މަސައްކަތްކުރައްވާނީ ރައްޔިތުންގެ މަޖިލީހުގެ ސުޕަ މެޖޯރިޓީއެއް ހޯއްދެވުމަށްކަމަށް އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
ސަންގު ޓީވީން މިރޭ ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުން އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވީ، މަޖިލީހުގެ ބޮޑު އަޣްލަބިއްޔަތެއް ހޯއްދެވުމަށް ޕީޕީއެމް ޕީއެންސީއާއި، އެކޯލިޝަންގައި ހިމެނޭ ޕާޓީތަކާއެކު މަސައްކަތްކުރައްވާނެކަމަށެވެ. އެގޮތުން އަންނަ މަޖިލީހުގައި 93 މެންބަރުން އިންތިޚާބުކުރާއިރު، މަދުވެގެން 60 މެންބަރުން އެކޯލިޝަނުން ކާމިޔާބުކުރުމަށް މަސައްކަތްކުރައްވާނެކަމަށް އިންތިޚާބީ ރައީސް ވިދާޅުވިއެވެ.
ބޮޑަށް ރައްޔިތުން ބަލައިގަންނަ ބޭފުޅުންނަށް ވާން ބޭނުން. އަދި އަންހެން ބޭފުޅުން އަޅުގަނޑު ބޭނުން ވަރަށް ގިނަ ކުރަން. އެންމެ ރަނގަޅު ގޮތަކީ ތިންބައިކުޅަ އެއްބަޔަކީ އަންހެން ބޭފުޅުންނަށް ވާން. މިވަގުތު އެކަހަލަ ޤާނޫނެއް ނެތް. ކައުންސިލް ޤާނޫނުގަ އެބައޮތް. އެކަމު މަޖިލިސް ޤާނޫނުގައި ނެތް.
– އިންތިޚާބީ ރައީސް ވިދާޅުވިއެވެ.
ކޮންމެގޮތެއްވިޔަސް އަންހެން ބޭފުޅުން ނެރުމަށް ހިތްވަރު ދޭންޖެހޭކަމަށާއި، އެކޯލިޝަންގެ ޕްރައިމަރީގައި ވީހާވެސް ގިނައިން އަންހެނުން ބައިވެރިކުރަން މަސައްކަތްކުރައްވާނެކަމަށް ޑރ.މުޢިއްޒު ވިދާޅުވިއެވެ.
މުޅި މަޖިލީހުގެ ތިންބައިކުޅަ ދެބައި ހޯދުމަކީ އަމާޒުކަމަށާއި، އެކަން ހާސިލްވާނެކަމަށްވެސް އިންތިޚާބީ ރައީސް ވިދާޅުވިއެވެ. މަޖިލިސް އިންތިޚާބު އޮންނާނީ އަންނަ އަހަރުގެ އޭޕްރީލް މަހުއެވެ.
ޖެނުއަރީގައި އޮންނަ މޭޔަރުގެ އިންތިޚާބަށްވެސް މަސައްކަތްކުރައްވާނެކަމަށާއި، ރަނގަޅު ކެންޑިޑޭޓަކާއެކު މާލޭގެ ރައްޔިތުންގެ ތާޢީދާއެކު އެ ގޮނޑި ހާސިލްކުރެވޭނަކަމަށްވެސް އިންތިޚާބީ ރައީސް ވިދާޅުވިއެވެ. މޭޔަރުގެ އިންތިޚާބު ޖެނުއަރީ 17ގައި ބޭއްވުމަށް މަސައްކަތްކުރާކަމަށް އިލެކްޝަންސް ކޮމިޝަނުން ވަނީ ބުނެފައެވެ.
