ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕޭން ނިންމާލުމުގެ ބޮޑު ހިނގާލުން މާދަމާ ހަވީރު ބޭއްވުމަށް ނިންމައިފިއެވެ.
މާދަމާ ހަވީރު މުޅި ރާއްޖޭގައިވެސް މިހިނގާލުން އޮންނާނެއެވެ. މާލޭގައި ބާއްވާ މިހިނގާލުން ފަށާނީ އާރޓްފިޝަލް ބީޗް ޕީޕީއެމް އޮފީސް ކުރިމަތިންނެވެ. ހިނގާލުން މާލޭގެ ބޮޑެތި މަގުތަކުގައި ކުރިއަށް ގެންދިއުމަށްފަހު ނިންމާލުމަށް ހަމަޖެހިފައިވަނީ އާރޓްފިޝަލް ބީޗުގައި މުއިއްޒުގެ ވާހަކަ ފުޅަކުންނެވެ. މާދަމާގެ ހިނގާލުން ފަށާނީ 3:45 ގައެވެ.
ފުރަތަމަ ބުރުގައި މުއިއްޒުއަށް ތާއީދު ކުރާ ސަޕޯޓަރުން މާލޭގައި ބޭއްވި ހިނގާލުމުގައިވެސް ވަރަށް ގިނަ އަދަދެއްގެ މީހުން ވަނީ ބައިވެރިވެފައެވެ. މާދަމާގެ ހިނގާލުމުގައިވެސް ވީހާވެސް ގިނަ ބަޔަކު ބައިވެރިވުމަކީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުއިއްޒުގެ ވަރަށް ބޮޑު އެދުމެއްކަމަށް އެކޯލިޝަނުން ބުނެއެވެ.
މާދަމާގެ ހިނގާލުމުގައި ޕީޕީއެމް/ޕީއެންސީގެ ލީޑަރޝިޕްގެ ބޭފުޅުންނާއި، ކޯލިޝަން ޕާޓްނަރުންވެސް ބައިވެރިވާނެއެވެ. އިންތިޚާބުގެ ކެމްޕޭން ކުރިއަށް ގެންދެވޭނެ އެންމެ ފަހު ވަގުތަކީ މާދަމާ ހަވީރު 6 ޖެހުމާއި ހަމައަށެވެ. 6 ގެ ފަހުން ކެމްޕޭން އެއްވެސް ހަރަކާތެއް ހިންގުމަކީ ޤާނޫނީ ގޮތުން މަނާކަމެކެވެ.
