ފާއިތުވި 4 އަހަރެއްހާ ދުވަހުގެ ތެރޭގައި އިސްރާޢީލުން ރާއްޖެއަށް ބައި ލައްކައެއްހާ ފަތުރުވެރިން ޒިޔާރަތްކޮށްފައިވާކަމަށް ތަފާސް ހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އޮންލައިން ނޫސް "މިނޫސް" އާއި ހިއްސާކޮށްފައިވާ ތަފާސް ހިސާބުތައް ދައްކާގޮތުން އެންމެ ގިނައިން އިސްރާޢީލުން މީހުން ރާއްޖެ އައިސްފައިވަނީ މިއަހަރުއެވެ.
2018 – 7,748 މީހުން
2019 – 10,234 މީހުން
2020 – 1,782 މީހުން
2021 – 12,161 މީހުން
2022- 15,748
2023 މިހާތަނަށް- 18،000އަށް ވުރެ ގިނަ މީހުން
އިސްރާއީލުގެ ގިނަ ރައްޔިތުން ދެ ޕާސްޕޯޓް ގެންގުޅެއެވެ. އެއީ ބައެއް ޤައުމުތަކަށް އިސްރާޢީލުގެ ޕާސްޕޯޓުގައި ދަތުރު ނުކުރެވޭތީއެވެ. އެގޮތުން ގިނަ މީހުން ޔޫރަޕްގެ ޕާސްޕޯޓް ގެންގުޅެއެވެ. ރާއްޖެއަށް އިސްރާޢީލުގެ ފަތުރުވެރިން އައިސްފައިވަނީ އެހެން ޤައުމުތަކުގައި ޓްރާސިޓްކުރުމަށްފަހުއެވެ.
އިސްރާއީލުން ރާއްޖެއަށް ސީދާ ދަތުރުތަކެއްނޯވެއެވެ.
އިސްރާޢީުލުން ރާއްޖެއަށް ފަތުރުވެރިން ދަތުރުކޮށްފައިވާއިރު، އެޤައުމާއި ދެކޮޅަށް ދަތިކުރުމުގެ ފިޔަވަޅުތައް އެޅުމަށް ގޮވާލާ މަޖިލީހަށް ގަރާރެއް ހުށައަޅާފައެވެ.
ހައްދު ފަހަނަ އަޅާފައިވާ އިޒްރޭލް މީހުންނަށް ރާއްޖެއަށް އެތެރެ ނުވެވޭ ގޮތް ހަދައި އެ ގައުމުގެ އުފެއްދުންތަކާއި އެ ގައުމުން އެކްސްޕޯޓް ކުރާ ތަކެތި ރާއްޖެއަށް އެތެރެ ކުރުން މަނާ ކުރަން ގޮވާލައި ޤަރާރެއް ހުށައެޅީ ވިލިނގިލި ދާއިރާގެ މެންބަރު ސައުދު ހުސައިން އެވެ.
މި ޤަރާރުގައި ބުނެފައިވަނީ 1967 ވަނަ އަހަރު ކަނޑައެޅި ފަލަސްތީނުގެ ސަރަޙައްދީ އިމުގެ ތެރޭގައި ފަލަސްތީނުގެ މިނިވަން ދައުލަތެއް ގާއިމްކޮށް، އެ ދައުލަތުގެ ވެރިރަށަކީ އިރުމަތީ ގުދުސް ކަމަށް ދިވެހިރާއްޖެއިން އަބަދުވެސް ޤަބޫލުކުރާކަމަށެވެ. އިސްރާއީލުން ފަލަސްތީނުގެ އިތުރު ބިންތަށް ފޭރިގަނެ އެބިންތަކަށް ވެރިވުމަކީ ފަލަސްތީނާއި އިޒްރާއީލު ސުލްޙަވެ ވަކި ދެ ދައުލަތެއް ގާއިމްކުރުމަށް ކުރާ މަސައްކަތަށް އެޅޭ އިތުރު ހުރަހެއްކަމަށް މިޤަރާރުގައި ވަނީ ބުނެފައިވެއެވެ.
ހައްދު ފަހަނަ އަޅާފައިވާ ޔަހޫދީ ދައުލަތް ކަމުގައިވާ އިޒްރޭލުން ފަލަސްތީނުގެ އެކި ސަރހައްދުތަކަށް ދެމުންގެންދާ ނުރައްކާތެރި އުދުވާނީ ހަމަލާތަށް ކުއްވެެރިކޮށް އެ ހަމަލާތަށް ވަގުތުން ހުއްޓާލުމަށް ގޮވާލާފައެވެ. ފަަލަސްތީނުގެ ރައްޔިތުނަށް ދެމުން ގެންދާ ލާއިންސާނީ އަނިޔާތައް ހުއްތާލުމަށާއި، އެ ރައްޔިތުންގެ އިންސާނީ ހައްގުތައް ކަށަވަރު ކުރުމަށް އެ ގަރާރުގައި ބުނެފައި ވެއެވެ.
