ކުރީގެ ރައީސް ޔާމީން އުފެއްދެވި ސޮވެރިން ޑިވެލޮޕްމެންޓް ފަންޑް (އެސްޑީއެފް) އަށް އަލުން ޑޮލަރު ޖަމާކުރަން ފަށައި، އެފަންޑަށް ޤާނުނީ ރައްކާތެރިކަން ކަށަވަރު ކޮށްދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީޕީއެމް-ޕީއެންސީން މިރޭ ބޭއްވި "އިކޮނޮމިކް ފޯރަމް" ގައި ވާހަކަދައްކަމުން މުއިއްޒު ވިދާޅުވީ ބަޖެޓުގެ ދަރަނީ ޑެފިސިޓް ހުރި މިންވަރު 15 އިންސައްތައިން ސިންގަލް ޑިޖިޓަކަށް ކުޑަކުރައްވާނެކަމަށެވެ. އަދި ރާއްޖޭގައި ޑޮލަރުގެ އަގު 18 ރުފިޔާއަށްވުރެ ކުޑަކޮށް އެއްހަމައެއްގައި ހިފަހައްޓާ ދިވެހި ފައިސާގެ އަގު ދަށްވިޔަ ނުދެއްވާނެކަމަށްވެސް މުޢިއްޒު ވިދާޅުވިއެވެ. އެމްއެމްއޭގެ ރިޒާވް އިތުރުކޮށް މައްޗަށް ޖެއްސުމަށްވެސް މަސައްކަތްކުރައްވާނެކަމަށް މުޢިއްޒުވަނީ ވިދާޅުވެފައެވެ.
ޤާނޫނީ ބާރުވެރިކަމާއެކު ސޮވްރިންގ ޑިވެލޮޕްމަންޓް ފަންޑަށް އަލުން ޑޮލަރު ޖަމާވާގޮތް ހައްދަވާ މަހުންމަހަށް ޢާމްދަނީ ވަންނަ ފަންޑަކަށް އެފަންޑު ހެދުމަށްވެސް ކަނޑައަޅާފައިވާކަމަށް މުޢިއްޒު ވިދާޅުވިއެވެ. އަދި ބޭރު ދުނިޔޭގައި ރާއްޖޭގެ ކްރެޑިޓް ރޭޓިންގ ހުރި މިންވަރު 2016 ގައި ހުރި ހިސާބަށް ޖެއްސުމަށް އިންވެސްޓަރ ކޮންފިޑެންސް އަނބުރާ ގެނައުމަށް މަސައްކަތްކުރުމަށް ނިންމާފައިވާކަން ޑރ.މުޢިއްޒު ފާހަގަކުރެއްވިއެވެ.
އަނެއްކާވެސް އަޅުގަނޑުމެން އެސްޑީއެފްގައި ޖަމާކުރާނީ ޑޮލަރުން. ޑޮލަރު އެއާޕޯޓަށް ލިބޭ ޑޮލަރާ ޓޫރިޒަމް ސެކްޓާއިންނާ އެކި ގޮތް ގޮތުން އަޅުގަނޑުމެން ގާނޫނެއް ހަދައިގެން، ގާނޫނީ ބާރުވެރިކަމާއެކީގައި އެސްޑީއެފް ހިމާޔަތްކޮށްގެން އެއަށް ޑޮލަރު ލިބޭނެ އިތުރު ގޮތްތަކެއް ކަނޑައަޅައިގެން، އެސްޑީއެފްއަކީ މަހުން މަހަށް ގިނަ އަދަދެއްގެ އާމްދަނީ ޖަމާވާ ފަންޑަކަށް ހަދާނަން.
– މުއިއްޒު ވިދާޅުވިއެވެ.
މީގެއިތުރުން އެސްއީޒެޑްގެ ޤާނޫނުގެ ދަށުން ވަކި ސަރަޙައްދުތަކެއް ކަނޑައަޅާ ރައްޔިތުންނަށް މާލީ މަންފާ ލިބޭނެ މަގު ފަހިކޮށްދެއްވާނެކަމަށް މުޢިއްޒު ވިދާޅުވިއެވެ. އަދި ރިސޯޓް ތަރައްޤީކުރުން ފަދަ ބޮޑެތި އިންވެސްޓްމަންޓްތަކަށް ޚާއްސަ ބޭންކެއް ތަރައްޤީކުރުމާއި، އިންޓަރނޭޝަނަލް ޕޭމަންޓް ގޭޓްވޭ ތެރެއަށް ވަދެވޭނެ މަގުފަހިކޮށް ޒުވާނުންނަށް އަމިއްލަ ހުނަރު ވިއްކައިގެން ފުދުންތެރި ދިރިއުޅުމެއް އުޅެވޭނެ މަގު ފަހިކޮށްދިނުމަށް މަސައްކަތްކުރައްވާނެކަމަށް ޑރ. މުޢިއްޒު ވިދާޅުވިއެވެ.
މި ސަރުކާރުން އާމްދަނީ ހޯދަން ޓީ ބިލާއި ސުކޫކު އަދި ބޮންޑު ރާއްޖެއިން ބޭރަށް ވިއްކާފައިވާކަން ފާހަގަކޮށް މުއިއްޒު ވިދާޅުވީ ފާއިތުވި 40 އަހަރުގެ ތެރޭގައި ރާއްޖޭގައި ޗާޕުކުރި ފައިސާގެ އަދަދު ހަ ބިލިއަން ރުފިޔާއަށް އަރާ ކަމަށެވެ. ނަމަވެސް 2018 ވަނަ އަހަރުން ފެށިގެން މިއަދުގެ ނިޔަލަށް މި ސަރުކާރުން އަށް ބިލިއަން ރުފިޔާ ޗާޕުކޮށްފައިވާ ކަމަށާއި އެކަމުގެ ސަބަބުން ތަކެތީގެ އަގުބޮޑުވެފައިވާ ކަމަށް ވިދާޅުވިއެވެ.
މަސްވެރިކަން ހަރުދަނާކުރުމަށް ރާއްޖެއިން ބޭރަށް މަސް ބޭރުކުރެވޭ ނިސްބަތް އިތުރުކުރުމަށާއި ދަނޑުވެރިކަން ކުރިއެރުވުމަށް ޚާއްސަ ރަށްތައް ދޫކޮށް މި ދެދާއިރާ ކުރިއެރުވުމަށް މަސައްކަތްކުރުމަށްވެސް މެނިފެސްޓޯގައި ހިމަނާފައިވާކަން މުޢިއްޒު ފާހަގަކުރެއްވިއެވެ.
