ދީނީ އަސާސްތައް ހިފަހަްޓާ ނަގަހައްޓަވާ ވެރިޔަކީ ރައީސް އިބްރާހީމް މުޙައްމަދު ޞާލިޙްކަމަށް ވިދާޅުވެ އެމަނިކުފާނަށް ތާޢީދުކުރައްވާކަން ބައެއް ދީނީ ޢިލްމުވެރިން ހާމަކުރައްވައިފިއެވެ.
ދީނީ ޢިލްމުވެރިންގެ ބައެއް މިކަން ހާމަކުރެއްވީ ރާއްޖޭގެ ދީނީ ޢިލްމުވެރިން ގުޅުމުން، ޢިލްމުވެރިންގެ މެދުގައި ނެގި ޚިޔާލް ހޯދުމުގެ ވޯޓުން ރާއްޖޭގެ ޢިލްމުވެރިންގެ ސާފު ޢައުލަބިއްޔަތު އޮތީ ޕީޕީއެމް/ޕީއެންސީގެ ކެންޑިޑޭޓް ޑރ.މުހައްމަދު މުއިއްޒުއަށް ކަމަށް ސާފުވެފައިވާ ދަނޑިވަޅެއްގައެވެ. މިއާއެކު ރައީސް ޞާލިޙަށް ތާޢީދުކުރައްވާ ބައެއް ޢިލްމުވެރިންނާއި ދީނީ ޢިލްމުވެރިންގެ ގުޅުމުގެ ޢިލްމުވެރިންގެ މެދުގައި ބަހުގެ ހަމަލާތަކެއް ސޯޝަލް މީޑިއާގައި ރައްދު ކުރިއެވެ.
ރައީސް ޞާލިޙަށް ތާޢީދުކުރައްވާ ވިއްސަކަށް ދީނީ ޢިލްމުވެރިން ބޭއްވި ނޫސްވެރިންގެ ބައްދަލުވުމުގައި މިސަރުކާރުގެ އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީއާއި، ރައީސް ޞާލިޙަށް ތާޢީދުކުރައްވާ ސިޔާސީ އެކިއެކި ވާހަކަފުޅުތައް ސޯޝަލް މީޑިއާގައި ލިޔުއްވަމުން ގެންދަވާ ޑރ.މުޙައްމަދު އިޔާޟް ޢަބްދުއްލަޠީފާއި، ޝައިޚް އިލްޔާސް ޙުސައިން، ޑރ.ގުބާދު އަބޫބަކުރުފަދަ ބޭފުޅުން ބައިވެރިވެވަޑައިގެންނެވިއެވެ. އަދި ޢަދާލަތު ޕާޓީއަށް ނިސްބަތްވެވަޑައިގަންނަވާ ބައެއް ޢިލްމުވެރިންވެސް ބައިވެރިވެވަޑައިގެންނެވިއެވެ.
އިސްލާމް ދީނުގެ ދައުވަތުގެ މައިދާނުގައި ހަރަކާތްތެރިވެވަޑައިގަންނަވާ ގިނަ ޢަދަދެއްގެ ދީނީ ޢިލްމުވެރިންގެ ރައުޔު ހާމަކުރެއްވުން މިއަދު ބޭއްވި ބައްދަލުވުން. pic.twitter.com/jHuCi8U5Co
— Adhaalath Party (@AdhaalathOffice) September 6, 2023
މި ނޫސްވެރިންގެ ބައްދަލުވުމުގައި ޑރ.އިޔާޟް ވިދާޅުވީ، ދީނީ ޢިލްމުވެރިންގެ ވާހަކަތަށް ރައީސް ޞާލިޙް އަބަދުވެސް އަޑު އައްސަވާކަމަށެވެ. އަދި ޢިލްމުވެރިންގެ ކަންބޮޑުވުންތަކަށް މަޝްވަރާކުރައްވާ ފަސްޖެހިވަޑައިގަތުމެއް ނެތި އެކަމެއް ޙައްލު ކޮށްދެއްވާކަމަށްވެސް އިޔާޟް ވިދާޅުވިއެވެ. އިޔާޟް ވަނީ ސްކޫލް މުދައްރިސުންގެ މޫނު ބުރުގާގެ މައްސަލަ ޙައްލުކޯށް އެމްޑީއެން އުވާލެއްވުންފަދަ ކަންކަން ރައީސް ޞާލިޙް ކުރެއްވިކަމަށް ހާމަކުރައްވާފައެވެ.