މި ހަނގުރާމާގައި ފަލަސްތީނުގެ ރައްޔިތުންނަށް ފެނާއި، ކަރަންޓާއި، ބޯފެނާއި އަދި ސިއްހީ ފަރުވާގެ ހިދުމަތް ހުއްޓުވާލާފައި އޮތުމާއި، ކާބޯތަކެތި ގާޒާއަށް އެތެރެވިޔަ ނުދިނުމަށް ގާޒާ ވަށައިގެންވާ ހުރިހާ ޗެކް ޕޮއިންޓްތަކާއި ގޭޓްތައް ބަންދުކޮށްފައި އޮތް އޮތުން ސައުދު ހުށަހެޅުއްވި ގަރާރުގައި ވަނީ ކުށްވެރި ކޮށްފައެވެ.
ހަމައެއާއެކު އެ ގައުމުގެ ކުޑަކުދިންނާއި އަންހެނުންނާއި ބަލި މީހުން ހިމެނޭ ގޮތަށް އެތައް މިލިއަން ފަލަސްތީނުގެ ރައްޔިތުންގެ އިންސާނީ ހައްގުތައް ނިގުޅައިގަތުމަށް އިޒްރޭލުން ހިންގަމުން ދަނީ ބޮޑު ޖަރީމާއެއް ކަމަށާއި އެކަންތައްތައް ހުއްޓުވުމަށް އެ ގަރާރުގައި ގޮވާލާފައި ވެއެވެ. އަދި ފަލަސްތީންގެ ރައްޔިތުންގެ އަތުން ނިގުޅައިގެންފައިވާ ހައްގުތައް ފޯރުކޮށް ދިނުމުގެ އިންތިޒާމް ބައިނަލް އަގްވާމީ މުޖުތަމައު ގުޅިގެން ހަމަޖެއްސުމަށް އދ ގެ މެންބަރު ހުރިހާ ގައުމުތަކަށް ދިވެހިރާއްޖޭގެ ގާނޫނު ހަދާ މަޖިލީހުން ގޮވާލައި އެ ގަރާރު ފާސް ކުރުމަކީ މުހިއްމު ކަމެއް ކަމަށް ސައުދު ވިދާޅުވެއެވެ.
މީގެ އިތުރުން އިޒްރޭލާއި ރާއްޖޭއާއެކު އެއްވެސް ގުޅުމެއް އުފެދިފައިވާ ނަމަ އެ ފަދަ އެންމެހާ ގުޅުންތައް ވަގުތުން ސަސްޕެންޑް ކުރުމަށާއި ފަލަސްތީންގެ ހުރިހާ ބިންތަކުން އިޒްރޭލުން ފައިބާ، މެދުއިރުމަތީގައި ސުލްހަ ގާއިމް ކުރެވެން ދެން މި ފިޔަވަޅުތައް ދެމެހެއްޓުމަކީ މުހިއްމު ކަމެއް ކަމަށް ވެސް ސައުދު ވިދާޅުވިއެވެ.
ދިވެހިރައްޔިތުންނަކީ އަބަދުވެސް ފަލަސްޠީންގެ ލޮބުވެތި އަޚުންނާއި އުޚްތުންނަށް ލޯބިކުރާ އަދި އަޚްވަންތަ ކަމާއި އުޚުއްވަތްތެރިކަން ދެމެހެއްޓުމަށް ކެނޑިނޭޅި އެތަކެއް މަސައްކަތްތަކެއްކުރާ ބަޔަކަށް ވީހިނދު، މިފަދަ ހިތްދަތި ވަގުތެއްގައި ދިވެހި އެންމެހާ ލޮބިވެތި ރައްޔިތުން ތިއްބެވީ ފަލަސްޠީންގެ އަނިޔާ ލިބެމުންދާ ރައްޔިތުންނާއި އެކުގައިކަން ދިވެހިރާއްޖޭގެ ރައްޔިތުންގެ މަޖުލީހުން ހާމަކުރުމަކީ ފަލަސްޠީނުގެ ބިންތަށް ފޭރިގަތުން ހުއްޓުވުމާއި، ފަލަސްޠީނުގެ މިނިވަންކަމާއި، ފަލަސްޠީނުގެ ރައްޔިތުންނަށް އިންސާނީ ހައްޤުތަށް ކަށަވަރު ކޮއްދިނުމަށް މަސައްކަތްކުރަމުންދާ ގައުމުތަކާއި، ބައިނަލްއަގުވާމީ ޖަމިއްޔާ ޖަމާއަތްތަކަށް އިތުރު ކުރިއެރުމަކަށް ވެގެންދާނެ މުޙިއްމުކަމެއް ކަމަށް ވެގެންދާނެކަމަށްވެސް މިޤަރާރުގައި ބުނެފައިވެއެވެ.
