އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ ހަމަލާތަކުގައި ފަލަސްތީނުގެ 4،137 މީހުން ޝަހީދުވެ، 13،000 އަށް ވުރެ ގިނަ މީހުން ޒަޚަމްވެފައިވާ ކަމަށް ފަލަސްތީނުގެ ސިއްހަތާ ބެހޭ ވުޒާރާއިން ބުނެފިއެވެ.
މީގެ ތެރޭގައި މީގެ އެއް ދުވަސް ކުރިން، އިސްރާއީލުގެ އަސްކަރިއްޔާއިން ޣައްޒާގައި ހުރި ހިސްޕިޓަލަށް ބޮންއަޅާ ޝަހީދު ކޮށްލި 400 އަށްވުރެ ގިނަ މީހުންވެސް ހިމެނެއެވެ.
އިސްރާއީލިން ފަލަސްތީނުގެ ޣައްޒާއަށް އުދުވާނީ ހަމަލާ ދެމުންދަނީ، ފަލަސްތީނުގެ ހަމާސް ޖަމާއަތުން އިސްރާއީލަށް ދިން ކުއްލި ހަމަލާއެއްގައި އެގައުމުގެ 1،400 އަށްވުރެ ގިނަ މީހުން މަރާލާ، އިސްރާއީލުގެ 150 އަށްވުރެ ގިނަމީހުން ރަހީނު ކުރުމާއި ގުޅިގެން ބަދަލު ހިފުމުގެ ގޮތުންނެވެ.
ހަމާސްއިން އިސްރާއީލަށް ދިން ޙަމަލާތަކުގައި ފަލަސްޠީނުގެ ހަނގުރާމަވެރި ޖަމާޢަތުން އަތުލައިގަނެ، މިހާރު ޣައްޒާގައި ބަންދުކޮށްފައިވާ މީހުން މިނިވަންކުރުމަށް ރަޝިޔާއިން ހަމާސްއާ ގުޅަމުންދާކަމަށް ރަޝިޔާއިން އިސްރާއީލަށް ކަނޑައަޅުއްވާފައި ހުންނަވާ ސަފީރު ވަނީ ވިދާޅުވެފައެވެ.
އިޒްރޭލުގެ މަންދޫބު އެނަޓޮލީ ވިކްޓޮރޯވްއާ ހަވާލާދީ އިޒްވެސްޓިއާ ނޫހުން ބުނެފައި ވަނީ ހަމާސްގެ މަންދޫބުންނާއެކު ގުޅުން ބަދަހިކޮށްފައިވާ ކަމަށާއި، އެންމެ ފުރަތަމަ މަގުސަދަކީ އިސްރާއީލުގެ އާންމުންނަށް އަމާޒުކޮށް ދިން ޓެރަރިސްޓް ހަމަލާގެ ފުރަތަމަ ދުވަހު ހަމާސްގެ ހަނގުރާމަވެރިން އަތުލައިގަތް މީހުން މިހާރު ތިބި ތަންތަނުން ސަލާމަތް ކުރުން ކަމަށެވެ.
ހަމާސް ހަމާއަތުން މިމަހުގެ 7 ވަނަ ދުވަހު އިސްރާއީލަށް ދިނަ ކުއްލި ހަމަލާއަށްފަހު 200 އެއްހާ މީހުން ވަނީ ރަހީނު ކޮށްފައެވެ. އޭގެ ތެރޭގައި ކުޑަކުދިންނާއި އަންހެނުންވެސް ހިމެނޭކަމަށް ހުޅަނގުގެ ގައުމުތަކުން ބުނެފައި ވެއެވެ.
ހަމާސް ޖަމާއަތުން ބުނެފައިވަނީ އިސްރާއީލުން ޣައްޒާއައް ދެމުންދާ އުދުވާނީ ހަމަލާތަކުގައި، ރަހީނު ކޮށްފައިތިބި ބައެއް މީހުން މަރުވެފައިވާ ކަމުގައެވެ.
