އެމްޑީޕީއަށް ނިސްބަތްވާ ދ. އަތޮޅު ކައުންސިލް ރައީސް އަހުމަދު ޝާފިއު މިރޭ އެޕާޓީން ވަކިވެ ޕީޕީއެމްއާއި ގުޅިއްޖެއެވެ.
ޝާފިއު އެމްޑީޕީން ވަކިވެ ޕީޕީއެމްއާއި ގުޅުނީ މިރޭ ކުޑަހުވަދޫގައި ބޭއްވި އިވެންޓެއްގައެވެ. ޝާފިއުއަކީ އެމްޑީޕީގައި ވަރަށް އިސްދައުރެއް އަދާކުރާ އަދި އެޕާޓީގެ ހަރަކާތްތައް ދ. އަތޮޅުގައި ވަރަށް ފުޅާކޮށް ކުރިއަސް ގެންދާ ބޭފުޅެކެވެ. ޝާފިއު އެމްޑީޕީން ވަކިވީ އެޕާޓީން މިހާރު އެމްޑީޕީގެ އުސޫލުތަކާއި އަސާސްތަކާއި ދެކޮޅަށް މަސައްކަތް ކުރާތީކަމަށް އޭނާ ވަނީ ބުނެފައެވެ.
ޝާފިއު ވަނީ ރިޔާސީ އިންތިޚާބުގެ ދެވަނަ ބުރުގައި ޑރ. މުއިއްޒަށް އިންތިޚާބު ކާމިޔާބު ކުރުމަށް ކުރެެވެން އޮތް ހުރިހާ މަސައްކަތެއް ކުރާނެ ކަމަށް ބުނެފައެވެ.
ރިޔާސީ އިންތިޚާބުގެ ދެވަނަ ބުރުގައި ޑރ.މުއިއްޒަށް ތާއީދު ކުރާ އެމްޑީޕީގެ ގިނަ ބޭފުޅުން ދަނީ އެޕާޓީން ވަކިވެ ޕީޕީއެމްއާއި ގުޅެމުންނެވެ. މިހާތަނަށް ލ. އަތޮޅު ކައުންސިލް ރައީސާއި، ށ. އަތޮޅު ކައުންސިލް ރައީސާއި އެތައް ރަށެއްގެ ރަށު ކައުންސިލް ރައީސުންނާއި، އާންމު އެމްޑީޕީގެ ގިނަ މެމްބަރުން ދަނީ ސޮއި ކުރަމުންނެވެ.
ދ. އަތޮޅު ކައުންސިލް ރައީސްގެ ސޮޔާއިއެކު މިހާތަނަށް، ށ، ރ، ޅ، ކ، ފ، ދ، ލ، ގއ އަދިި ގދ އަތޮޅު ކައުންސިލް ރައީސުންނަކީ ޕީޕީއެމްގެ މެމްބަރުންނަށް ވަނީ ވެފައެވެ.
