ރާއްޖެ މިއަދު އޮތީ އިޤްތިޞާދީ ގޮތުންވެސް ވަކި އަތަކަށްޖެހި އަޅުވެތި ވެފައިކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރު ކާމިޔާބު ކުރުމަށް ހުއްޓުމެއް ވަރުބަލިވުމެއްނެތި ޑރ. މުއިއްޒު ކުރަމުންދާ ކެމްޕޭންގައި މިރޭ ބ. ކަނމަދޫގައި ވާހަކަ ދައްކަވަމުން މުއިއްޒު ވިދާޅުވީ ރާއްޖޭގައި މިއަދު އެއްވެސް ދާއިރާއަކުން މިނިވަންކަން ނެތްކަމަށެވެ. އިންޑިއާގެ ސިފައިން ރާއްޖޭގައި ބޭސްވެގެން ތިބޭތިބުމުގެ ކަންބޮޑުވުން މުޅި ޤައުމު އުފުލާއިރު، އެކަންބޮޑުވުމާއިއެކު އޮތް އަނެއް ކަންބޮޑުވުމަކީ އިޤްތިޞާދީ ގޮތުން ރާއްޖެއަށް އޮތް ކަންބޮޑު ވުމަށް ކަމަށެވެ.
މުއިއްޒު ވިދާޅުވީ މިއަދު ރާއްޖޭގެ ދަރަނީގެ ކަންކަންވެސް އޮތީ އިންޑިއާއަށް ގޮސްވެފައި ކަމަށެވެ. އިންޑިއާއިން ނަގާފައިވާ ލޯނުތަކުގެ ތަފްސީލާއި، އިންޓަރެސްޓް ރޭޓުތަކުގެ ތަފްސީލްވެސް އެމްއެމްއޭގެ ގަވަރުނަރަށްވެސް ނޭގޭ ކަމަށް މުއިއްޒު ވިދާޅުވިއެވެ. މިހިސާބަށް ޤައުމުގެ ކަންކަން ދިއުމުން ރާއްޖޭގެ އިޤްތިޞާދީ މިނިވަންކަމަށްވެސް ހައްލު ތަކެއް ހޯދަން ޖެހޭކަމަށް މުއިއްޒު ވިދާޅުވިއެވެ.
ގަވަރު ނަރަކަށް ނޭގޭ ނަގާ ލޯނުތަކުގެ ތަފްސީލް. މިއީތޯ އަޅުގަނޑުމެން ކުރިއަށްދާންވީ ގޮތަކީ. އަޅުގަނޑުމެން މިކަމާއި އިންތިހާއަށް ވިސްނަން ޖެހޭ. ދަރަނި މައްޗަށް ދަރަނި ދަނީ ނަގަމުން. އިޤްތިޞާދީ ގޮތުންވެސް މިއޮތީ އަޅުވެތިވެފަ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ރައްޔިތުން މިހެން ހުރި މިނިވަންކަމުގެ ކަންކަމަށް ތަސައްލީއެއް ހޯދަން މިމަހުގެ 30 ވަނަ ދުވަހު ލާވޯޓުގައި ވަރަށް ބޮޑު ތަފާތަކުން މިސަރުކާރަށް ނޫނެކޭ ބުނަން ޖެހޭކަމަށެވެ. ރާއްޖޭގައި ތިބި އިންޑިއާގެ ސިފައިން ބޭލުމާއި، ރާއްޖޭގެ އިޤްތިޞާދީ ބާރުވެރިކަން ހޯދުމަށް ކުރެވޭ މުހިންމު ޤައުމީ މަސައްކަތުގައި ރައްޔިތުންގެ ބޮޑު އެއްބާރުލުމެއް ލިބި ބޮޑު އައުލަބިއްޔަތެއް ލިބިގެންދާނެ ކަމަށް އުންމީދު ކުރައްވާކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ރާއްޖޭގެ ރައްޔިތުން ބޭނުންވަނީ ދިވެހިންގެ ބާރު ހިނގާ ދިވެހި ވެރިކަމެއް ކުރަން ކަމަށެވެ. ރާއްޖޭގެ ދާޚިލީ ކަންކަމުގެ ތެރެއަށް ސީދާ އިންޑިއާއިން ވަދެ ނުފޫޒު ފޯރުވާ ފަދަ ވެރިކަމެއް ރާއްޖޭގައި އޮންނަން ދިވެހި ރައްޔިތުން ނޭދޭކަމަށެވެ. އަދި އިންޑިއާ ނޫނަސް އެހެން ޤައުމަކުންވެސް ދިވެހިންގެ ދާޚިލީ ކަންކަމަށް ވަންނަން ޖާގައެއް ނުދެވޭނެކަމަށް މުއިއްޒު ވިދާޅުވިއެވެ.
