ރިޔާސީ އިންތިޚާބުގެ ދެވަނަ ބުރުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ތާއީދު ކުރުމަށް އެމްޑީޕީ ކޯލިޝަންގައި ހިމެނުނު އެމްޑީއޭއިން ނިންމުމުން ޕީޕީއެމް/ޕީއެމްސީން އެކަމަށް މަރުހަބާ ކިޔައިފިއެވެ.
ކޯލިޝަން ރޫޅާލައި 2 ވަނަ ބުރުގައި ޑރ.މުއިއްޒުއަށް ތާއީދުކުރަން އެމްޑީއޭއިން ނިންމާފައިވަނީ ރޭ ބޭއްވި އެޕާޓީގެ ކުއްލި ކައުންސިލް ބައްދަލުވުމުގައެވެ. ކައުންސިލަށް މިހުށަހެޅުން ހުށަހެޅީ މެމްބަރު މުހައްމަދު އައްބާސްއެވެ. އޭނާގެ ހުށަހެޅުން ފާސްކުރީ 33 މެމްބަރުންގެ އަޣުލަބިއްޔަތުންނެވެ.
ޕީޕީއެމް/ޕީއެންސީން ނެރުނު ބަޔާނެއްގައި ބުނެފައިވަނީ ހޮނިހިރު ދުވަހު ރާއްޖޭގައި ބާއްވާ ރިޔާސީ އިންތިޚާބުގެ ދެވަނަ ބުރުގައި އެކޯލިޝަންގެ އަދި ދިވެހީންގެ ރިޔާސީ ކެންޑިޑޭޓް ޑރ، މުޙައްމަދު މުޢިއްޒާއި އެމަނިކުފާނުގެ ރަނިންގ މޭޓް ޙުސައިން މުޙައްމަދު ލަޠިފަށް ތާއީދު ކުރައްވަން މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އިން ނިންމެވި ނިންމެވުން މިކޯލިޝަންގެ އެންމެހާ މެންބަރުން ޝުކުރުވެރިކަމާއެކު ބަލައިގަންނަ ކަމަށެވެ.
އަދި އެމްޑީއޭއިން ޕީޕީއެމް/ޕީއެންސީގެ ރިޔާސީ ކެންޑިޑޭޓާއި ރަނިންގ މޭޓަށް ތާއީދު ކުރައްވަން ނިންމަވާފައިވާތީ، އެކޯލިޝަންގެ ލީޑަރު ޕީޕީއެމްގެ ރައީސް، ރައީސް ޔާމީން ޢަބްދުލްޤައްޔޫމާއި، ރިޔާސީ ކެންޑިޑޭޓް ޑރ. މުޙައްމަދު މުޢިއްޒާއި، ރަނިންގ މޭޓް ޙުސައިން މުޙައްމަދު ލަޠިފާއި، ކޯލިޝަންގެ ލީޑަރޝިޕާއި ޢާންމު މެންބަރުގެ ފަރާތްޕުޅުން އެމްޑީއޭގެ ރައީސް އަޙްމަދު ސިޔާމާއި، އެމްޑީއޭގެ ލީޑަރޝިޕް އަދި ކައުންސިލާއި އެންމެހާ މެންބަރުންނަށް ވަނީ މަރުޙަބާ ދަންނަވާފައެވެ.
ދެވަނަ ބުރުގައި އެމްއެންޕީން ވަނީ މުއިއްޒަށް ތާއީދުކޮށް ކޯލިޝަން ހަދާފައެވެ. ކޯލިޝަން ނަހަދައި ވަކި ކޮޅަކަށް ނާރަން ނިންމި ޕާޓީތަކުގެ ތެރެއިން އެމްއާރުއެމްއާއި، ޖޭޕީއާއި ޑިމޮކްރެޓްސްގެ ގިނަ މެމްބަރުންގެ ތާއީދު އޮތީ މުއިއްޒަށްކަން ދަނީ ހާމަ ކުރަމުންނެވެ.
