އާ ސަރުކާރުގެ އިންތިގާލީ ތަރުޖަމާނަކަށް މުހައްމަދު ފިރުޒުލް ހަމަޖައްސައިފިއެވެ.
ސެޕްޓެމްބަރު 30 ގައި ބޭއްވި ރިޔާސީ އިންތިހާބު ކާމިޔާބު ކުރެއްވި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒުގެ ވެރިކަން ފެށުމުގެ ތައްޔާރީތައް މިހާރު ވަނީ ފަށައިފައެވެ. އެކަމަށް ހާއްސަ ކޮމިޓީއެއް އެކުލަވާލައި، އެ ކޮމިޓީގެ ވެރިޔަކަށް ކަނޑައަޅާފައި ވަނީ ޕީއެންސީގެ ޗެއާޕާސަން، އަބްދުއްރަހީމްއެވެ.
އިންތިގާލީ މަރުހަލާގެ ތަރުޖަމާނަކަށް އިންތިހާބީ ރައީސް ޑރ. މުއިއްޒު ކަނޑައެޅުއްވި ފިރުޒުލްއަކީ މިސްރުގެ އަޒުހަރު ޔުނިވާސިޓީން ކިޔަވާ ވިދާޅުވެފައިވާ ދ. ކުޑަހުވަދު އަށް އުފަން ބޭފުޅެކެވެ.
ދަ އިލްމު އިންސްޓިޓިއުޓުގެ ޑެޕިއުޓީ ޑިރެކްޓަ ޖެނެރަލްގެ މަގާމުގައި ފިރުޒުލް އުޅުއްވިއެވެ. ދީނީ ހޭލުންތެރިކަން އުފެއްދުމަށްޓަކައި ރޯދަ މަހު "އަވަސް" ނޫސް މެދުވެރިކޮށް ވީޑިއޯ ޕްރޮގްރާމެއް ވެސް އޭނާ ގެނެސް ދެއްވިއެވެ.
ރިޔާސީ އިންތިހާބު އިދިކޮޅު ޕީއެންސީގެ ރިޔާސީ ކެންޑިޑޭޓު، މާލޭގެ މޭޔަރު މުއިއްޒު ކާމިޔާބު ކުރެއްވީ ވޯޓުލީ 246,915 މީހުންގެ 54 ޕަސެންޓު ވޯޓުންނެވެ. ވެރިކަންކުރާ އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 46 ޕަސެންޓް ވޯޓެވެ.
