ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އިސްވެ އުފެއްދެވި ދަ ޑިމޮކްރެޓްސް އިންވެސް އެއްވެސް ރިޠާސީ ކެންޑިޑޭތަކަށް ތާޢީދު ނުކުރުމަށް ނިންމައިފިއެވެ.
އެޕާޓީން ވަނީ "ޚަބަރު އޮންލައިން"އަށް ކަށަވަރުކޮށްދީފައެވެ. ރިޔާސީ އިންތިޚާބުގައި ދެވަނަ ބުރުގައި ވާދަކުރައްވާ ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒާއި، އެމްޑީޕީގެ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް ވަނީ ދެވަނަ ބުރަށް ކޯލިޝަން ހެދުމަށް ދަ ޑިމޮކްރެޓްސްއަށް ދަޢުވަތު ދެއްވާފައެވެ. ނަމަވެސް އެޕާޓިން ހުށައެޅި ކަންކަމަށް އެއްބަސްވުމަށް މިއަދާއި ހަމައަށް ޑިމޮކްރެޓުން ވަނީ ސުންގަޑި ދެއްވާފައެވެ. ނަމަވެސް އެއްވެސް ކެންޑިޑޭޓަކަށް ދަ ޑިމޮކްރެޓްސްގެ ހުށައެޅުން ޤަބޫލުކޮށްފައި ނުވުމުން، އެޕާޓީން ނިންމީ އެއްވެސް ކެންޑިޑޭޓަކަށް ތާޢީދު ނުކުރުމަށެވެ.
ޑިމޮކްރެޓްސްގެ ކައުންސިލުން މީގެ ދެރޭ ކުރިން ބޭއްވި ބައްދަލުވުމުގައި ނިންމީ ރާއްޖޭގައި އޮންނަން ފެންނަ ވެރިކަމުގެ ނިޒާމާއި ގުޅޭގޮތުން 28 ސެޕްޓެމްބަރު 2023ގެ ކުރިން ފެންނަ ނުފެންނަ ވޯޓެއް ނެގުމަށާއި، 20 ސެޕްޓެމްބަރު 2023ގެ ކުރިން އެމްޑީޕީން އެއްބަސްވާނަމަ އެ ޕާޓީއާއެކު މަޝްވަރާ ކުރުމަށެވެ.
އަދި ޕީޕީއެމްއާއެކު ސަރުކާރު އުފެއްދުމަށް ޑިމޮކްރެޓްސް ބައިވެރިވާނެ މިންވަރާއި، އެ ސަރުކާރުގައި ޑިމޮކްރެޓްސްގެ ސިޔާސަތުތައް ހިމެނޭނެ މިންވަރު ބަޔާން ކުރާ ލިޔުމެއްގައި 20 ސެޕްޓެމްބަރު 2023ގެ ކުރިން އެ ޕާޓީން ސޮއި ކުރަން އެއްބަސްވާނަމަ ޕީޕީއެމް އާއެކު މަޝްވަރާ ކުރުމަށްވެސް އެއް ނުކުތާގައި ވެއެވެ.
ތިން ވަނަ ނުކުތާގައި ވަނީ އެމްޑިޕީއާއި ޕީޕީއެމް އިން ހުށަހަޅާ ހުށަހެޅުންތައް އެ ދެ ޕާޓީން ކުރެ އެއްވަސް ޕާޓީއެއް އެއްބަސްނުވާނަމަ އިންތިހާބުގައި ވާދަ ކުރާ އެއްވެސް ޕާޓީއަކަށް ޑިމޮކްރެޓްސް އިން ތާއިދު ނުކުރުމަށް އެ ޕާޓީގެ އިންޓަރިމް ކައުންސިލުން ނިންމުން ހިމެނެއެވެ.
މައުލޫމާތު ލިބިފައިވާ ގޮތުގައި ދެ ޕާޓީއަށްވެސް ޑިމޮކްރެޓްސްގެ ހުށަހެޅުންތަކަށް ތާއީދު ނުކުރެއެވެ. ޑިމޮކްރެޓްސް އިން ގޮތް ނިންމަން ބޭއްވި ކައުންސިލްގައި ވާހަަކަ ދެއްކެވި ހުރިހާ މެމްބަރުންވެސް ވަނީ ރައީސް ޞާލިހު ނޫން ގޮތެއް ހޯދަން ޖެހޭކަމަށް ބުނެފައެވެ. އަދި ދެވަނަ ބުރުގައިވެސް ރައީސް ޞާލިހަށް ތާއީދު ނުުކުރެވޭނެކަމަށް ބުނެފައެވެ.
