އަންނަ ހޮނިހިރު ދުވަހު ބާއްވާ ރިޔާސީ އިންތިޚާބު ގަނޑުބަޑުކޮށް، އިންތިޚާބު އޮޅުވާލަށް ސަރުކާރުން އިންތިހާއަށް މަސައްކަތް ކުރަމުންދާ ކަމަށް ޕީޕީއެމްގެ ރިޔާސީ ކެންޑިޑޭޓްގެ ތަރުޖަމާން މުހައްމަދު ތޮލާލް ވިދާޅުވެއްޖެއެވެ.
ރިޔާސީ އިންތިޚާބާއި ގުޅޭގޮތުން ބާއްވަމުންދާ ސިލްސިލާ ނޫސްވެރިންގެ ބައްދަލުވުންތަކުގެ ތެރެއިން މިއަދު ބޭއްވި ޕްރެސްގައި ތޮލާލް ވިދާޅުވީ މިސަރުކާރުން އިންތިހާބަށް ނުފޫޒު ފޯރުވުމަށް ކުރަމުންދާ މަސައްކަތަށް ކުޑަވެސް މަޑުޖެހުމެއް ނާންނަ ކަމަށެވެ. އިންތިޚާބު ގަނޑުބަޑު ކުރުމަށް މިސަރުކާރުން މަސައްކަތް ކުރަމުންދަނީ ވޯޓުން ބަލިވާނެކަން ކަށަވަރު ވާތީކަމަށް ތޮލާލް ވިދާޅުވިއެވެ. އެހެންކަމުން ކޮންމެ ވޯޓު ފޮއްޓެއްގެ ކައިރީގައި ހަރަކާތްތެރިވާ އޮފިޝަލުން މިކަމަށް ޚާއްސަ ސަމާލުކަމެއްދީ ވޯޓު އޮޅުވާލަން ކުޑަ ޖާގައެއްވެސް ނުދިނުމަށް ތޮލާލް ވަނީ ގޮވާލާފައެވެ.
ވޯޓު ނަގާ ދުވަހު ވަކި ހިސާބަކުން ހަމަ ނުޖެހުމަކަށް ބަދަލު ކުރުމަށް ސަރުކާރުން މަސައްކަތް ކުރާކަމުގެ މައުލޫމާތު އެބަލިބޭ. މިއީ އިންތިހާއަށް ކަންބޮޑުވުން އޮތްކަމެއް. އެފަދަ ފުރުސަތެއް އެއްވެސް ރައްޔިތަކު ނުދެއްވުމަށް ދަންނަވަން.
– ތޮލާލް ވިދާޅުވިއެވެ.
ހޮނިހިރު ދުވަހު އޮންނަ ރިޔާސީ އިންތިޚާބުގައި ވޯޓުލެވޭނީ ކަޅު ނުވަތަ ނޫކުލައިގެ އާދައިގެ ގަލަމަކުން ކަމަށާއި، އެހެން ކުލަކުލައިގެ ގަލަމުން ފާހަގަ ޖަހައިފިނަމަ ވޯޓު ބާޠިލްވާނެކަމަށް އިލެކްޝަންސް ކޮމިޝަނުން ނިންމި ނިންމުމަށް ތޮލާލް ވަނީ މަރުޚަބާ ދަންނަވާފައެވެ. ތޮލާލް ވިދާޅުވީ މިނިންމުމާއިއެކު ކުންފުނިތަކުގައި މަސައްކަތް ކުރާ މުވައްޒިފުންނަށް އެއްވެސް ބިރެއް ޖެހިލުމެއްނެތި ޑރ.މުއިއްޒުއަށް ވޯޓު ދެއްވުމުގެ ޖާގަ ތަނަވަސް ވެގެން ގޮސްފައިވާކަމަށެވެ.
ތޮލާލް ވަނީ މިޕްރެއްގައި ސަރުކާރުން ޑރ. މުއިއްޒާއި ގުޅޭގޮތުން ދައްކަމުންދާ ވާހަތަކަށްވެސް ރައްދު ދީފައެވެ. އެގޮތުން ރާއްޖޭގައި ތިބި އިންޑިއާގެ ސިފައިން ގަދަބާރުން ބާލައި، މަޝްރޫއުތައް ހުއްޓުވައި އެގްރީމަންޓުތައް ބާތިލް ކުރާނެކަމަށް ޑރ.މުއިއްޒު ވިދާޅުވިކަމަށް ވާހަކަ ދައްކަމުން ދާކަމަށެވެ. ނަމަވެސް ގަދަބާރުން އެއްވެސް ބަޔަކު މިޤައުމުން ބާލައި، ހިންގަމުންދާ މަސައްކަތްތައް ހުއްޓޭނެ އެއްވެސް ގޮތަކަށް މުއިއްޒު މަސައްކަތް ނުކުރައްވާނެ ކަމަށް ތޮލާލް ވިދާޅުވިއެވެ. މުއިއްޒު ވިދާޅުވެފައިވަނީ ޤާނޫނާއި ޚިލާފަށް ތިބި ސިފައިން މިޤައުމުން މަޝްވަރާގެ މަތީން ވާހަކަ ދެއްކުމަށްފަހު ފޮނުވާލައި، މިހާރު ހަދާފައިވާ އެއްބަސްވުންތައް ބެލުމަށްފަހު ބަދަލެއް ގެންނަން ޖެހޭ އެއްބަސްވުމެއް އޮތް ނަމަ އެކަމަކަށް ބަދަލު ގެނައުންކަމަށެވެ.
މިސަރުކާރުން ހިންގާ ތަރައްޤީގެ އެއްވެސް މަސައްކަތެއް، މަޝްރޫއެއް ހުއްޓާލުމަކީ މުއިއްޒި ކުރައްވާނެ ކަމެއް ނޫންކަމަށާއި، މުއިއްޒުގެ ވެރިކަމެއްގައި އެކަންކަން ކުރިއަސް ސްޕީޑު ބާރުކޮށް މަސައްކަތްތައް ނިންމަދޭނެކަމަށް ތޮލާލް ވިދާޅުވިއެވެ.
