2022 ވަނަ އަހަރު ގަތަރުގައި އޮންނަ ވޯލްޑްކަޕަށް ކޮލިފައިވުމަށްޓަކާ ކުޅޭ ޔޫރަޕުގެ ކޮލިފައިން ބުރުގައި ނެދަލޭންޑް ވަރުގަދަ ގުރޫޕެއްގައި ލައްވަާލައިފިއެވެ.

މުބާރާތުގެ ކޮލިފައިން ބުރުގައި ނެދަލޭންޑް ލައްވާލީ އެއްވަރެއްގެ ދެޓީމު ހިމެނޭ ގުރޫޕް ޖީ ގައެވެ. މި ގުރޫޕްގައި ދެން ހިމެނެނީ ތުރުކުއީ އާއީ ނޯވޭއެވެ. މި ދެޓީމުގެ ފަރާތުން ނެދެލޭންޑަށް ޕްރެޝަރެއް ކުރިމަތިވާނެކަމަށް ބެލެވޭއިރު މި ގުރޫޕްގައި ދެން ހިމެނެނީ މޮންޓެނީގްރޯ އާއި ލެޓްވިޔާ އިތުރުން ޖިބްރަލްޓާއެވެ.

މުބާރާތުގައި ކޮލިފައިން ބުރުގައި އިނގިރޭސީން ލައްވާލީ ނިސްބަތުން ފަސޭހަ ގުރޫޕެއްގައިއެވެ. އިނގިރޭސި ކޮލިފައިން ގުރޫޕް "އައި" ގައި ވާދަކުރާނީ ވޯލްޑްކަޕް ކޮލިފައިންގައި 6 ފަހަރު ވާދަކޮށްފައިވާ ޕޯލެންޑާ އެއް ގުރޫޕެއްގައިއެވެ. ޕޯލެންޑް ވޯލްޑްކަޕް ކޮލިފައިންގައި އިނގިރޭސީންނާ އެންމެފަހުން ބައްދަލުކުރީ 2014 ވަނަ އަހަރު އެވެ. އެ މެޗު އިނގިރޭސިން ކާމިޔާބުކުރީ 2-0 ލަނޑުންނެވެ. މެކްސިކޯގައި 1986ގައި ބޭއްވި ވޯލްޑްކަޕްގައި މި ދެޓީމް ވަނީ ވާދަކޮށްފައެވެ. މި ގުރޫޕްގައި މި ދެޓީމު އިތުރުން ދެން ހިމެނެނީ ހަންގޭރީ، އަލްބޭނީޔާ، އެންޑޯރާގެ އިތުރުން ސަންމަރިޔޯއެވެ.

އެންމެފަހުގެ ޗެމްޕިއަން ފްރާންސް ލައްވާލީ ޔުކްރެއިން، ބޮސްނިޔާ، ފިންލޭންޑް އަދި ކަޒަކިސްތާނާ އެއް ގުރޫޕެއްގައެވެ. ޔޫރަޕުގެ ޗެމްޕިއަން ޕޯޗުގަލް ލައްވާލީ ސާބިޔާ، ރިޕަބްލިކް އޮފް އަޔަލެންޑް، ލަގްޒަމްބާގް އާއި އަޒަރުބައިޖާނާ އެއް ގުރޫޕެއްގައެވެ. ސްޕެއިނާއި ސްވިޑަން ހިމެނޭ ގުރޫޕްގައި ހިމެނެނީ ގްރީސް، ޖޯޖިޔާ އަދި ކޮސޯވޯއެވެ.

އިޓަލީ ކޮލިފައިން ބުރުގައި ވާދަކުރާނީ ނޮދަން އަޔަލެންޑް، ސްވިޒަލެންޑް، ބަލްގޭރިޔާގެ އިތުރުން ލިތުއޭނިޔާއާ އެއް ގުރޫޕެއްގައެވެ. މި ގުރޫޕްގައި ހިމެނޭ ސްވިޒަލޭންޑް ވަނީ 2018 ކޮލިފައިން ޕްލޭއޯފްގައި ނޮދަން އަޔަލޭންޑްގެ މައްޗަށް ކުރި ހޯދާފައެވެ. 2006 ވަނަ އަހަރު ވޯލްޑްކަޕް ތަށި އުފުލާލި އިޓަލީ މިވަގުތު ދެނިޔޭގެ ރޭންކިންގެ ދެ ވަނާގައި އޮތްއިރު ސްވިޒަލޭންޑް އޮތީ 16 ވަނާގައެވެ.

