ރާއްޖޭގައި ތިބި އިންޑިއާ ސިފައިން ބޭލުމުގެ މަސައްކަތް ވެރިކަމުގެ ފުރަތަމަ ދުވަހުން ފެށިގެންވެސް ފަށްޓަވާނެކަމަށާއި، އުންމިދަކީ ހަފްތާއެއް ދުވަހުގެ ތެރޭގައި އެމީހުން ރާއްޖެއިން ބޭލުންކަމަށް އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ފުރަތަމަ ފަހަރަށް ބޭރުގެ މީޑިއާއަކަށް ދެއްވި އިންޓަރވިއު، އަލްޖަޒީރާއަށް ދެއްވަމުން އިންތިޚާބީ ރައީސް ވިދާޅުވީ، ޑިޕްމޮލެޓިކް އުސޫލުން، ވެރިކަމުގެ ފުރަތަމަ ދުވަހުވެސް އިންޑިއާ ސިފައިން ރާއްޖެ ދޫކޮށް ދިއުމަށް އެދޭނެކަމަށެވެ. ޑިޕްލޮމެޓިކް އުސޫލުން އެކަން ކުރައްވާނެކަމަށާއި، އުއްމީދަކީ އެކަން ހާސިލްވާނެކަންކަމަށް މުޢިއްޒު ވިދާޅުވިއެވެ.
ރާއްޖޭގައި ތިބީ ކިހާ ސިފައިންނެއްކަން އެނގިވަޑައި ނުގަންނަވާކަން ފާހަގަކުރައްވާ މުޢިއްޒު ވިދާޅުވީ އިންޑިއާ ސިފައިން ރާއްޖޭގައި ޤާއިމްވެ ތިބިކަމަށް ސަރުކާރުން އެއްބަސްވެފައިވާކަމަށެވެ. އަދި ރާއްޖޭގައި ތިބި އިންޑިއާ ސިފައިންގެ ޢަދަދު ހާމަނުކުރުމަށް ސުޕްރީމް ކޯޓުގައިވެސް ސަރުކާރުން އެދިފައިވާކަން މުއިއްޒު ފާހަގަކުރެއްވިއެވެ.
މުއިއްޒު ވިިދާޅުވީ، މިހާރުގެ ސަރުކާރުގެ ޚާރިޖީ ސިޔާސަތުގެ ސަބަބުން ރާއްޖޭގެ މިނިވަންކަމާއި ސިޔާދަތަށް އުނިކަން އަންނަކަމަށެވެ. ދެވަނަ ދައުރެއް މިސަރުކާރަށް ރައްޔިތުން ދޭން ބޭނުންނުވީވެސް އެ ސަބަބާއިހުރެކަމަށްވެސް މުއިއްޒު ވިދާޅުވިއެވެ. ރާއްޖޭގައި އެއްވެސް ޤައުމެއްގެ ސިފައިން ޤާއިމްވެ ތިބުމަކީ އެކަމުގެ ސަބަބުން ރައްޔިތުންނަށް ނުރައްކާތެރިކަން އިހްސާސްވާކަމެއްކަމަށްވެސް އިންތިޚާބީ ރައީސް ވިދާޅުވިއެވެ.
އިންޑިއާ ސިފައިން ރާއްޖެއިން ބޭރުމަށް މަސައްކަތް ކުރެއްވިނަމަވެސް އެޤައުމާއެކު ރާއްޖެއިން ދަމަހައްޓަމުން އައި ޒަމާންވީ ގުޅުމަށް ބުރުލެއް ނާންނާނެކަމުގެ ޔަޤީންކަން އޮތްކަމަށްވެސް މުޢިއްޒު ވިދާޅުވިއެވެ. އެގުޅުން ދެމެހެއްޓުމުގެ މުހިންމުކަން ފާހަގަކުރައްވާ މުއިއްޒު ވަނީ ތަރައްގީގެ މަޝްރޫއުތަކަށް އިންޑިއާ އިން ދޭ އެހީތެރިކަން ބަލައިގަންނަކަމަށްވެސް ވިދާޅުވެފައެވެ. ރާއްޖޭގައި އިންވެސްޓްމަންޓް އިތުރުކުރުމަށާއި، ވިޔަފާރީގެ މުއާމަލާތްތަކަށް އިންޑިއާއިން ޝަޢުގުވެރިވާކަމަށްވެސް މުއިއްޒު ވިދާޅުވިއެވެ.
އެކަންކަން ކުރެއްވޭކަމުގެ ޔަޤީންކަން، ރާއްޖޭގައި ހުންނަވާ އިންޑިއާ ސަފީރު މުނޫ މަހާވަރާއި ބައްދަލުކުރައްވާ ކުރެއްވުނު މަޝްވަރާތަކުންވެސް ލިބިވަޑައިގެންނެވިކަމަށް އިންތިޚާބީ ރައީސް ވިދާޅުވިއެވެ. އެގޮތުން ރާއްޖޭޣެ ގިނަ ލޯނުތައް ނަގާފައި ހުރީ އިންޑީއާއިންކަމަށާއި، އެ ލޯނުތައް ރީފައިނޭންސް ކުރާނެ ގޮތްތަކެއް ހޯދަންޖެހޭކަންވެސް މުއިއްޒު ފާހަގަކުރެއްވިއެވެ. އެ ލޯނުތައް އަނބުރާ ދެއްކޭނެ ފަސޭހަ ގޮތެއް ހަމަޖައްސައިދެއްވާނެކަމަށް ސަފީރު ވިދާޅުވިކަމަށްވެސް މުއިއްޒު ފާހަގަކުރެއްވިއެވެ.
ޗައިނާއާއެކު އަސްކަރީއ ެއްބަސްވުންތަކެއް ހަދާފާނެތޯ ސުވާލުކުރުމުން މުއިއްޒު ވިދާޅުވީ، އެއްވެސް ޤައުމެއްގެ އަސްކަރިއްޔާއިން ރާއްޖޭގައި ޤާއިމްވެ ތިބުމަށް އެއްވެސް މުއާމަލާތެއް ނުކުރައްވާނެކަމަށެވެ. ޗައިނައަކީ ޤައުމުތަކުގެ ސިޔާދަތަށް އުނިކަން އަންނަގޮތަށް އަމަލުކުރާނެ ޤައުމެއް ނޫންކަމަށްވެސް މުއިއްޒު ވިދާޅުވިއެވެ.
ޗައިނާއިން ރާއްޖެއާ އަދި އެހެން ގައުމުތަކާއެކުވެސް ގެންގުޅެނީ ރަނގަޅު ސިޔާސަތެއް. އެހެން ގައުމުތަކުގެ އެތެރޭގެ ކަންކަމަކާ ޗައިނާއިން ނުބެހޭ. އެކަމާމެދު ސުވާލެއް ނުއުފެދޭ.
– އިންތިޚާބީ ރައީސް ވިދާޅުވިއެވެ.
ކުރިއަށް އޮތްތަނުގައިވެސް ޗައިނާއާއެކު ގާތް ގުޅުމެއް ބާއްވާނެކަމަށްވސް މުއިއްޒު ވިދާޅުވިއެވެ. ރާއްޖެއިން އަބަދުވެސް ގެންގުޅޭނީފުރަތަމަރާއްޖެ ނުވަތަ "ޕްރޯ މޯލްޑިވްސް" ސިޔާސަތުކަމަށްވެސް އިންތިޚާބީ ރައީސް ޑރ.މުޙައްމަދު މުއިއްޒު ވިދާޅުވިއެވެ.
