ހަމާސް ޖަމާއަތުން އިސްރާއީލުގެ ބޯޑަރު ހުރަސްކޮށް ދިން ނުރައްކާތެރި ހަމަލާތަކުގެ ތިން ދުވަސް ކުރިން މިސްރުން އިސްރާއީލަށް ހަމަނުޖެހުން ހިންގާނެ ކަމުގެ އިންޒާރު ދީފައިވާ ކަމަށް އެމެރިކާގެ ކޮންގްރެސް ޕެނަލްގެ ޗެއާމަން ވިދާޅުވެއްޖެ އެވެ.
ހައުސް އޮފް ރެޕްރެޒެންޓޭޓިވްސްގެ ފޮރިން އެފެއާޒް ކޮމިޓީގެ ވެރިޔާ މައިކަލް މެކައުލް ނޫސްވެރިންނަށް މައުލޫމާތު ދެއްވަމުން ވަނީ މި އިންޒާރުގެ ވާހަކަ ވިދާޅުވެއެވެ. އެހެންނަމަވެސް އޭރު، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ އެ ރިޕޯޓްތަކަކީ މުޅިން ދޮގު ވާހަކަތަކެއް ކަމަށް ސިފަކުރައްވާފައެވެ.
އިސްރާއީލުގެ 75 އަހަރުގެ ތާރީހުގައި ފަލަސްތީނުގެ ހަނގުރާމަވެރިން ދިން އެންމެ ނުރައްކާތެރި ހަމަލާ ހުއްޓުވުމުގައި އިސްރާއީލުގެ އިންޓެލިޖެންސް ސާވިސަސް ފެއިލްވެފައިވާތީ އެ މީހުންގެ މައްސަލަ އެގައުމުން މިހާރުދަނީ ބަލަމުންނެވެ.
"އަހަންނަށް އެނގޭ މިސްރުން އިސްރާއީލަށް އިންޒާރު ދީފައި ވާކަން، ހަމަލާގެ ތިން ދުވަސް ކުރިން، މިފަދަ ކަމެއް ހިނގައިދާނެ ކަމުގެ،" މެދުއިރުމަތީގެ މައްސަލައާ ބެހޭ ގޮތުން ގާނޫނު ހަދާ މަޖިލީހުގެ މެމްބަރުންނަށް ބުދަ ދުވަހު ނޫސްވެރިންނަށް ނުވަދެވޭގޮތަށް ބޭއްވި އިންޓެލިޖެންސް ބްރީފިންއަށް ފަހު ނޫސްވެރިންނާ ވާހަކަ ދައްކަވަމުން މެކައުލް ވިދާޅުވި އެވެ.
ޓެކްސަސްގެ ރިޕަބްލިކަން ޕާޓީގެ މެމްބަރު އިތުރަށް ވިދާޅުވެފައިވަނީ، މާ ބޮޑަށް އިތުރު ތަފްސީލަށް ދާން ބޭނުން ނުވާ ކަމަށާއި ނަމަވެސް އިންޒާރު ދީފައިވާ ކަމަށެވެ. "އަޅުގަނޑަށް ހީވަނީ ސުވާލަކީ ކޮން ފެންވަރެއްގައި ތޯ."
މިސްރުގެ އިންޓެލިޖެންސް އޮފިޝަލަކު މި ހަފުތާގައި އެސޯސިއޭޓެޑް ޕްރެސް ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ ޣައްޒާއިން އިސްރާއީލަށް "ބޮޑު ކަމެއް" ރާވަމުންދާ ކަމުގެ އިންޒާރު ގާހިރާއިން ތަކުރާރުކޮށް ދީފައިވާ ކަމަށެވެ. "އަޅުގަނޑުމެން އެމީހުންނަށް އިންޒާރު ދިނީ ގޮއްވާލާނެ ކަމުގެ އިންޒާރު، އަދި ވަރަށް އަވަހަށް، ވަރަށް ބޮޑުކޮށް ކަމަށް. އެކަމަކު އެފަދަ އިންޒާރުތައް އެމީހުން އަންޑައެސްޓިމޭޓް ކުރީ (މާބޮޑު ކަމަކށް ނުހެދީ)،" ނަން ނުޖެހުމަށް ޝަރުތުކޮށް ވާހަކަ ދެއްކި އޮފިޝަލް ވިދާޅުވި އެވެ.
ގާހިރާގެ އޮފިޝަލް ވިދާޅުވީ އިސްރާއީލުގެ އޮފިޝަލުން ވަނީ ޣައްޒާގެ ނުރައްކާ ކުޑަކޮށް، އޭގެ ބަދަލުގައި ހުޅަނގު އައްސޭރިއަށް ފޯކަސް ކޮށްފައި ކަމަށެވެ.
ނަން ހާމަނުކުރާ ދެ އޮފިޝަލަކާ ހަވާލާދީ، ފައިނޭންޝަލް ޓައިމްސްގައި ބުނެފައި ވަނީ، ވަކި ހަމަލާއެއް ދޭނެ ކަމުގެ ހަރުކަށި އިންޓެލިޖެންސެއް އިސްރާއީލަށް ލިބިފައި ނުވާ ކަމަށެވެ. ބުދަ ދުވަހު ނަތަންޔާހޫ ސިފަކުރެއްވި ގޮތުގައި، އިޒްރޭލަށް މި ނުރައްކާތެރި ހަމަލާގެ ކުރިން ވަކި އިންޒާރެއް ލިބިފައިވާ ކަމަށް ދެކެވޭ ވާހަކަތަކަކީ މުޅިން ދޮގު ހަބަރެކެވެ.
މިދިޔަ ހޮނިހިރު ދުވަހު ޣައްޒާގެ 1،500 އަށް ވުރެ ގިނަ ހަނގުރާމަވެރިން ވަނީ އެއްގަމާއި ވައިގެ މަގުންނާއި ކަނޑުގެ މަގުން އިސްރާއީލަށް ހަމަލާދީފަ އެވެ. ހަމާސްގެ ހަމަލާތަކުގައި އިސްރާއީލުގައި މަރުވި މީހުންގެ އަދަދު 1،200 އަށް ވަނީ އަރާފިއެވެ. އިސްރާއީލުން ޣައްޒާއަށް ދިން ވައިގެ ހަމަލާތަކުގައި މިހާތަނަށް 1،000 އަށްވުރެ ގިނަ މީހުން ވަނީ ޝަހީދުވެފައެވެ.
