ކަސްޓަމްސްގައާއި، އެމްޕީއެލްގެ މުވައްޒިފުންގެ ހުރި ކަންބޮޑުވުންތަކަށް ދާއިމީ ހައްލު ގެނެސްދެއްވާނެ ކަމުގެ ޔަގީންކަން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ދެއްވައިފިއެވެ.
ރިޔާސީ އިންތިޚާބުގެ ދެވަނަ ބުރުގެ ވޯޓުލުން ހޮނިހިރު ދުވަހު އޮންނައިރު މުއިއްޒު ގެންދަވަނީ ހުއްޓުމެއްނެތި ކެމްޕޭން ހަރަކާތްތައް ކުރިއަށް ގެންދަވަމުންނެވެ. މިއަދު މުއިއްޒު ވަނީ އެމްޕީއެލް ސަރަހައްދަށް ވަޑައިގެން އެތަނުގައި މަސައްކަތް ކުރާ ގިނަ އަދަދެއްގެ މަސައްކަތްތެރީންނާއި ބައްދަލު ކުރައްވާފައެވެ. އަދި ފުރަތަމަ ބުރުގައިވެސް ލިބިފައިވާ ޝަކުވާތަކާއި ކަންބޮޑުވުންތަކާއި ގުޅޭގޮތުން މުއިއްޒު ވަނީ އުންމީދީ މެސެޖުތަކެއް ދެއްވާފައެވެ.
މުއިއްޒު ވިދާޅުވީ ކަސްޓަމްސް އެމްޕީއެލްގެ މުވައްޒިފުންގެ ހުރި ކަންބޮޑުވުންތަކަށް ދާއިމީ ހައްލު ގެނެސް ދެއްވާނެ ކަމަށެވެ. އެގެނެވޭ ބަދަލަކީ ގެނެވޭ ބަދަލަކުން އެކަން އަނެއްކާވެސް ކުރަންޖެހޭ ގޮތަށް ދާއިމީ ގޮތެއްގައި ގެނެވޭނެ ބަދަލަކަށް ވާނެކަމަށް މުއިއްޒު ވިދާޅުވިއެވެ. އެބަދަލަކީ މަސައްކަތުގެ މާހައުލަށް ގެންނަން ޖެހޭ ހެޔޮ ބަދަލެއް ކަމަށްވިޔަސް، އިމާރާތްތަކުގެ މައްސަލައަށް ހައްލު ގެނައުން ކަމަށްވިޔަސް އަދި ޕާކިންގެ މައްސަލައަށް ހައްލު ގެނައުން ކަމަށްވިޔަސް އެކަންކަމަށް ދާއިމީީ ހައްލެއް ގެނެސް ދެއްވާނެކަމަށް މުއިއްޒު ވިދާޅުވިއެވެ.
މާލޭގައި ޕާކް ކުރުމަށް ދިމާވެފައިވާ ދަތިތައް ހައްލު ކުރުމަށް މިހާރު ހޯދަން ޖެހޭ ގަރާޖު ސިޓީއާއި އެނޫންވެސް ބޮޑު އަގުގައި ކުލި ދައްކައިގެން ޕާކް ކުރުމަށް ކުރަންޖެހޭ ހާދައަށް ދާއިމީ ހައްލު ގެނެސް ދެއްވާނެކަމަށް މުއިއްޒު ވަނީ ވިދާޅުވެފައެވެ.
މުއިއްޒު ވިދާޅުވީ ޤައުމުގެ އިޤްތިޞާދު މިހާރު އޮތީ ވަރަށް ނާޒުކު ފައްތަރަކަށް މިސަރުކާރުން ވައްޓާލާފައިކަމަށެވެ. ވެރިކަމާއި ހަވާލުވެ އިޤްތިޞާދު ނަގާ ކޮޅަށް ޖަހައި، އާމްދަނީ ލިބޭނެ އިތުރު ގޮތްތަކާއި މަގުތައް ތަނަވަސްކޮށް ކުންފުނިތަކާއި ހުރިހާ މަސައްކަތްތެރިންނަށް މުސާރައިގެ ކުރިއެރުން ގެނެސް ދެއްވާނެ ކަމަށެވެ.
މުއިއްޒު ވަނީ ކުންފުނިތަކުގައި މަސައްކަތް ކުރާ މުވައްޒިފުންނަށް ވަޒީފާގެ ބިރު ނުގަތުމަށް ތަކުރާރުކޮށް ދަންނަވާފައެވެ. އެއްވެސް މުވައްޒިފަކަށް ވަޒީގެ ބިރެއް ނޯންނާނެކަމަށާއި، ވަޒީފާތަކުންވަކިކޮށް މީހުން އެކަހެރި ކުރުމަކީ ކުރާނެ ކަމެއް ނޫންކަމަށެވެ.
