެއްވުމުގެ އިތުރުން މީގެ އެއް ހަފްތާކުރިންވެސް މާލޭގެ އާރޓިފިޝަލް ބީޗުގައިވެސް ވަނީ އިސްރާއީލާ ދެކޮޅަށް ބޮޑު އެއްވުމެއް ބާއްވާފައެވެ. އެ އެއްވުމަށްވެސް އެތައް ސަތޭކަ އާންމު ރައްޔިތުން ވަނީ ޖަމާވެފައެވެ.

ހަމައެއާއެކު، އިސްރާއީލުން ފަލަސްތީނަށް ދެމުން އަންނަ އުދުވާނީ ހަމަލާތަކާ ގުޅިގެން ހާލުގައި ޖެހެމުން އަންނަ ފަލަސްތީނުގެ ރައްޔިތުންނަށް އެހީވުމަށްޓަކައި މަމްސް ޖަމިއްޔާ އިން އިސްނަގައިގެން ފަންޑް ރައިޒިން ބޮޑު އިވެންޓެއް މިއަދު ބޭއްވުމަށް މިހާރު ނިންމާފައެވެ.

"މޯލްޑިވިއަން ވިމެން ވިތު ފަލަސްތީން" ނަމުގައި މި އިވެންޓް އޮންނާނީ މިއަދު މެންދުރު ފަހު 2:00 އިން ހަވީރު 6:00 އަށް ހުޅުމާލެ ރުއްގަނޑު 1 ގައެވެ. ޖަމްބަލް ސޭލެއްގެ ގޮތުގައި ކުރިއަށް ގެންދާ މި އެ ސޭލުގައި ވިއްކަނީ އެކި މީހުން ޑޮނޭޓުކޮށްފައިވާ ތަކެއްޗެވެ. މަމްސް ޖަމިއްޔާ އިން ބުނި ގޮތުގައި، ފައިސާ ހޯދުމަށް، މި އިވެންޓް އޮންނަ ތަނުގައި ފުޑް ކޯނާއެއް ވެސް ހުންނާނެއެވެ. އަދި ކުޑަކުދިންނަށް ހާއްސަކޮށްގެން އެކި ކަހަލަ ކުޅިވަރު ކުޅޭނެ ތަންތަން ވެސް ހުންނާނެއެވެ.

އެ ޖަމިއްޔާ އިން ބުނީ މި އިވެންޓުން ލިބޭ ފައިސާ ޖަމާކުރާނީ ފަލަސްތީނަށް އެހީ ފޯރުކޮށްދެމުން އަންނަ ދިވެހި އަމިއްލަ ޖަމިއްޔާއެއް ކަމަށްވާ އިންޓަނޭޝަލް އެއިޑް ކެމްޕެއިން (އައިއޭސީ)ގެ ފަންޑަށް ކަމަށެވެ.

އިސްރާއީލުން ފަލަސްތީނުގެ ޣައްޒާއަށް ދޭންފެށި އުދުވާނީ ހަމަލާތަކާއި ގުޅިގެން ރާއްޖޭގެ މިހާރު ކުރިޔަށްދާ ހަރަކާތްތައް ފުޅާވަމުން ދާއިރު، ފަލަސްތިނަށް ތާއީދު ކުރުމެގޮތުން، މިހާ ބޮޑެތި އެއްވުންތަކެއް ފަހުގެ އަހަރުތަކުގައި މާލޭގައި ބާއްވާފައެއް ނުވެއެވެ. އެހެންނަމަވެސް، ފަލަސްތީނާއެކީ ތިބިކަން ހާމަކޮށް، މީގެކުރިންވެސް ބޮޑެތި އެއްވުންތައް ރާއްޖޭގެ އެކި ކަންކޮޅުތަކުގައި އަބަދުވެސް ގެންގޮސްފައިވާކަން ފާހަގަ ކޮށްލާން ޖެހެއެވެ.

އިސްރާއީލު މީހުން ރާއްޖެ ދަތުރު ނުކުރުމަށް އެގައުމުން ވަނީ އަންގާފަ

އިޒްރޭލުގެ މީހުން ރާއްޖެއަށް ދަތުރު ނުކުރުމަށް އެ ގައުމުގެ ފޮރިން މިނިސްޓްރީން މިހަފްތާގަ ވަނީ އެގައުމުގެ ރައްޔިތުންނަށް އަންގާފައެވެ.

އިޒްރޭލުގެ ފޮރިން މިނިސްޓްރީން ނެރުނު އިންޒާރުގެ މެސެޖްގައި ބުނެފައިވަނީ އިޒްރޭލާ ދެކޮޅު ޝުއޫރުތައް ރާއްޖޭގައި މި ދުވަސްވަރު އިންތިހާއަށް އިތުރުވެފައިވާ ކަމަށެވެ. އެހެންވެ، މި ދަނޑިވަޅުގައި އިޒްރޭލުގެ މީހުން ރާއްޖެ އަށް މި ވަގުތު ދަތުރު ނުކުރުމަށް އެ ބަޔާނުގައި އެ ގައުމުގެ ސަރުކާރުން އެދިފައިވެ އެވެ.

އިސްރާއީލުގެ އަނިޔާވެރިކަން އިންތިހާއަށް، އިއްރާއީލު ބޮއިކޮޓް ކުރުން ނޫން ގޮތެއް ނެތް! 

މި މަހުގެ 7 ވަނަ ދުވަހު ހަމާސް އިން އިސްރާލަށް ދިން ވަރުގަދަ ކުއްލި ހަމަލާތަކާ އެކުގައި އިސްރާއީލަށް ވަނީ ކުއްލި ސިހުމެއް ލިބިފައެވެ. ފަލަސްތީނުގެ ހައްގުގައި މަސައްކަތް ކުރާ ހަމާސް ޖަމާއަތުން ދިން ހަމަލާތަކުގައި އިސްރާއީލުން 1،400 މީހުން ވަނީ މަރާލައިފައެވެ. އޭގެ ތެރޭގައި 300 އަށް ވުރެ ގިނަ އިސްރާއީލް ސިފައިން ހިމެނެއެވެ.

މި ހަމަލާތަކާ ގުޅިގެން އިސްރާއީލުން ރުޅިގަދަވެ، ފަލަސްތީނުގެ ޣައްޒާ އަށް ދަނީ މެދުކެނޑުމެއް ނެތި ބޮން އަޅައި އެތައް އިމާރާތެއް ބިމާ ހަމަ ކުރަމުންނެވެ. ޔަހޫދީންގެ ހަމަލާތަކުގައި ޣައްޒާ އިން މިހާތަނަށް އައިއިރު، 4000 އާ ގާތް ކުރާ އަދަދަކަށް މީހުން ޝަހީދުވެފައިވެއެވެ. އޭގެ ތެރެއިން ދެބައިކުޅަ އެއްބައި މީހުންނަކީ ކުޑަކުދިންނެވެ. ރިޕޯޓުތައް ބުނާ ގޮތުގައި ޝަހީދުވެފައިވާ މީހުންގެ %70 މީހުންނަކީ ކުޑަކުދިންނާއި އަންހެނުންނާއި އުމުރުން ދުވަސްވީ މީހުންނެވެ.