ފެނަކަ ކޯޕަރޭޝަނާއި، މިފްކޯއިން ނަގާފައިވާ ލޯނަށް ސަރުކާރުން ގެރެންޓީ ދީފިއެވެ.
މިފްކޯ އިން ލޯން ނަގާފައިވަނީ 8.89 ޕަސަންޓް އިންޓަރެސްޓް ރޭޓުގައި 150 މިލިއަން ރުފިޔާގެ ލޯނެކެވެ. މިއަހަރުގެ ޖޫން 19 ވަނަ ދުވަހު ނަގާފައިވާ ލޯން ދައްކަންޖެހެނީ 2028 ވަނަ އަހަރުގެ ނިޔަލަށެވެ.
މީގެ އިތުރުން ފެނަކަ ކޯޕަރޭޝަނުން ލޯން ނަގާފައިވަނީ 5.1 ޕަސަންޓް ރޭޓުގައި 200 މިލިއަން ރުފިޔާގެ ލޯނެކެވެ. އެއީ މިއަހަރުގެ ޖޫން 20 ވަނަ ދުވަހު ނަގާފައިވާ ލޯނެކެވެ. އެ ލޯނު ދައްކަންޖެހެނީ 2026 ވަނަ އަހަރުގެ ނިޔަލަށެވެ.
މިފްކޯއިން ލޯނު ނަގާފައިވަނީ ހަބީބް ބޭންކުންނެވެ. އަދި ފެނަކައިން ލޯނު ނެގީ އެމްއައިބީންނެވެ.
މިދިޔަ އަހަރު ވެސް ފިނޭންސް މިނިސްޓްރީން ވަނީ ސަރުކާރު ހިއްސާވާ ކުންފުނިތަކުން ނެގި ފަސް ލޯނަކަށް ގެރެންޓީ ދީފައެވެ. މިދިޔަ އަހަރު ގެރެންޓީ ދިން ލޯނުތަކުގެ އަދަދު 7.4 ބިލިއަން ރުފިޔާ އަށް އަރައެވެ.
މިއަހަރުވެސް ސަރުކާރުން 3 ލޯނެއް ނަގާފައިވެއެވެ. ދައުލަތުގެ ޖުމްލަ ދަރަނި 100 މިލިއަނަށް ވުރެ މަތީގައި ހުރި އިރު 50 ބިލިއަން ރުފިޔާ އަކީ ބޭރުގެ ދަރަންޏެވެ.
