ދިހަ އަހަރުގައި އޯވަރީ ކެންސަރު ޖެހުނު އާމިނަތު އަލީ އާދަމް (އާމި) ނިޔާވެއްޖެއެވެ.
އޭނާގެ އާއިލާއިން ވާހަކަދެއްކި މީހަކު ބުނީ މިދިޔަ ޑިސެމްބަރު މަހު ކެންސަރު ދެނެގަނެވުނު އާމިގެ އެތައް ސާޖަރީއަކާއި ފަރުވާތައް ދިން ނަމަވެސް، އެ ކުއްޖާގެ ޓިއުމަރު ކޮންޓްރޯލް ނުވި ކަމަށެވެ.
އެހެންވެ، އާމި ރަނގަޅުވާނެ ކަމަށް އިންޑިއާއިން އުއްމީދު ކަނޑާލުމުން، ނުވަ މީހުން ތިބި އާއިލާގައި އެންމެ ހަގަށް ހުރި އާމިއަށް ފަރުވާ ދިނީ ވެސް އައިޖީއެމްއެޗްގެ ޕައިލޭޓީވް ކެއާގައެވެ. ރެހެންދި ސްކޫލުގައި ކިޔަވަމުން ދިޔަ އާމިއަށް މިދޔަ އަހަރު އެންމެ ފުރަތަމަ ފަރުވާ ދިނީ ހުޅުމާލެ ހޮސްޕިޓަލުންނެވެ. އޭރު ހެދި ޓެސްޓުތަކުން ވެސް، މިއީ އަވަހަށް ފެތުރޭ ޓިއުމަރެއްކަން އެނގުނެވެ.
އޯވަރީ ކެންސަރު އާއްމުގޮތެއްގައި ޖެހެނީ ބޮޑެތި އަންހެނުންނަށެވެ. ކެންސަރަށް ހާއްސަ ޑޮކްޓަރަކު ވެސް ވިދާޅުވި ގޮތުގައި މިހާ ކުޑަކުއްޖަކަށް އެ ކެންސަރު ޖެހުމަކީ ވަރަށް މަދުން ނޫނީ ނުވާނެ ކަމެކެވެ.
އާމިގެ ކަށުނަމާދު ބާއްވަން ހަމަޖައްސާފައިވަނީ ހުޅުމާލޭ ސަހަރާ މިސްކިތުގައި މިރޭ 10:30 ގައެވެ.
