މިފްކޯއިން މަސް ކިލޯއެއް ގަންނަ އަގު މާދަމާއިން ފެށިގެން 25ރ. އަށް ބޮޑުކުރަން ނިންމައިފިއެވެ.
މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ވިދާޅުވީ، ރައީސް އިބްރާހިމް މުހައްމަދު ސޯލިހު މިރޭ ބައެއް މަސްވެރިންނާއި ބައްދަލު ކުރައްވައި، އެކަމުގެ މަޝްވަރާތައް މިފްކޯއާއި ހިއްސާ ކޮށްފައިވާ ކަމަށެވެ. އިސްމާއީލް ވިދާޅުވީ، ރައީސްގެ ނިންމެވަކީ މީގެ ކުރިން 17 ރުފިޔާއަށް ގަންނަމުން ދިޔަ މަސް ކިލޯއެއް މާދަމާއިން ފެށިގެން 25 ރުފިޔާއަށް ގަތުމަށް ކަމަށެވެ.
އަޅުގަނޑުމެންނަށް ކޮންމެ އަހަރެއްގެ އޮގަސްޓުން ފެށިގެން އަނެއް އަހަރު އޭޕްރިލްއަށް މަސް ލިބޭ. ފާއިތުވި އަހަރުތަކުގައި ވެސް އޮގަަސްޓްގެ ފަހު ހަފްތާއިން ފެށިގެން މަސް ލިބުނު. އެހެން ނަމަވެސް ކޮންމެ ވެސް ސަބަބަކާއި ހުރެ މިފަހަރު މަސްވެރިކަން ދަށްވެ، މިފްކޯއަށް މަސް ލިބޭ ވަރު ދަށްވި. ގާތްގަނޑަށް 70 ޓަން ވެސް ނުލިބޭ ދުވަހަކަށް.
– ފައުޒީ ވިދާޅުވިއެވެ.
މަސް ގަންނަ އަގު ބޮޑުކުރިއިރު، ޔޫރަޕަށް އެކްސްޕޯޓު ކުރާ މަހުގެ ޑިއުޓީ ކުޑަކުރުމަށް ވެސް ސަރުކާރުން އަންނަނީ މަސައްކަތް ކުރަމުންނެވެ. އެކަމުގެ މަޝްވަރާތައް ޕޮޒިޓިވްކޮށް ކުރިއަށް ދާ ކަމަށް ސަރުކާރުން މީގެ ކުރިން ބުންޏަސް، އޭގެ އެންމެ ފަހުގެ ތަފްސީލެއް ނުލިބެއެވެ.
ރާއްޖެއިން މިހާރު ޔޫރަޕަށް ފޮނުވާ މަހުގެ ޑިއުޓީގެ ގޮތުގައި 22 ޕަސެންޓް ނަގަ އެވެ. އެހެންވެ، ރާއްޖެއިން ޔޫރަޕް މާކެޓަށް ވިއްކާ މަހުގެ އަގު ވަރަށް ބޮޑަށް ވަނީ އުފުލިފައެވެ.
