ސަރުކާރުގެ ކުންފުނި ފެނަކަ ކޯޕަރޭޝަންގެ އެކި ޕްރޮޖެކްތަކުން ކޮންޓްރެޓަރުންނަށް ދޭންޖެހޭ ފައިސާ ނުދީގެންނާއި، ފެނަކައިން ހިންގާ ކޮރްޕްޝަން ތަކާއި ދެކޮޅަށް މިއަދު އޮފީސް ކައިރީގައި މުޒާހަރާ ކޮށްފިއެވެ.
ފެނަކައިން ކޮންޓްރެކްޓަރުންނަށް ދޭންޖެހޭ ގިނަ އަދަދެއްގެ ފައިސާ ނުދީ އޮތްކަމުގެ ކަންބޮޑުވުން މީގެ ކުރިންވެސް އެކި ފަހަރު މަތީން ވަނީ ސަރުކާރުގެ ކަމާއި ގުޅުންހުރި އިދާރާތަކުގެ ސަމާލުކަމަށް ގެނެސްފައެވެ. އަދި ފެނަކައަށް ތުހުމަތު ކުރެވޭ ކޮރަޕްޝަންގެ ބޮޑެތި މައްސަލަތަކެއް އޭސީސީއާއި ރައީސް ޞާލިހަށްވެސް ހުށަހަޅާފައި ވެއެވެ.
އެއްވެ ތިބި މީހުންގެ ތެރޭގައި ގިނަ އަދަދެއްގެ ޒުވާނުން ހިމެނެއެވެ. އެމީހުންގެ މައިގަނޑު ޝުއޫރަކަށްވެފައި އޮތީ ކޮރަޕްޓް ބޭފުޅުން ފެނަކައިގެ އިސްވެރިންނަށް އައްޔަންކޮށްގެން އެ ތަންތަން ނުހިންގޭ މައްސަލައެވެ. ހާއްސަކޮށް ފެނަކައިގެ މެނޭޖިން ޑިރެކްޓަރު އަހުމަދު ސައީދާއި އެހެން އިސްވެރިންގެ ނާގާބިލް ކަން އެމީހުން ދަނީ ފާހަގަ ކުރަމުންނެވެ.
އެއްވެ ތިބި މީހުން ވަނީ ފެނަކަ ސައީދާއި އެ ކުންފުނީގެ އިސްވެރިންގެ އިސްތިއުފާ އަށް ވެސް ގޮވަމުންނެވެ. އެތަނުން އެކަކު ބުނެފައި ވަނީ ގދ. ގައްދޫގައި ފެނަކަ މުވައްޒަފުންނަށް ބިރު ދައްކައިގެން ހޯދި ވޯޓުތައް ދެން ނުލިބޭނެ ކަމަށެވެ. އަދި މިހާރު ވެސް އެމްޑީޕީ އަށް 15،000 ވޯޓު ގެއްލިފައިވާ ކަމަށާއި މުޒާހަރާ އަށް ފަހު އެ އަދަދު 30،000 އަށް އަރާނެ ކަމަށް ވެސް ބުނެފައިވެއެވެ.
އެއްވި މީހުންވަނީ ސައީދު މިހާރުން މިހާރަށް އިސްތިއުފާ ދެއްވުމަށާއި، ދޭންޖެހޭ ލާރި ނުދީ ކުންފުނި ހިންގުމަކީ ވެވޭ ބޮޑު ޚިޔާނާތެއް ކަމަށެވެ.
