ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާޢީދު ނުކުރުމަށް، ރިޔާސީ އިންތިޚާބުގައި އަމިއްލަގޮތުން ވާދަކުރެއްވި އަޙްމަދު ފާރިސް މައުމޫން ނިންމަވައިފިއެވެ.
ފާރިސް މިގޮތަށް ނިންމެވީ، އިންތިޚާބުގެ ފުރަތަމަބުރުން ލިބިވަޑައިގެންނެވި ނާކާމިޔާބީއާއި ގުޅިގެން، ދެވަނަ ބުރަށް ދަތުރުކުރި އެމްޑީޕީންނާއި ޕީޕީއެމް/ޕީއެންސީން އެޕާޓިތަކާއެކު ކޯލިޝަން ހެދުމަށް ދައުވަތު ދެއްވާފައިވަނިކޮށެވެ. އިންތިޚާބުގެ ފުރަތަމަ ބުރުން ފާރިސްއަށް ލިބިވަޑައިގަތީ 2،979 ވޯޓެވެ. އެއީ 1.45 އިންސައްތައެވެ.
ކޯލިޝަން ހެދުމަށް އެމްޑީޕީއާއި، ޕީޕީއެމް/ޕީއެންސީން ދެއްވި ދަޢުވަތާއެކު ފާރިސްވަނީ އެނާގެ ފަރާތުން ހުށައެޅުންތަކެއް އެޕާޓީތަކަށް ފޮނުވާފައެވެ. އެހުށައެޅުންތަކަުގެ ތެރޭގައި އެއްވެސް ގައުމެއްގެ އަސްކަރީ އެއްވެސް ބަޔަކު އުޅޭ ނަމަ އޭގެ ސަބަބާއި އެ މައުލޫމާތުތައް ރައްޔިތުންނާ ހިއްސާ ކުރުމާއި، އުތުރު ތިލަފަޅުގެ އެއްބަސްވުމާއި، ހދ. ހަނިމާދޫ އިންޓަނޭޝަނަލް އެއާޕޯޓް ހެދުމުގެ އެއްބަސްވުމާއި އައްޑޫ އިންޓަނޭޝަނަލް އެއާޕޯޓްގެ އެއްބަސްވުމާއި، އައްޑޫ ޕޮލިސް އެކަޑެމީގެ އެއްބަސްވުން ރައްޔިތުންގެ މަޖިލީހާ ހިއްސާ ކުރުން ހިމެނެއެވެ.
އެ އެއްބަސްވުންތައް ރައްޔިތުންގެ މަޖިލިހަށް ފޮނުވަން ޑރ.މުއިއްޒަށް، ފާރިސް ދެއްވީ ވެރިކަން ލިބިވަޑައިގަންނަވާތާ ފުރަތަމަ 50 ދުވަހެވެ. ރައީސް އިބްރާހިމް މުހައްމަދު ޞަލިޙަށް މިހާރުން މިހާރަށް އެއްބަސްވުންތައް މަޖިލިހަށް ޝަރުތުކުރިއެވެ. ބޭރުގެ އަސްކަރިއްޔާގެ މައުލޫމާތު ވެސް މިހާރުން މިހާރަށް ރައްޔިތުންނާ ހިއްސާ ކުރަން ފާރިސް ވަނީ ރައީސް އިބްރާހިމް މުހައްމަދު ާަލިޙަށް ހުށަހަޅުއްވައިފަ އެވެ. މުއިއްޒަށް ދެއްވީ ވެރިކަން ލިބޭތާ ފުރަތަމަ 50 ދުވަހެވެ.
ޗާގޮސްގެ މައްސަލައާ ގުޅޭ ކަންކަމާއި، ރައްޔިތުންގެ މަޖިލިހުގެ މެމްބަރުންގެ އަދަދު މަދުކޮށް، މުސާރަ ކުޑަކުރުމާއި މެމްބަރުން ވަކި ކުރެވޭނެ ގޮތްތަކެއް ކަނޑައެޅުމާއި މެމްބަރަކަށް ވުމުގެ ޝަރުތު ޒަމާނީ ގޮތަށް ބަދަލު ކުރުމާއި މެމްބަރުން ވިޔަފާރި ކުރުން މަނާކުރުންވެސް ފާރިސްގެ ޝަރުތުގެ ތެރޭގައިވެއެވެ. އަދި އަންހެނުންގެ ނިސްބަތް އިތުރު ކުރުމަށްޓަކައި ކޯޓާއެއް ކަނޑައެޅުމާއި، ހާއްސަ އެހީއަށް ބޭނުންވާ މީހުންނާއި އިސްރަށްވެހިންނާއި ފަންނީ މީހުންނަށް އެކަނި މަޖިލިހަށް ކުރިމަތިލެވޭ ގޮތް ހެދުމަށްޓަކައި "ނޭޝަނަލް ކޮންސްޓިޓިއުޓަންސީ" ގޮނޑިތަކެއް ހާއްސަކުރުމަށްވެސް ފާރިސް ހުށައަޅުއްވާފައިވެއެވެ.
ފާރިސްގެ އެހުށައެޅުއްވުންތަކަށް ޕީޕީއެމް/ޕީއެންސީން ޖަވާބެއް ނުދެއްވައެވެ. ނަމަވެސް އެމްޑީޕީން ޖަވާބު ދެއްވިނަމަވެސް، އެއީ ފާރިސް އެދޭގޮތަށް ޤަބޫލުކޮށްފައިވާ ކަންކަން ނޫންކަމަށް ވަނީ ހާމަކުރައްވާފައެވެ.
ފާރިސްގެ ހުށައެޅުމުގައި ރައީސް ޢަބްދުﷲ ޔާމީނަށް އިންސާފު ހޯދައިދެއްވުންވެސް ހިމެނެއެވެ. އަދި ކޯވިޑްތެރޭގައި ވެންޓިލޭޓަރު ގެނައުމުގައި ހިންގި ކަންކަންބަލައި ގެއްލުނު ފައިސާ ހޯދުންވެސް ހިމެނެއެވެ.
އެއްވެސް ކެންޑިޑޭޓަކަށް ތާޢީދު ނުކުރުމަށް ފާރިސް ނިންމެވިއިރު، ޖުމްހޫރީ ޕާޓީގެ ލީޑަރު ޤާސިމް އިބްރާހީމްވެސް ނިންމެވީ އެއްވެސް ކެންޑިޑޭޓަކަށް ތާޢީދު ނުކުރުމަށެވެ.
ފާރިސް ވިދާޅުވީ އެނާގެ މެނިފެސްޓޯގައި ހުރި ކަންކަން ރައްޔިތުންނަށް ވަރަށް ކަމުދިޔަކަމަށެވެ. ފާރިސް ވިދާޅުވީ، ކެންޑިޑޭޓުންނަށް ލިބުނު ވޯޓުގެ ނިސްބަތުން ދައްކަނީ އެއްވެސް ބައެއްގެ މެނިފެސްޓޯ ފުރިހަމަ ނުވާކަންކަމަށެވެ. އަދި ފާރިސްއާއި، ރަނިންމޭޓް އަބްދުއްޞައްތާރު ޔޫސުފަށްވެސް މާ ބޮޑު ތާޢީދެއް އޮތްކަމަށް ޤަބޫލު ނުކުރައްވާކަމަށެވެ.
