ބޮޑު ކާމިޔާބެއް ހޯދަމުން އަންނަ ފިލްމް "ޖަވާން" ގެ ބަތަލާ ނަޔަންތަރާ އާއި އެ ފިލްމްގެ ޑައިރެކްޓަރު އެޓްލީ ކުމާރު އާއި މެދުގައި ހިތްހަމަނުޖެހުން ހުރި ކަމަށް ރިޕޯޓްތައް ބުނެފި އެވެ.
މި ފިލްމް އަކީ ބޮޑު ކާމިޔާބެއް ހޯދަމުން އަންނަ ފިލްމްއެކެވެ. ފިލްމް އަދި ވެސް އޮތީ ސިނަމާ ގައިއެވެ. ފިލްމް ރިލީޒް ކޮށްފައިވަނީ މި މަހުގެ 7 ވަނަ ދުވަހުގައިއެވެ. މި ފިލްމްގެ ލީޑުން ނަޔަންތަރާ އާއި އެކުގައި ފެނިގެން ދަނީ ބޮލީވުޑްގެ ސްޕަސްޓާރު ޝާހުރުކް ހާންއެވެ. މި ފިލްމް އަކީ ނަޔަންތަރާ ބޮލީވުޑްއަށް އަދި ތައާރަފް ވާ ފިލްމްވެސް މެއެވެ.
ރިޕޯޓަތަށް ބުނާ ގޮތުގައި ސައުތުގެ އެންމެ މަޝްހޫރު ބަތަލާއިންގެ ތެރޭގައި ހިމެނޭ ނަޔަންތަރާ ހިތްހަމަނުޖެހިފައި ހުރީ ފިލްމުން އޭނަގެ ގިނަ މަންޒަރުތައް ކަނޑާލައި، ދީފައިވާ އިސްކަން ކުޑަކުރުމާ ގުޅިގެންނެވެ.
އަދި އޭގެ ބަދަލުގައި ފިލްމުގެ "އެކްސްޓެންޑް ކެމިއޯއެއް" ގައި ހިއްސާވި މަޝްހޫރު ބަތަލާ ދީޕިކާ ޕަދްކޯން ކުޅުނު ކެރެކްޓާ އަށް މާ ބޮޑު އިސްކަމެއް ދީފައިވާ ކަމަށާއި އޭގެ ސަބަބުން "ޖަވާން" ގައި ނަޔަންތަރާ ކުޅުނު ރޯލަށް ހިޔަނި އެޅިފައިވާ ކަމަށް އޭނަ ގަބޫލުކުރާ ކަމަށް މީޑިއާތަކުން ބުނެފައިވެ އެވެ.
މި ފިލްމުގައި ހިމެނޭ ދީޕިކާގެ ރޯލަކީ މީގެ އެންމެ ބޮޑު އެއް ހައިލައިޓް ކަމަށް "ޖަވާން" ބެލި ވަރަށް ގިނަ ބަޔަކު ބުނެފައިވެ އެވެ. މިކަމާ ގުޅިގެން "ޖަވާން" ޓީމުގެ އެއްވެސް މެމްބަރަކު އެއްވެސް އެއްޗެއް ބުނެފައިއެއް ނުވެއެވެ. ނަމަވެސް އެޓްލީގެ 37 އުފަން ދުވަހުގެ ތަނުހިޔާ "ޖަވާން" ގެ ސެޓުން ނަގާފައިވާ ފޮޓޯތަކެއް ކޮލާޖްކޮށް އިންސްޓަގްރާމް ސްޓޯރީގައި ނަޔަންތަރާ ވަނީ ހިއްސާ ކޮށްފައިއެވެ.
