ރިޔާސީ އިންތިޚާބުގެ ފުރަތަމަ ބުރުގައި އެންމެ ބޮޑު ގެއްލުމެއްވީ ވާދަވެރި ފަރާތްތަކުން ރާއްޖޭގެ މިނިވަންކަމާއި ގުޅޭގޮތުން ދެއކި ވާހަކަތަކަށް ރައްދު ނުދެވުމުން ކަމުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ އިންތިޚާބުގެ ފުރަތަމަ ބުރުގައި ހެދުނު މިސްޓޭކްސްތަކާއި ގުޅޭގޮތުން ރާއްޖެ ޓީވީގައި ވާހަކަ ދައްކަވަމުން ރައީސް ޞާލިހު ވިދާޅުވީ ވާދަވެރި ފަރާތްތަކުން ރާއްޖޭގެ މިނިވަންކަމާއި ގުޅޭގޮތުން ދެއްކި ވާހަކަތަކަށް ރައްދު ދެވިފައި ނުވާކަމަށެވެ. މިއީ ހެދުނު ވަރަށް ބޮޑު މިސްޓޭކެއް ކަމަށް ރައީސް ވިދާޅުވިއެވެ.

ރާއްޖޭގެ މިނިވަންކަން ގެއްލޭ ގޮތަށް މިސަރުކާރުން ގިނަ ކަންތައްތަކެއް ކުރާކަމަށާއި، ބޭރުގެ ސިފައިން ރާއްޖޭގައި ތިބިކަމަށް ބުނާ ވާހަކަތަކާއި، ރާއްޖޭގެ ކަނޑުން ބައެއް ދޫކޮށްލިކަމަށް ބުނެ ދައްކާ ވާހަކަތަކަށް ރައްދު ނުދެވުމަކީވެސް ވޯޓު ގެއްލެން ދިމާވި ސަބަބެއްކަމަށް ރައީސް ވިދާޅުވިއެވެ. ރައީސް ވިދާޅުވީ މިވާހަތަކުގެ ސަބަބުން ރައްޔިތުންނަށް މިނިވަންކަމުގެ ބިރު ވަރަށް ބޮޑަށް އިހުސާސް ކުރެވުނު ކަމަށެވެ.

އެއީ ދިމާއަށް އެއްވެސް ހަގީގަތެއް އޮތް ވާހަކައެއްނޫން. އެކަމުގެ ހަގީގަތް އަޅުގަނޑުމެންނަށް ހާމަ ނުކުރެވުނު. މިބުރުގައި ތިބި ބަޔަކުތިބި. އަޅުގަނޑުމެން މިބުރުގައި އެކަން ހާމަކުރާނަން. ރާއްޖެއިން އެއްވެސް ބައެއް ނުގެއްލޭކަން ހާމަކުރާނަން.

– ރައީސް ވިދާޅުވިއެވެ.

ރާއްޖޭގެ މިނިވަންކަން ކަމާއި ސިޔާދަތާއި ގުޅޭގޮތުން މިސަރުކާރުން ކޮށްފައިވާ ކަންކަމާއި ގުޅޭގޮތުން އެންމެ ބޮޑަށް ވާހަކަ ދެއްކީ ކޯލިޝަން ބައިވެރިޔާ އަދި ޖޭޕީގެ ރިޔާސީ ކެންޑިޑޭޓް ޤާސިމް އިބްރާހިމެވެ. މީގެ އިތުރުން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުއިއްޒުއާއި، އުމަރު ނަސީރާއި ފާރިސް މައުމޫނާއި، ނާޒިމްވެސް މިވާހަތައް ދައްކަވާފައިވެއެވެ.

ޤާސިމްވެސް ވަނީ މިސަރުކާރުން ޤާނޫނު އަސާސީއާއި ގާނޫނުތަކައި ޚިލާފަށް އެތައް ކަމެއް ކޮށްފައިވާކަމަށާއި، މިނިވަންކަން ގެއްލި ގައުމު ބޮޑު ބިރުވެރިކަމެއްގައި އޮތްކަމަށެވެ. މިކަންކަމުން ސަލާމަތް ވުމަށް މިސަރުކާރަށް ދެވަނަ ދައުރެއް ދޭންޖެހޭ އެއްވެސް ސަބަބެއް ނެތްކަމަށް ޤާސިމް ވިދާޅުވިއެވެ.