ރާއްޖޭގެ އުތުރުގެ ރަށްތަކަށް ވިއްސާރަވެ ބައެއް ރަށްރަށުގައި ފެންބޮޑުވެ ގެތަކަށް ފެންވަދެއްޖެއެވެ.
މޯލްޑިވްސް މީޓިއަލޮޖިކަލް ސެންޓަރު (މެޓު) އޮފީހުން ބުނީ ރާއްޖެއަށް މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަކަމަށެވެ. މި ވިއްސާރާގައި ހއ.ދުއްދުއާއި ހދ.ފިނޭގައި ވަނީ ވަރަށް ބޮޑަށް ފެންބޮޑުވެ ގެތަކަށް ފެންވަދެފައެވެ. އެރަށްރަށޫގައި ޕަންޕު ބޭނުންކޮށްގެން ފެން ހިންދުމުގެ މަސައްކަތް ކުޅުއްދުއްފުށީގައި ތިބި އެމްއެންޑީއެފްގެ ފަރާތުން އަންނަނީ ކުރަމުންނެވެ.
މި ދެރަށުގެ އިތުރުން ހޯރަފުށި، ކެލާ، މުރައިދޫ، ތަކަންދޫ، ތުރާކުނު އުތީމުގައިވެސް ވަނީ ފެންބޮޑުވެފައެވެ.
އެންޑީއެމްއޭއިން ބުނީ، ފެންބޮޑުވެ ގޭގެއިން މީހުން ބަދަލުކުރަންޖެހޭ ޙާލަތަށް އެއްވެސް ރަށެއްގައި ގޮސްފައި ނުވި ނަމަވެސް ގޭގެއަށް ފެން ވަދެ، ބައެއް ކަހަލަ ގެއްލުންތައް ވެގެން އަންގާފައިވާކަމަށެވެ. ގެއްލުމުގެ ތަފްޞީލު އެނގޭނީ ފެން ހިންދުމުގެ މަސައްކަތަށްފަހު، އެކަމާއި ގުޅޭ ރިޕޯޓް ކައުންސިތަކުން ހެދުމުންކަމަށް ބުންޏެވެ.
މެޓުން ވަނީ ކުރއިަށް އޮތް ވަގުތުތަކުގައިވެސް އުތުރަށް ވިއްސާރަ ވާނެކަމަށް ލަފާކޮށްފައެވެ. މެޓުގެ ރެކޯޑުތައް ދައްކާގޮތުގައި އުތުރުގެ ބައެއް ރަށްތަކަށް 40 މިލިމީޓަރަށް ވާރޭ ވެހިފައިވެއެވެ.
