ސަރުކާރު ބަދަލުވުމުގެ އިންތިގާލީ މަރުހަލާގެ މަސައްކަތްތައް ކުރުމަށް އުފައްދާފައިވާ ޓްރާންސިޝަނަލް ކޮމިޓީގެ މަސައްކަތްތައް މާދަމާގެ ނިޔަލަށް ނިންމުމަށް މަސައްކަތްކުރަމުން އަންނަކަމަށް ޑިރެކްޓަރ އޮފް ޓްރާންޒިޝަން އަބްދުއްރަހީމް އަބްދުﷲ ވިދާޅުވެއްޖެއެވެ.
އައު ސަރުކާރު ޙަވާލުވުމުގެ ކުރިން ކުރަންޖެހޭ މަސައްކަތްތައް ކުރުމަށް ސަރުކާރުގެ އެކި އޮފީސްތަކާއި މުވައްސަސާތަކުން ބޭނުންވާ މަޢުލޫމާތު އެއްކުރުމުގެ މަސައްކަތްކުރުމަށް ޓްރާންސިޝަނަލް ކޮމިޓިގެ ފަރާތުން ވަނީ 15 ޓީމެއް އެކުލަވާލާފައެވެ. މީގެތެރެއިން 7 ޓީމަކުން ސަރުކާރު ހިއްސާވާ ކުންފުނިތަކުން މަޢުލޫމާތު އެއްކުރުމަށް ހަމެޖެހިފައިވާއިރު، 8 ޓީމަކުން ސަރުކާރުގެ އެހެނިހެން މުވައްސަސާތަކުން މަޢުލޫމާތު އެއްކުރުމަށް ހަމަޖެހިފައިވާކަމަށް އިންތިޚަބީ ރައީސްގެ އޮފީހުން ބުނެފައިވެއެވެ.
ރޭ ސަންގު ޓީވީގައި ވާހަކަފުޅު ދައްކަވަމުން އަބްދުއްރަހީމް ޢަބްދުﷲ ވިދާޅުވީ، އެކޮމިޓީން އެކި އިދާރާތަކުން ގިނަ މަޢުލުމާތުތަކެއް ހޯދާފައިވާކަމަށެވެ. އެ މަޢުލޫމާތުތަކުގެ އަލީގައި ރިޕޯޓެއް އެކުލަވާލައްވާނެކަމަށާއި، އެއީ ދައުލަތުގެ މިހާރުގެ ހާލަތު ބަޔާންކުރާނެ ރިޕޯޓެއްކަމަށް އަބްދުއްރަހީމް ވިދާޅުވިއެވެ.
އޭނާ ވިދާޅުވީ އެކޮމިޓީގެ ހުރިހާ މަސައްކަތެއް ނިންމުމަށް އަމާޒުހިފީ މިމަހުގެ 15އަށްކަމަށާއި، ނަމަވެސް އެ މުއްދަތަށް މަސައްކަތްތައް ނުނިމުމުން، މާދަމާއަށް އެ މަސައްކަތް ނިންމުމަށް އަމާޒުހިފާފަިވާކަމަށެވެ.
ކަނޑައެޅި ތާރީޚަށް އެ މަސައްކަތްތައް ނުނިމުނީ، ބައެއް އިދާރާތަކުން ދޭންޖެހޭ އެއްބާރުލުން ނުލިބިގެންކަން އަބްދުއްރަހީމް ފާހަގަކުރެއްވިއެވެ. ނަމަވެސް އެއީ ކޮން އިދާރާތަކެއްކަމެއް ވިދާޅެއް ނުވެއެވެ.
އިންތިޚާބީ ރައީސްގެ އޮފީހުން މީގެ ކުރިން ބުނެފައިވަނީ ޖުމްލަކޮށް ސަރުކާރު އިދާރާތަކުން އެއްބާރުލުން ލިބޭކަމަށެވެ.
ޢަބްދުއްރަހީމް ވަނީ އައު ސަރުކާރެއް ފެށޑުމުގެ ކުރިން ދައުލަތުގެ ހާލަތު ވަޒަން ކުރުމަށް ހޯދަންޖެހޭ މައުލޫމާތު ހޯދުމަކީ ބުރަކެއްގެ ގޮތުގައި ފާހަގަކުރައްވާފައެވެ.
