ރިޔާސީ އިންތިޚާބުގެ ދެވަނަ ބުރުގެ ކެމްޕޭންގައި ޑރ. މުއިއްޒު މިހާރު ކުރައްވަމުންދާ ދަތުރުގެ ޝެޑިއުލުން ބޭރުން ދަތުރުމަތިން ކުޑަ ވަގުތުކޮޅަށް ނައިފަރަށް އަރާލުމުންވެސް އެރަށު ރައްޔިތުންގެ ތާއީއު އޮތްވަރާއި، މުއިއްޒު އިންތިޚާބު ކުރަން ބޭނުންވާ ވަރު ހާމަކޮށްފިއެވެ.
މުއިއްޒު މިރޭ ޅ.އަތޮޅު އޮޅުވެލި ފުއްޓަށް ވަޑައިގެންނެވުމަށްފަހު ކުޅުދުއްފުއްޓަށް ވަޑައިގެންނެވުމުގެ ދަތުރު މަތީގައި ވަނީ ނައިފަރު ރައްޔިތުން އިންތިހާއަށް އެދުމުން އެރަށަށް 10 ވަރަކަށް މިނިޓަށް ވަޑައިގެން ބަނދަރުމަތިން ރައްޔިތުންނާއި ބައްދަލު ކުރައްވާފައެވެ. ވަގުތު އޮތް ވަރުން ވަރަށް ކުޑަ ވަގުތު ކޮޅަކަށް މުއިއްޒު ނައިފަރުގައި މަޑު ކުރެއްވިި ނަމަވެސް އެރަށުގެ ރައްޔިތުންގެ ޝުއޫރުތަކާއި އިހުސާސްތައް ވަނީ ކެކިއަރައި، މުއިއްޒުއަށް އޮތް ތާއީދު ބަންޑުން ކޮށްލާފައެވެ.
މުއިއްޒު ނައިފަރު ރައްޔިތުންނާއި ބަނދަރުމަތީގައި ވާހަކަ ދައްކަވަމުން ދިޔައިރުވެސް އެއްވެތިވި ނައިފަރުގެ ގިނަ އަދަދެއްގެ ރައްޔިތުންގެ ޝުއޫރުތައް ދިޔައީ ފާޅު ކުރަމުންނެވެ. މުއިއްޒު ވަނީ ނައިފަރު ރައްޔިތުންގެ ކައިރިއަށް ވަޑައިގެން ފުރަތަމަ ބުރުގައި ވެވަޑައިގެންނެވި ވައުދުތައް ރަނުން ރަނަށް ފުއްދަވާނެ ކަމަށެވެ.
އަދި ނައިފަރުގެ ރައްޔިތުން ތިބި ފޯރިއާއި ޖޯޝަކީ މިއިންތިޚާބު ކާމިޔާބުކުރުމަށް ލިބުނު ބޮޑު ހިތްވަރެއްކަމަށް މުއިއްޒު ވިދާޅުވިއެވެ. އަދި ނައިފަރު ދާއިރާގެ މެމްބަރު ޝިޔާމްއަކީ ކެމްޕޭންގައި އެންމެ ބުރަ މަސައްކަތްތަކެއް ކުރައްވާ އެއްބޭފުޅާއަށްވާއިރު، ޝިޔާމްގެ ހިތްވަރާއި ނައިފަރު ރައްޔިތުން ތިބި ސާބިތުކަމަށް މުއިއްޒު ވަނީ ޝުކުރު އަދާކުރައްވާފައެވެ.
ނައިފަރަށް މުއިއްޒު ވަޑައިގެންނެވުމުން އެރަށުގައި ތިއްބެވި ޑިމޮކްރެޓްސްއަށް ތާއީދު ކުރާ ބޭފުޅުންވެސް ވަނީ އެސަރަހައްދަށް އައިސް މުއިއްޒުއާއި ސަލާންކޮށް، ދެވަނަ ބުރުގައި މުއިއްޒު އިންތިޚާބު ކުރަން ކުރެވެން އޮތް ހުރިހާ މަސައްކަތެއް ކުރާނެކަމުގެ ޔަގީންކަން ދީފައެވެ. ނައިފަރަކީ އިންތިޚާބުގެ ފުރަތަމަ ބުރުގައުވެސް މުއިއްޒަށް އެންމެ ބޮޑު ތާއީދެއް ދެއްވައި އެންމެ ގިނަ ވޯޓު ކާމިޔާބުކުރި އެއްރަށެވެ.
