އިންޑިއާގެ މަޤްބޫލު ރިއަލިޓީ ޝޯވ "ބިގް ބޮސް 14″ ގެ ބައިވެރިއެއްކަމަށްވާ މަޝްހޫރު ޓީވީ އެކްޓްރެސް ޖޭސްމިން ބާސިން، އެނާއާއި ވަރަށް ގާތް އެކުވެރިކަމެއް އޮންނަ އަލީ ގޯނީ އާއި ލޯބީގެ ގޮތުން ގުޅިގެން އުޅޭކަމަށް ޝޯވްގެ ބައިވެރިންނާ ދެއްކި ވާހަކައެއްގައި ދާދިފަހުން އެއްބަސްވެއްޖެ އެވެ.
މި އެޕިސޯޑު ފެށިގެންދަނީ އަލަށް ބިގް ބޮސްގެ ގެއަށް އައި ބައިވެރިން ކަމުގައިވާ ކަޝްމީރާ ޝާހް، މަންނޫ ޕަންޖާބީ އަދި ވިކާސް ގުޕްތާ، އައިގޮތަށް އައިސް ބައިވެރިންނާއި ސުވާލުކޮށް އެމީހުންގެ ކަންތަކާއި މެދު ޖޯކު ޖަހަން ފަށާތަނުންނެވެ. އެއަށްފަހު، އީޖާޒް ޚާން ކާން އިންދާ ކަޝްމީރާ ގޮސް އޭނާ "ބިގްބޮސް"ގެ ގެއިން ނުފެންނަކަމަށާއި އެހެންވެ އުޅޭކަމަށްވެސް ހީނުވާކަމަށްބުނެއެވެ.
އަދި މަންނޫ ޕަންޖާބީ ވެސް އަބިނަވްއާއި ރުބީނާ ގިނައިން ފެންނަނީ ކާން ތިއްބައި ކަމަށް އަބިނަވް އާއި ދިމާލަށްބުނެ ޖޯކުޖަހާފައި ވެއެވެ. މިގެ އިތުރުން އެންމެން އެކަކު އަނެކަކާއި ދުރުގައި ތިބެނީ ކީއްވެތޯ ސުވާލުކޮށް، އެއްވެސް ކަމެއް ގޭތެރޭގައި ނުހިނގާކަމަށް ވިކާސް ބުނެއެވެ. މިހާތަނަށް އައިއިރު ކަންތައްވީގޮތް އަބިނަވް ކިޔާ ދިނުމުން ކަޝްމީރާ އަބިނަވްއާއި ރުބީނާއަށް އަމިއްލައަށް ކުޅޭ ގޭމްއެއްގައި ވިސްނަންޖެހޭނީ އަމިއްލަ ނަފުސަށްކަމަށް ބުނެއެވެ.
އެއަށް ފަހު ވިކާސް ޖޭސްމިންއާއި ސުވާލުކުރުމުން ހުރިހާ ބައިވެރިން އެދެމީހުންގެ ވާހަކައަށް ސަމާލުކަންދޭތަންފެނެއެވެ. އަދި ކަޝްމީރާ ޖޭސްމިން އާއި ދިމާއަށް އަލީ ގޯނީ "ބިގް ބޮސް 14″ އަށް އައީވެސް ޖޭސްމިންއަށްޓަކައި ކަމަށާއި ގެއިން ދިޔައީވެސް ޖޭސްމިން އާއި ހެދިކަމަށް ބުނެއެވެ.
މިކަމަށް ރައްދު ދެމުން ޖޭސްމިން ބުނީ އަލީ އާއި އޭނާގެ އޮތް ގުޅުން ގޭމާއި އަޅާކިޔުމަކީ އޭނާ އެހާ ހިތްހަމަޖެހޭކަމެއް ނޫންކަމަށެވެ. އަދި އެއަށް ފަހު ދެމީހުންގެ މެދުގައި ހިނގި ބަހުސް އެއްގައި ޖޭސްމިން ވަނީ އަލީއާ ރައްޓެހިވެގެން އުޅޭތާ 3 އަހަރުވެއްޖެ ކަމަށްވެސް ބުނެފައެވެ. އަދި އަލީ “ބިގް ބޮސް” އަށް އައީ ޖޭސްމިން އަށްޓަކައި ކަމަށާއި، އެ ޝޯ ދޫކޮށް ދިޔައީ ވެސް ޖޭސްމިންގެ ހައްގުގައި ކަމަށް އޭނާ ބުނެއެވެ. "އަހަރެންދެކެ އެހާ ލޯބިވާ މީހެއް ހުރީތީ ނަސީބުވެރިކަން އިހުސާސްކުރެވޭ" ކަޝްމީރާ ކައިރީގައި ޖޭސްމިން ބުނެއެވެ.
