ރިޔާސީ އިންތިޚާބުގައި ވެރިކަން ކުރާ މައި ޕާޓީ އެމްޑީޕީއާއި ކޯލިޝަން ހެދުމަށް މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ކުއްލި ކައުންސިލް ބައްދަވުމެއް ފަށައިގެން ކުރިއަށް އެބަދެއެވެ.
މައުލޫމާތު ލިބިފައިވާ ގޮތުގައި މިބައްދަލުވުމުގައި އެމްޑީއޭގެ ލީޑަރު އަހުމަދު ސިޔާމް މުހައްމަދުވެސް ބައިވެރިވެއެވެ. މިބައްދަލުވުމުން އޮތީ މާލޭގައެވެ. ބައްދަލުވުމުގައި ކައުންސިލްގެ ގިނަ މެމްބަރުން ބައިވެރިވެފައިވާއިރު މިހާރު ބައްދަލުވުން ފަށާފައިވާކަމަށް މައުލޫމާތު ލިބިފައިވެއެވެ.
ރައީސް އިބްރާހިމް މުހައްމަދު ސޯލިހަށް ތާއީދުކޮށް، އެމްޑީޕީއާ އެކުގައި ކޯލިޝަން ހަދާފައިވާ އެމްޑީއޭ އިން މިރޭ ކުއްލި ބައްދަލުވުމެއް ބާއްވަން ނިންމާފައިވާކަން މީޑިއާތަކަށް ފޮނުވި މެސެޖެއްގައި ވަނީ ހާމަކޮށްފައެވެ. ނަަމަވެސް އެއީ ކޮން ކަމަކާ ގުޅޭ ގޮތުން ބާއްވާ ބައްދަލުވުމެއް ކަމެއް ހާމައެއް ނުކުރެއެވެ.
ނަމަވެސް މައުލޫމާތު ލިބިފައިވާ ގޮތުގައި މިހާރު ސަރުކާރު ކޯލިޝަންގައި ދެމި ތިބޭނީތޯ ނޫނީ ކޯލިޝަން ވަކިވާނީތޯ މިރޭގެ ބައްދަލުވުމުގައި ނިންމާނެއެވެ. މިރޭ ކުއްލި ކައުންސިލް ބައްދަލުވުމެއް ބާއްވާއިރު ދެވަނަ ބުރުގައި އެމްޑީޕީން ބާއްވާ އެއްވެސް ހަރަކާތެއް ސިޔާމް ފެނިފައި ނުވެއެވެ.
މިބައްދަލުވުމުގައި 34 ކައުންސިލް މެމްބަރުން ބައިވެރިވެއެވެ. އެމްޑީއޭގެ ކައުންސިލް ވަޓްސް އަޕް ގްރޫޕްގެ ރޫހު ހުރި ގޮތަށް ބަލާއިރު، ދެތިން ބޭފުޅުން ފިޔަވައި ދެން ތިއްބެވި ބޭފުޅުންގެ ވާހަކަހުރީ މިސަރުކާރު ކޯލިޝަނުން ވަކިވުމަށެވެ.
