ރައީސް އިބުރާހިމް މުހައްމަދު ސާލިހުގެ ސަރުކާރުގެ ފިޝަރީޒް މިނިސްޓްރީގެ ސްޓޭޓް މިނިސްޓަރުކަމުގެ މަގާމުގައި ހުންނެވި މުހައްމަދު މަނިކު ޕީޕީއެމްއަށް ސޮއި ކޮށްފިއެވެ. އޭނާ ޕީޕީއެމްއަށް ސޮއި ކޮށްފައިވަނީ އިދިކޮޅު ކެނޑިޑޭޓް ޑރ. މުހައްމަދު މުއިއްޒުއަށް ތާއީދު ހޯދުމަށް ޕީޕީއެމް/ޕީއެންސީން ރޭ އާރޓިފިޝަލް ބީޗް ސަރަހައްދުގައި ބޭއްވި ޖަލްސާގައެވެ.
ޖުމުހޫރީ ޕާޓީގެ ސްލޮޓެއްގައި ސްޓޭޓް މިނިސްޓަރުކަމަށް ހަމަޖެއްސި، މުހައްމަދު މަނިކު ޕީޕީއެމްއަށް ސޮއި ކުރިއިރު އޭނާ މަގާމުން އިސްތިއުފާ ނުދެއްވާކަމަށްވެސް ވަނީ މައުލޫމާތު ލިބިފައެވެ. އޭނާ ފާއިތުވި 5 އަހަރުވެސް ހުންނެވީ ފިޝަރީޒް މިނިސްޓްރީގެ ސްޓޭޓް މިނިސްޓަރުކަމުގެ މަގާމްގައެވެ.
ރޭ އާރޓިފިޝަލް ބީޗުގައި އޮތް ޖަލްސާގައި އިދިކޮޅު ޕީޕީއެމްއަށް ގިނަ ބަޔަކު ސޮއި ކޮށްފައިވާއިރު، އޭގެ ތެރޭގައި ޕީއެސްއެމްގެ ކުރީގެ ޑެޕިއުޓީ އެމްޑީ ޝަޔާން ޝާހިދުވެސް ހިމެނެއެވެ. އޭނާއަކީ ބަނގުރަލާއެކު މިދިޔަ މަހު ފުލުހުން ހައްޔަރު ކުރި މީހެކެވެ. އޭނާ ފަހުން ކޯޓުން ދޫކޮށްލާފައިވަނީ ޝަރުތުތަކާއެކުއެވެ.
ސަރުކާރުގެ އިސް މަގާމްތަކުގައި ތިއްބެވި ބައެއް ފަރާތްތަކުން، މިހާރުވެސް ތިއްބެވި މަގާމްތައް ދިފާއު ކުރުމުގެ މަގްސަދުގައި، އިދިކޮޅު ޕީޕީއެމްއަށް މިދުވަސްވަރު ސޮއި ކުރަމުންދާކަން ފާހަގަ ކޮށްލެވެއެވެ. މިގޮތުން ސޮއި ކުރާ ބައެއް ފަރާތްތަކުން ސިޔާސީ ފިކުރު ކުއްލިގޮތަކަށް ބަދަލު ކުރިނަމަވެސް މަގާމުން އިސްތިއުފާ ނުދެއްވާކަންވެސް ފާހަގަ ކޮށްލެވެއެވެ.
