ފާއިތުވި ހަފްތާގެ ހޮނިހިރު ދުވަހު ހަމާސް ޖަމާއަތުން އިސްރާއީލަށް ދިން ކުއްލި ހަމަލާގައި މަރުވި ތައިލެންޑުގެ ރައްޔިތުންގެ އަދަދު 24 އަށް އަރާފައިވާ ކަމަށް ތައިލެންޑުގެ ޚާރިޖީ ވުޒާރާއިން ބުނެފިއެވެ. އަދި ޒަޚަމްވި ތައިލެންޑުގެ މީހުންގެ އަދަދު 16 އަށް އަރާފައިވާ ކަމަށާއި ތައިލެންޑުގެ އިތުރު 16 މީހަކު ހަމާސް ޖަމާއަތުން ރަހީނުކޮށްފައިވާ ކަމަށް ބެލެވޭ ކަމަށް ވެސް އެ މިނިސްޓްރީން ބުންޏެވެ.
ހަމާސް ޖަމާއަތުން މަރާލައި އަދި އޭގެ އިތުރުން އަތުލައިގަތް ގިނަ ބިދޭސީންގެ ތެރޭގައި އިސްރާއީލުގެ ދަނޑުވެރިކަމާއި އިމާރާތް ކުރުމާއި ސިއްހީ ދާއިރާގައި މަސައްކަތް ކުރާ އޭޝިއާގެ ބިދޭސީ މަސައްކަތްތެރިން ވެސް ހިމެނެ އެވެ. މީގެ ތެރެއިން ގިނަ މަސައްކަތްތެރިންނަކީ ފަގީރު، ރަށްފުށުގެ އާއިލާތަކަށް ނިސްބަތްވާ އަދި އިސްރާއީލާއި ފަލަސްތީނުގެ ބިންތަކާ އާއިލީ ގުޅުމެއް އޮންނަ ބައެއް ނޫންކަމަށްވެސް ރަސްމީ ބައެއް ފަރާތްތަކުން ވަނީ ބުނެފައެވެ.
ފާއިތުވި 7 ދުވަހު ޣައްޒާއަށް އިސްރާއީލުން ދޭންފެށި ހަމަލާތަކަށް ހުއްޓުމެއް އައިސްފައި ނުވާއިރު، އިސްރާއީލުން ވަނީ ޣައްޒާއަށް ކާނާއާއި ތެލާއި އަދި ފެން ސަޕްލައި ކުރުން ހުއްޓުވާފައެވެ. އަދި އިސްރާއީލުން ބުނެފައިވަނީ އަސާސީ ޚިދުމަތްތައް ޣައްޒާގެ ރައްޔިތުންނަށް ދެން ލިބިގެންދާނީ ހާމަސް ޖަމާއަތުން ރަހީނު ކޮށްފައިވާ އިސްރާއީލުގެ ރައްޔިތުން ދޫކޮށްލުމުން ކަމުގައެވެ.
އިސްރާއީލުގެ އަސްކަރިއްޔާއިން މިހާރުވަނީ ފަލަސްތީނުގެ ގާޒާގެ އުތުރުގައި ދިރިއުޅެމުންދާ 1.1 މިލިއަން ރައްޔިތުން އެ ސަރަހައްދު ދޫކޮށް ދިއުމަށް 24 ގަޑިއިރުގެ މުހުލަތެއް ދީފިއެވެ. އެހެންނަމަވެސް، ޣައްޒާގެ އުތުރުން 1.1 މިލިއަން މީހުން ގެދޮރު ދޫކޮށް ދިއުމަށް އިންޒާރުދީ އިސްރާއީލުނު ނެރުނު އަމުރަކީ ހަނގުރާމައިގެ އުސޫލާއި، އިންސާނިއްޔަތާ ހިލާފު އަމުރެއް ކަމުގައި އދ.ގެ އެއިޑް ޗީފް މާޓިން ގްރިފިތުސް ވަނީ ވިދާޅުވެފައެވެ.
ހަމާސް ޖަމާއަތުން އިސްރާއީލަށް ދިން ކުއްލި ހަމަލާތަކަށްފަހު އިސްރާއީލުގެ އެތައްހާސް ސިފައިންނެއް މިހާރުވަނީ ޣައްޒާގެ ބޯޑަރު ކައިރިއަށް ޖަމާކޮށްފައެވެ. މަސްރަހު ދިރާސާކުރާ ފަތާތްތަކުން ބުނަމުންދަނީ އިސްރާއީލުން ތައްޔާރުވަމުން ދަނީ އެއްގަމުން މަގުން ޣައްޒާއަށް އެރުމަށް ކަމުގައެވެ.
