ރައީސް މައުމޫންގެ ވެރިކަމުގައި އަނިޔާ ލިބުނު ފަރާތްތަކުގެ ކިބައިން މިނިވަން ކެންޑިޑޭޓެއްގެ ގޮތުގައި ރިޔާސީ އިންތިޚާބުގައި ވާދަކުރައްވާ އަހުމަދު ފާރިސް މައުމޫން މަޢާފަށް އެދިވަޑައިގެންފިއެވެ.
ފާރިސް ޢާންމުކުރި ކުރު ވީޑިއޯއެއްގައި ވިދާޅުވީ ބައެއް ފަރާތްތަކުން މިހާރުވެސް ބައްޕާފުޅު ވެރިކަން ކުރެއްވި ދުވަސް ވަރުގައި ލިބިފައިވާ އަނިޔާތަކުގެ ވާހަކަ ދައްކަމުން ދާކަމަށެވެ. މިކަމަކީ ނުހިނގާ ކަމެއްކަމަށް ނުދެކޭ ކަމަށާއި، އެދުވަސް ވަރުގެ އަނިޔާތައް ލިބުނު ފަރާތްތަކުގެ ކިބައިން މަޢާފަށް އެދޭކަމަށް ފާރިސް ވިދާޅުވިއެވެ.
ރައީސް މައުމޫން ވެރިކަން ކުރެއްވި ދުވަސްވަރު ބަޔަކަށް އަނިޔާލިބި އަދި ހިތާމަތަކެއް ލިބިފައި ހުރިކަމަކީ ހަގީގަތެއް. އަޅުގަނޑު ގަބޫލު ކުރާކަމެއް. އަދި މިހިތާމާގައި އަދިވެސް ބަޔަކު ދެމިތިބި ކަމަކީ އަޅުގަނޑު ގަބޫލު ކުރާކަމެއް. އެއީ އަޅުގަނޑު ދޮގު ކުރާ ކަމެއްނޫން. އަޅުގަނޑު މިކަމަށްޓަކައި ތިބޭފުޅުންގެ އަރިހުން ނިހާޔަތަށް މަޢާފަށް އެދެން.
– ފާރިސް ވިދާޅުވިއެވެ.
މަޢާފަށް އެދުން: pic.twitter.com/910r53iuI0
— faris 🇲🇻 🇵🇸 (@afarismaumoon) September 5, 2023
ފާރިސް ވިދާޅުވީ މިހުރިހާ ފަރާތްތަކަށްވެސް އޭނާގެ ވެރިކަމެއްގައި ފުރިހަމަ ތަސައްލީއެއް ހޯދައި، ދެއްވާނެކަމަށެވެ. އަދި ވެރިކަން ކުރައްވާނީ މިފަދަ އެންމެހާ ކަންކަމުގެ ޒިންމާ އުފުލޭނެ ކަން ޔަގީންކޮށް އެފަދަ ކަމެއް ދިމާ ނުވާނޭހެން އަޅަންޖެހޭ އެންމެހާ ފިޔަވަޅުތައް އަޅާގެން ކަަމަށެވެ. އަނިޔާއަކީ ދުވަހަކުވެސް ތާއީދު ކުރާ ކަމެއް ނޫންކަމަށާއި، އެއްވެސް މީހަކަށް ނުހައްގުން އަނިިޔާއެއް ލިބުމަކީ ތާއީދު ކުރައްވާ ކަމެއް ނޫންކަމަށް ފާރިސް ވިދާޅުވިއެވެ.
ރައީސް މައުމޫންގެ ވެރިކަމުގައި ހިނގަދިޔަ އަނިޔާވެރިކަމުގެ ވާހަކަތައް މިހާރުވެސް ބައެއް ފަރާތްތަކުން ދަނީ ދައްކަމުންނެވެ. އެގޮތުން ޖަލުތަކުގައި ކުރި އަނިޔާއާއި، އެނޫންވެސް ގޮތްގޮތުން ކުރި އަނިޔާތަކުގެ ވާހަކަތައް ދައްކައެވެ.
ރިިޔާސީ އިންތިޚާބުގައި ވާދަކުރައްވާ ފާރިސްއަކީ ރައީސް މައުމޫންގެ އެންމެ ދޮށީ ދަރިކަލުންނެވެ.
