ސިފައިންގެ ބޭފުޅުންނަށް ވަކި ގޮތަކަށް ވޯޓުލުމަށް އަންގައި ބިރުދައްކާއި، އިންޒާރު ދެމުން ކަމަށާއި، އެކަންކަން މިހާރުން މިހާރަށް ހުއްޓާލުމަށް ޕީއެންސީގެ ނައިބް ރައީސް އިބްރާހިމް ޝުޖާ ގޮވާލައްވައިފިއެވެ.

ޝުޖާ ވިދާޅުވީ ސިފައިންގެ ތެރެއިން ވަކިވަކި މުވައްޒިފުންނާއި އޭނާގެ ސިޔާސީ ފިކުރު ހުރި ގޮތާއި ގުޅޭގޮތުން ސިފައިންގެ ވަކި ބޭކަލަކު އިސްވެހުރެ، ސުވާލު ކުރަމުންދާކަމަށެވެ. ޝުޖާ ވިދާޅުވީ މިގޮތަށް ސުވާލު ކުރަމުންދަނީ ޖެނެރަލް ޒުހުރީ (ޒޫޓް) ކަމަށެވެ. ޒުހުރީ ގެންދަނީ ވޯޓަށް ނުފޫޒު ފޯރުވައި ސިފައިންނާއި ވަކިވަކިން ސުވާލުކޮށް ވަޒީފަގެ ބިރު ދައްކަމުން ކަމަށެވެ.

ދިވެހި ޤައުމީ ދިފާއީ ބާރުގެ ތެރެއިން ޖެނެރަލް ޒުހުރީ (ޒޫޓް) ދަނީ ސިފައިންގެ ބޭކަލުން ހާޒިރުކޮށް ބިރު ދައްކަމުން. ތާއީދު ކުރަނީ ޔާމީނަށްހޭ؟ ޔާމީން ފިކުރުހޭ؟ މުޢިއްޒުއަށްހޭ ވޯޓް ދޭނީ ކިޔާ ތަފާތު އިންޒާރުތައް ދަނީ ދެމުން. ތިބޭފުޅާގެ ތި މުޑުދާރު އަމަލު ވަގުތުން ހުއްޓާލުމަށް ނަސޭހަތްތެރިވަން. ތިޔަ މުއައްސަސާ ހަރާބު ނުކުރެއްވުން އެދެން. ދިވެހި ރައްޔިތުން ގޮތް ނިންމަވާނެ. މިހާރުވެސް ތިއްބެވީ ނިންމައިގެން. ތިޔަހެން ދައްކާހާ ބިރަށް ސިހޭނެ ރައްޔިތެއް މިހާރު ނެތް. ތިބޭފުޅާގެ އަމަލުތައް އަޅުގަނޑުމެންނަށް ބަރާބަރަށް ލިބޭ.

– ޝުޖާ ވިދާޅުވިއެވެ.

ޝުޖާ ވިދާޅުވީ ރާއްޖޭގެ ސަލާމަތީ ބާރުތަކުގަިއ މަސައްކަތް ކުރައްވަނީ ވަރަށް ޚިދުމަތްތެރި ޤައުމުދެކެ ލޯބިވާ ދަރިންތަކެއް ކަމަށެވެ. އެބޭކަލުންނަކީ ސިޔާސީ ގޮތުން ދައްކާ ބިރަކަށް ފަސްޖެހޭނެ ބައެއް ނޫންކަމަށެވެ. އެއަށްވުރެ ޤައުމަށް މާބޮޑަށް ލޯބިހުރި ބަޔަކު ތިބި މުވައްސަސާތަކެއް ކަމަށެވެ. ސިފައިންނާއި ފުލުހުންނަކީ ސިޔާސީ ނުފޫޒުނން އެއްކިބާވެފައިވާ ތަނަކަށް ހަދާނީ ޑރ. މުއިއްޒުގެ ޒަޢާމަތެއްގައި ކަމަށް ޝުޖާ ވިދާޅުވިއެވެ.

ޑރ. މުއިއްޒު ވަނީ ވެރިކަމުގެ ފަސް އަހަރުގެ ތެރޭގައި ސިފައިންނާއި ފުލުހުންގެ މުސާރަ ދެގުނަ ބޮޑުކޮށް ދެއްވާނެކަމަށް ވިދާޅުވެފައެވެ. އެކަން ކުރާނީ ވެރިކަމުގެ ފަސް އަހަރަށް ބަހާލައިގެން އިންޒިމާތީ ގޮތެއްކަމަށް މުއިއްޒު ވިދާޅުވިއެވެ.