މަޖިލީހުގެ ޖަލްސާއަށް ވަދެވަޑައިނުގެންނެވީ އިދިކޮޅުން ކެމްޕެއިން ޖަގަހައަކަށް މަޖިލިސް ބަދަލުކޮށްފައިވާތީކަމަށް އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
ޝަރީފް މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގެ އެޖެންޑާގައި ހުރި ކަންކަމާއިމެދު ކަންބޮޑުވެ ޖަލްސާގައި ބައިވެރިވުމަށް އެމްޑީޕީގެ މެމްބަރުން ދެކޮޅު ހައްދަވައި މަޖިލިސް ކުރިއަށް ނުގެންދެވިފައިވަނިކޮށެވެ.
މިއަދުގެ ޖަލްސާ ކޯރަމް ހަމަނުވެގެން އެކި ފަހަރުމަތިން މަޖިލީހުގެ ރިޔާސަތުން މަސައްކަތްކުރެއްވިއެވެ. އެމްޑީޕީގެ މެންބަރުންގެ އެންމެ ބޮޑު ހިތްހަމަ ނުޖެހުމަކީ މަޖިލީހުގެ އެޖެންޑާގައިވާ ކަންކަމެވެ. އެއީ މަޖިލީހުގެ ބަިލްތަކުގެ ބަދަލުގައި ބައެއް ޤަރާރުތައް އެޖެންޑާކުރުމެވެ.
އައްޑޫ ޝަރީފް ވިދާޅުވީ މަޖިލީހުގެ ތަޅުމަށް ނުވަދެ ތިއްބެވީ، މަޖިލިސް އިދިކޮޅު ކެމްޕެއިން ޖަގަހައަކަށް ބަދަލުކޮށްފައިވާތީކަމަށެވެ. ސަރުކާރުން ހުށައަޅަފައިވާ މުހިންމު މައްސަލަތައް ބަހައްޓާފައި އިދިކޮޅު ޤަރާރު ހުށައަޅައިގެން ކެމްޕެއިން ބަހުސް ކުރަނީކަމަށް ޝަރީފް ތުހުމަތުކުރެއްވިއެވެ. އަދި އެމްޑީޕީގެމެންބަރުންނަށް ފުރުޞަތެއް ނެތްކަމަށްވެސް ޝަރީފް ވިދާޅުވިއެވެ.
މަޖިލީހުގެ މިއަދުގެ އެޖެންޑާއާއި ގުޅޭގޮތުން މަޖިލީހުގެ ރައީސް ނަޝީދު ވިދާޅުވީ މަޖިލިސްގެ އެޖެންޑާ އާއި ގުޅޭ ގޮތުން ޝަކުވާއެއް ލިބިވަޑައިގެންފައިވާ ކަމަށެވެ. އެއީ މަޑުއްވަރީ ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ ދިވެހިރާއްޖޭގެ މަސްކަނޑުން ގެއްލުނު ބައި ހޯދުމުގެ މަސައްކަތް އަވަހަށް ފެށުމަށް ސަރުކާރަށް ގޮވާލައި ހުށަހަޅާފައިވާ ޤަރާރުގެ ބަހުސް އެޖެންޑާ ކުރުމުން ލިބިފައިވާ ޝަކުވާއެއް ކަމަށް ނަޝީދު ވިދާޅުވިއެވެ. ނަޝީދު ވިދާޅުވީ އެ ޤަރާރު އެޖެންޑާ ކޮށްފައި ވަނީ މަޖިލީހުގެ ގަވައިދާއި އެއްގޮތައް ކަމަށެވެ.
