ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒާއި، ރަނިންމޭޓް ހުސެއިން މުހައްމަދު ލަތީފް، ސެމްބެ އަށް އޮތް ތާއީދު ދައްކާލުމަށް މާދަމާ ހަވީރު މާލޭގައި ސައިކަލު ބުރެއް ބާއްވަން ހަމަޖެހިއްޖެއެވެ.
ދިވެހިންގެ ރާއްޖެ ސައިކަލު ބުރުގެ ނަމުގައި މާދަމާ ހަވީރު 3:45 ގައި މިސައިކަލު ބުރު ފެށުމަށް ހަމަޖެހިފައިވަނީ، ބޮޑު ތަކުރުފާނު މަގު ޕީޕީއެމް އޮފީސް ކުރިމަތިންނެވެ. މިސައިކަލު ބުރު ލީޑް ކުރާނީ ރަނިންމޭޓް ސެމްބެއެވެ. ރިޔާސީ އިންތިޚާބުގެ ދެވަނަ ބުރުގެ ވޯޓުލުން ހޮނިހިރު ދުވަހު އޮންނައިރު އިންތިޚާބުގެ ކެމްޕޭން ވަރަށް ފުޅާކޮށް ޕީޕީއެމް/ޕީއެންސީގެ ލީޑަރޝިޕުން މުޅި ރާއްޖޭގައި ގެންދަނީ ކުރަމުންނެވެ.
އެގޮތުން އިންތިޚާބުގެ ދެވަނަ ބުރުގައި މާލެއާއި ރާއްޖޭގެ ރަށްތަކުގައި ޑޯޓުޑޯ ހަރަކާތްތައް ކުރިއަށް ގެންދިއުމާއި، ޖަލްސާތައް ބޭއްވުމާއި ތަފާތު އެކި އިވެންޓުތައް ދަނީ ބާއްވަމުންނެވެ.
އިންތިޚާބުގެ ދެވަނަ ބުރު ކާމިޔާބު ކުރުމަށް މުއިއްޒުއާއި ސެމްބެ ދަނީ ހުއްޓުމެއްނެތި ކެމްޕޭން ހަރަކާތްތައް ކުރިއަށް ގެންދަމުންނެވެ. ރިޔާސީ އިންތިޚާބުގެ ފުރަތަމަ ބުރުގައި މުއިއްޒާއި، ސެމްބެއަށް އެއްލަކައަށްވުރެ ގިނަ ވޯޓު ލިބިފައިވެއެވެ. ނަމަވެސް ދެވަނަ ބުރުގައި އަމާޒަކީ އެއަދަދު އެއަށްވުރެ އިތުރުކޮށް އިންތިޚާބު ކާމިޔާބު ކުރުމެވެ.
