ރިޔާސީ އިންތިހާބުގެ ދެ ވަނަ ބުރާ ގުޅޭ މަސައްކަތުގައި އުޅުއްވަނިކޮށް ރައްޔިތުންގެ މަޖިލީހުގެ އެމްޑީޕީގެ ދެ މެމްބަރެއް ކަމަށްވާ މަރަދޫ ދާއިރާގެ އިބްރާހިމް ޝަރީފް (މަވޯޓާ) އާއި ފޭދޫ ދާއިރާގެ މުހައްމަދު ނިހާދަށް ހަމާލާ ދީފިއެވެ.
ޝަރީފަށް ހަމަލާ ދިނީ މާލޭގައި ހުންނަ މެންހަޓަން ހޮޓަލުގައި އިންތިހާބާ ގުޅޭގޮތުން މަރަދޫ ދާއިރާގެ ބޭފުޅުންތަކެއް މަސައްކަތުގައި ތިއްބަވަނިކޮށް، ގޭންގަކުން ވަދެ ކަމަށް އޭނާ ވިދާޅުވިއެވެ. އޭނާ ވިދާޅުވީ ބަޔަކު ވަދެ ލޯ މަތީގައި ވަރަށް ބާރަށް ޖެހުމަށްފަހު ގޮސްފައިވާކަމަށެވެ. ޝަރީފްގެ ލޯމަތި ވަނީ ހަމަލާގެ ސަބަބުން ވަރަށް ބޮޑަށް ދުޅަވެސް ވެފައެވެ.
އޭނާ ވިދާޅުވި ގޮތުގައި، އެ ހަމަލާ ދިނީ އެ ތަނުން ވޯޓު ގަތުމުގެ ކަންކަން ކުރާ ކަމަށް ތުހުމަތުކޮށެވެ. އަދި އެކަން ކުރީ ޕީޕީއެމަށް ނިސްބަތްވާ ގޭންގަކުން ކަމަށް އޭނާ ތުހުމަތު ކުރެއްވިއެވެ. އެ މައްސަލަ ފުލުހުންނަށް ހުށަހަޅާފައިވާ ކަމަށް ވިދާޅުވިއެވެ.
ޝަރީފްގެ އިތުރުން މި ވަގުތު އައްޑޫގައި ހުންނެވި ނިހާދު ގައިގައި ޖަހާފައިވާ މައްސަލައެއް ބަލަމުންދާ ކަމަށް ފުލުހުން ބުންޏެވެ.
އެކަން ހިނގި ގޮތުގެ ތަފްސީލެއް އަދި ނެތް ނަމަވެސް، ނިހާދަށް ފޭދޫ ސިއްހީ މަރުކަޒުގައި ފަރުވާދެމުން އަންނަ ކަން އެނގިފައި ވެއެވެ.
