މާލެއަށް ގެންނަން ބޭނުންވާ ބަދަލު ގެނައުމަށް މިސަރުކާރުން ހުރަސްއެޅިނަމަވެސް، އެމަނިކުފާނުގެ ވެރިކަމުގައި، މާލޭ ރައްޔިތުން ބޭނުންވާ ކަންކަން ހަގީގަތަކަށް ހައްދައިދެއްވާނެކަމަށް މާލޭގެ މޭޔަރު އަދި އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ މަޤާމަށް އިންތިޚާބުވެވަޑައިގަތުމާއި ގުޅިގެން، މާލޭގެ މޭޔަރުކަމުގެ ހައިސިއްޔަތުން ކައުންސިލްގެ މުވައްޒަފުންނާއި ބައްދަލުކުރެއްވުމަށް ބޭއްވެވި ވަދާޢީ ރަސްމިއްޔާތުގައި ވާހަކަފުޅު ދައްކަވަމުން ޑރ. މުޙައްމަދު މުޢިއްޒު ވިދާޅުވީ، 2021 ވަނަ އަހަރުގެ މެއި 17ގައި މާލެ ސިޓީ ކައުންސިލްގެ 4 ވަނަ ދައުރު ފަށްޓަވައިގެން މިހާތަނަށް އާއިރު ކުރެއްވި ކޮންމެ ކަމެއް ހަގީގަތަކަށް ވެގެންދިޔައީ މާލެ ސިޓީ ކައުންސިލްގެ ބުރަ މަސައްކަތުންކަމަށެވެ.
ނިމިދިޔަ ރިޔާސީ އިންތިޚާބުގެ ފުރަތަމަ އަދި ދެވަނަ ބުރުގައިވެސް މާލޭގެ ރައްޔިތުން އެމަނިކުފާނަށް ވޯތު ދެއްވި މައިގަނޑު ސަބަބަކީވެސް، މާލޭގެ ކަންކަން ފުރިހަމައަށް ކުރެއްވުމަށް މާލެ ސިޓީ ކައުންސިލްގެ މުވައްޒަފުން ކުރެއްވި މިންނެތް މަސައްކަތްކަމަށްވެސް އިންތިޚާބީ ރައީސް ވިދާޅުވިއެވެ.
އަޅުގަނޑުމެން ދެ އަހަރާ މަސްތަކެއް ވަންދެން މި މާލޭގެ ކަންކަން ރަނގަޅަށް ގެންދިއުމަށްޓަކައި ބުރަ މަސައްކަތްތަކެއް ކުރިން. ގިނަ ގޮންޖެހުންތައް ކުރިމަތިވެގެން ދިޔަ. އެގޮންޖެހުންތައް އެގޮތަށް ނައިނަމަ މި މާލޭގެ ކަންތައްތައް މާ ފުރިހަމައަށްވެފައި ހުންނާނީ. ޔަގީނުން ވެސް މަގުތައް ހުންނަނީ ހެދިފައި. ޔަގީނުން ވެސް ޕާކިން މަލްޓި ސްޓޯރީ އެތައް ބިލްޑިންގެއް އެޅި، ޕާކިންގެ މައްސަލައަށް ބޮޑު ހައްލެއް އޮންނާނީ ގެނެވިފައި.
– އިންތިޚާބީ ރައީސް ވިދާޅުވިއެވެ.
މުޢިއްޒު ވިދާޅުވީ މާލެއަށް ގިނަގުނަ ކަންކަން ކުރައްވަން ބޭނުންފުޅުވިކަމަށާއި، ނަމަވެސް މާލޭގެ ކަންކަން ކުރުމުގައި އެނެމެ ފަހު ހުއްދަ ދޭންޖެހޭ ބޭފުޅުން އެ ހުއްދަތައް ނުދެއްވުމުގެ ސަބަބުން، ކައުންސިލަށް ވީވަރުން ކަންކަން ކުރެއްވީކަމަށެވެ.
އިންތުޚާބީ ރައީސް ވަނީ މިހާރުގެ ސަރުކާރުން މާލެއަށް ކަންކަން ކުރުމަށް ކައުންސިލަށް އެއްބާރުލުން ނުދިންނަމަވެސް، އެމަނިކުފާނުގެ ސަރުކާރުގައި މާލޭ ރައްޔިތުން ބޭނުންވާ ކަންކަން ފުރިހަމަކޮށްދެއްވާނެކަމުގެ ޔަޤީންކަން ދެއްވާފައެވެ.
