ރާއްޖޭގައި މިއަދު އޮތް ބިރުވެރިކަމާއި އަނިޔާއާއި، ނާއިންސާފުން ޤައުމު ސަލާމަތްކޮށް އަމާން ސުލްހަވެރި ރާއްޖެއެއް ޤާއިމް ކޮށްދެއްވާނެކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރު ކާމިޔާބު ކުރުމަށް ހުއްޓުމެއްނެތި ޑރ. މުއިއްޒު ކުރައްވަމުންދާ ކެމްޕޭންގައި މިއަދު ރ. ފައިނަށް ވަޑައިިގެން އެރަށުގެ ރައްޔިތުންނާއި ބައްދަލު ކުރައްވާ މުއިއްޒު ވިދާޅުވީ ރާއްޖޭގައި މިއަދު އޮތީ އިންތިހާއަށް ބިރުވެރިކަމާއި ނާމާންތަކަން ގާއިމް ވެފައިކަމަށެވެ. ވަޒީފާގެ ބިރުދެއްކުން އިންތިހާއަށް އޮތްއިރު، އަމާންކަމާއިއެކު ދިރިއުޅުމުގެ ހައްގުންވެސް ދިވެހިން ތިބީ މަހުރޫމް ވެފައިކަމަށެވެ.
ރައްޔިތުންނާއި ހަމައަށް ކޮށްދޭ ވެރިކަމެއްގައި އަބަދުވެސް އިސްކުރަންޖެހޭނީ ޤައުމާއި ރައްޔިތުންކަން ފާހަގަ ކުރައްވާ މުއިއްޒު ވިދާޅުވީ މިހާރު އޮތް އަނިޔާވެރިކަމާއި، ބިރުދެއްކުމުން ޤައުމު ސަލާމަތް ކުރައްވައި ލޯތްބާއި ކުލުނު އޮތް އޯގާތެރި ވެެރިކަމެއް ޤާއިމް ކޮށްދެއްވާނެކަމަށެވެ.
ބިރުދެއްކުން ނައްތާލާނަން. އަޅުގަނޑަކީ މީހުންނަށް ބިރު ދައްކާނެ މީހެއްނޫން. އެއްވެސް މީހަކަށް ބިރުދައްކައި، ނުހައްގުން އެއްވެސް މީހަކަށް އަނިޔާދީ ކަމެއް ނުކުރާނަން. ޚިދުމަތް ކުރާނީ ލޯތްބާއި ކުލުނާއި، އޯގާ ތެރިކަކަމާއިއެކު. އެހެން ކަމުން ވަޒީފާގެ ބިރު ގަންނަނާނެ ކަމެއް ނެތް. ބިރު ފަހަނަ އަޅާގޮތް ހުރިހާ ބޭފުޅުން މިކަމުގައިި ބައިވެރިވެ ލައްވާ.
– ޑރ. މުއިއްޒު ވިދާޅުވިއެވެ.
މުއިއްޒު ވިދާޅުވީ އަމާން ސުލްހަވެރި ދިވެހިންގެ ރާއްޖެއަށް ދަތުރުކުރަން ދިވެހިން ފަށާނެ ދުވަހަކީ މިމަހުގެ 30 ވަނަ ދުވަސް ކަމަށެވެ. އެދުވަހު ދިވެހިން ފަށާ ދަތުރަކީ އަމާން ސުލްހަވެރި ދަތުރަކަށް ހަދާނެކަމަށް މުއިއްޒު ވިދާޅުވިއެވެ. ޤައުމުގެ މިނިވަން ކަމާއި މެދު އޮތް ބިރުވެރިކަމާއި، ޤައުމުގެ ސުލްހަވެރި ކަމާއިއެކު އޮތް ބިރުވެރިކަމުން ޤައުމު ރައްކާތެރިކޮށް ދިވެހިންގެ ރާއްޖެއަށް ކުރާ ދަތުރު އަމާންކަމާއި ރައްކާތެރި ކަމާއިއެކު ފަށާނެކަމަށް މުއިއްޒު ވިދާޅުވިއެވެ.
އަޅުގަނޑުމެން ޤާއިމް ކުރާނީ ރައްޔިތުންނާއި އެކީ ހިނގާނެ ސަރުކާރެއް. ތިރިން މައްޗަށް ސަރުކާރު ހިނގާނީ. މަތިން ތިރިއަށް އޯޑަރު އަންނަ ސަރުކާރެއް ނޫން އަޅުގަނޑުމެން ހިންގާނީ. ވެރިކަން ކުރާނީ ރައްޔިތުންނާއި ގުޅިގެން ރައްޔިތުންގެ މަޝްވަރާއާއިއެކު.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ފައިނުގެ ރައްޔިތުންގެ އެދޭ ތަރައްޤީ ހާސިލް ކޮށްދެއްވާނެ ކަމަށެވެ. އެގޮތުން ފައިނުގެ ރައްޔިތުން އެދޭ ފަދަ މޫދަށް އެރޭނެ ޒަމާނީ ބީޗެއް ގާއިމް ކޮށްދެއްވާނެކަމަށެވެ. އަދި މިހާރު ރަށުގައި ސްލޯ ސްޕީޑުގައި ހިނގަމުންދާ މަސައްކަތްތައް ބާރު ސްޕީޑުގައި ގެންގޮސް ނިންމާލެ ދޭނެ ކަމުގެ ޔަގީންކަން މުއިއްޒު ވަނީ ދެއްވާފައެވެ.