ދުނިޔޭގެ ރޭންކިންގެ އެއް ވަނާގައި ވާ ބެލްޖިއަމް، ވޭލްސްއާ އެއް ގުރޫޕެއްގައި ހިމެނުނު އިރު މީގެ ހަތަރު އަހަރުކުރިން މިދެޓީމު ޔުރޯ ފުޓްބޯޅަ މުބާރާތުގައި ވާދަކުރި މެޗު ފަހަތުން އަރައި 3-1 މޮޅުވެ ވޭލްސް ވަނީ ފުރަތަމަ ފަހަރަށް ބޮޑު މުބާރާތެއްގެ ސެމީފައިނަލުން ޖާގަހޯދާފައެވެ. ދެން މި ގުރޫޕްގައި ހިމެނެނީ ޗެޗްރިޕަބްލިކް، ބެލަރޫސްގެ އިތުރުން އެސްޓޯނިޔާއެވެ. ކޮލިފައިންގައި ސްކޮޓްލެންޑް ލައްވާލީ ޑެންމާކާއެކު އެއް ގުރޫޕެއްގައެވެ.

1998 އަހަރުގެ ފަހުން ވޯލްޑްކަޕަށް ކޮލިފައިވުމުގެ އުންމީދުގައި އޮތް ސްކޮޓްލޭންޑުން މިގުރޫޕްގައި ވާދަކުރަން ޖެހިފަވާ ފެރޯ އައިލޭންޑް އާއި މޯލްޑޯވާ އަތުން އަދި ބަލިވެފައެއް ނުވެއެވެ. ގުރޫޕްގައ އެންމެ ވަރުގަދަ ކުރިމަތިލުމަކަށް ވާނެކަމަށް ބެލެވޭ ޑެންމާކާ އެންމެފަހުން ވާދަކުރި 16 މެޗުގެ ތެރެއިން ޑެންމާކް ވަނީ 10 މެޗު ކާމިޔާބުކޮށްފައެވެ.

މުބާރާތުގެ ކޮލިފައިން ބުރު ކުރިޔަށްދާނީ އަންނަ މާޗް މަހުން ފެށިގެން ނޮވެންބަރުގެ ނިޔަލަށެވެ. ކޮންމެ ގުރޫޕަކުން ވެސް އެއްވަނައަށްދާ ޓީމެއް މުބާރާތައް ކޮލިފައިވާއިރު ދެވަނައަށްދާ ޓީމުތަކުގެ މެދުގައި ކޮލައިފަން ޕެލޭއޯފް ބުރެއް ކުޅޭނެއެވެ. ގުރޫޕްތަކުގެ ދެވަނައަށްދާ 10 ޓިމާއި ކޮލިފައިންގައި ކުރި ނުހޯދުނު އެކަމުކު ނޭޝަންސް ލީގުގައި އެންމެ ރަނގަޅު ނަތީޖާ ހޯދި 12 ޓީމާއެކު ޕްލޭއޯފް ބުރެއް ކުޅުމަށްފަހު އެތަނުން 3 ޓީމާއެކު ވޯލްޑްކަޕްއަށް ދާނީ ޔޫރަޕުގެ 13 ޓީމެވެ.

ކޮލިފައިން ޕްލޭއޯފް މެޗުތައް އޮންނާނީ 2022ވަނަ އަހަރު މާޗްމަހުގައެވެ. ވޯލްޑްކަޕް އޮންނާނީ 2022 ވަނަ އަހަރު ނޮވެންބަރު މަހުގެ 21 އިން ޑިސެންބަރުމަހުގެ 18 އަށް ގަތަރުގައެވެ. މިއީ ފިނިމޫސުމުގައި ބާއްވާނެ ފުރަތަމަ ވޯލްޑް ކަޕް މުބާރާތެވެ.