ޝައިޚް އިލްޔާސް ޙުސައިން ވިދާޅުވީ، މީގެ ކުރިން ވެރިކަންކުރެއްވި ބޭފުޅުންގެ ތެރެއިން ރުޅި އިސްނުކުރައްވާ، ރުންކުރުކަން ނުދައްކަވާ، މަޑުމައިތިރި ނިންމުންތައް ނިންމަވާ ވެރިއަކީ ރައީސް ޞާލިޙްކަމަށެވެ. އަދި މީހުން ހިފާ ހައްޔަރުކުރުމުގެ ބަދަލުގައި، ތަފާތު ޚިޔާލުތަކުގެ މީހުންނާއެކުވެސް ރައީސް ޞާލިޙަށް މަސައްކަތްކުރެއްވޭކަމަށް އިލްޔާސް ވިދާޅިވިއެވެ.
ރައީސް ޞާލިޙަށް ދީނީ ޢިލްމުވެރިންގެ ތާޢީދު އޮތްކަމަށް މި ހާމަކުރެއްވީ ޢިލްމުވެރިންގެ ގުޅުމުގައި ހިމެނޭ ޢިލްމުވެރިންގެ މެދުގައި މިފަދަ ވޯޓެއް ނެގި ވޯޓާއި ގުޅިގެންނެވެ.
އިލްމުވެރީންގެ ގުޅުމަކީ 150 ވުރެ ގިނަ އިލްމުވެރިއަކު ހިމެނޭ ހަރަކާތެކެވެ. ޚިޔާލް ހޯދުމުމުގެ ވޯޓުގައި ބައިވެރިވީ މީގެ ތެރެއިން 105 ޢިލްމުވެރިއެކެވެ.
އިލްމުވެރިންގެ ގުޅުމަކީ ރާއްޖޭގެ އެންމެ ގިނަ ދީނީ އިލްމުވެރިންނާއި، ޝައިޚުން ނިސްބަތްވާ ހަރަކާތެކެވެ. މިހާތަނަށްވެސް ޤައުމީ އަދި ދީނީ ކަންކަމުގައި ޢިލްމުވެރިންގެ ރައުޔު ހާމަކޮށް އެބޭފުޅުން ދެކޭގޮތް ދިޔައީ ހާމަ ކުރަމުންނެވެ.
މިވޯޓުގައި ބައިވެރިވި ޢިލްމުވެރިންގެ ތެރެއިން ސާފު ޢައުލަބިއްޔަތު ލިބުނީ ޕީޕީއެމް/ޕީއެންސީގެ ކެންޑިޑޭޓް ޑރ.މުހައްމަދު މުއިއްޒުއަށެވެ. އިންތިޚާބުގައި ވާދަކުރައްވާ 8 ކެންޑިޑޭޓުންގެ މެދުގައި ކުރިއަށްދިޔަ މިވޯޓާއިމެދު ޢިލްމުވެރިންގެ ގުޅުމުގައި ހިމެނޭ ޢަދަލާތު ޕާޓީއަށް ނިސްބަތްވާ ބޭފުޅުންވެސް ވަނީ ބައިވެރިވެފައެވެ. މިވޯޓުގެ ޑރ.މުއިއްޒަށް 82 އިންސައްތަ ލިބުނު އިރު މުއިއްޒާއި ކިރިޔާވެސް ވާދަކުރައްވާ ރައީސް ޞާލިހަށް ލިބިވަޑައިގެންނެވީ 4 އިންސައްތަ ވޯޓެވެ.
