ބައިޑަން އާއިލާގެ ކުއްތާ، ކޮމާންޑަރު، ވައިޓް ހައުސްގެ ބައެއް މުވައްޒަފުންގެ ގައިގައި ދަތް އެޅުމާއި ގުޅިގެން ވައިޓް ހައުސްއިން ބޭރަށް ގެންގޮސްފިއެވެ.
ރައީސް ބައިޑްންގެ އަނބިކަނބަލުން ޖިލް ބައިޑަންގެ ތަރުޖަމާނު ވިދާޅުވީ އުމުރުން ދެ އަހަރުގެ، ޖަރުމަ،ނު ޝެފަޑަށް (ކުއްތާއަށް) ދެންވާނެ ގޮތެއް އަދި ދަންނަވަން ނޭގޭ ކަމުގައެވެ. މިދިޔަ ހަފުތާގައި ކޮމާންޑަރު ސީކްރެޓް ސާވިސްގެ އޭޖެންޓެއްގެ ގައިގައި ދަތް އެޅުމާއި ގުޅިގެން، އޭނާއަށްވަނީ ސިއްޙި އެހީތެރިކަން ހޯދާން ޖެހިފައެވެ.
މިއީ ވައިޓް ހައުސް ކޮމްޕްލެކްސްގައި ނުވަތަ ޑެލަވެއާގައި ހުންނަ އާއިލީ ގޭގައި ކުއްތާ ގާޑެއްގެ ގައިގައި ދަތްއެޅި 11 ވަނަ ފަހަރެވެ. "ރައީސްގެ ދެކަނބަލުން ވައިޓް ހައުސްގައި މަސައްކަތް ކުރާ ފަރާތްތަކާއި ކޮންމެ ދުވަހަކު ވެސް އެ މީހުން ހިމާޔަތް ކުރާ ފަރާތްތަކުގެ ސަލާމަތާއި ރައްކާތެރިކަމާ މެދު ވަރަށް ބޮޑަށް ވިސްނަވާ،" ތަރުޖަމާނު އެލިޒަބަތު އެލެގްޒެންޑާ މިއަދު ނެރުއްވި ބަޔާނެއްގައި ވިދާޅުވި އެވެ.
އޭނާގެ ބަޔާނުގައި ވިދާޅުވެފައިވަނީ، އެމެރިކާގެ ސީކްރެޓް ސަރވިސް އާއި އެކަމުގައި ޝާމިލުވާ އެންމެންގެ ކެތްތެރިކަމާއި އެއްބާރުލުމަށް ޝުކުރު އަދާކުރާ ކަމަށާއި، އެކަމަށް ހައްލު ހޯދުމުގެ މަސައްކަތް ކުރަމުން އަންނަ ކަމަށެވެ. "ދެން ހުރި ފިޔަވަޅުތައް އިވެލުއޭޓް ކުރާއިރު ކޮމާންޑަރު މިވަގުތު ވައިޓް ހައުސް ކެމްޕަހުގައި ނެތް." ބަޔާނުގައި ވިދާޅުވެފައި ވެއެވެ.
ނަމަވެސް އެ ކުއްތާ މިހާރު ދިރިއުޅެމުން ދަނީ ކޮން ތަނެއްގައި ކަމެއް ނުވަތަ އެންމެ ފަހުން އެނބުރި ވައިޓް ހައުސްއަށް އަންނާނެ ކަމެއް ތަރުޖަމާން ވިދާޅެއް ނުވެ އެވެ.
