މިފަސް އަހަރު ޖެހި ޕާކިން ސްޓިކާ ޖޫރިމަނާގެ ތެރެއިން ނުލިބޭ ބައި ރައީސް އިބްރާހިމް މުހައްމަދު ސޯލިހު މައާފުކޮށްދެއްވައިފިއެވެ.

ސަރުކާރުން ނެރުނު ބަޔާނެއްގައި ބުނެފައި ވަނީ މާލޭގައި ގަވާއިދުން ޕާކު ކުރާނެ ޖާގަ ނެތް ނަމަވެސް ޖޫރިމަނާ ކުރަމުންދާތީ ރައްޔިތުން ޝަކުވާ ކުރަމުން އަންނަ ކަމަށާއި އެއީ ރައީސްއަށް ވެސް ގަބޫލު ކުރެވޭ ޝަކުވާއެއް ކަމަށެވެ. ޕާކިން ޖޫރިމަނާގެ އިތުރުން އެހެނިހެން ޓްރެފިކް ވަޔަލޭޝަންތަކުގައި ކޮށްފައިވާ ޖޫރިމަނާ ދެއްކުމަށް ލުއި ގޮތްތަކެއް ހަމަޖެއްސުމަށް ވެސް ރައީސް ނިންމެވިއެވެ. އެގޮތުން ޖޫރިމަނާގެ ބާވަތަށް ބަލައި، ޓްރެއިނިން ޕްރޮގްރާމެއް ފުރިހަމަކުރުމުން ޖޫރިމަނާ ފައިސާ މައާފު ކުރުމަށް ވަނީ ނިންމައިފައެވެ.

މިކަން އެގޮތަށް ހިނގަމުންދާކަން އެމަނިކުފާނާއި ސަރުކާރަށް ވެސް ގަބޫލު ކުރެއްވޭތީ ރައްޔިތުންނަށް ލުއި ގޮތެއް ހޯއްދަވައިދެއްވުމަށް އެމަނިކުފާނު ނިންމެވީ.

– އެ ބަޔާނުގައިވެއެވެ.

އެ ޓްރެއިނިން ޕްރޮގްރާމު ހިންގާނީ ފުލުހުން ކަމަށާއި އެފަދަ ޕްރޮގްރާމަކަށް ހޭދަވާނީ ދެ ހަފުތާ އާއި މަސް ދުވަހުގެ މުއްދަތެއް ކަމަށް އެ ބަޔާނުގައި ބުނެފައިވެއެވެ.

ނުބައި ތަނެއްގައި ޕާކުކޮށްގެން ކުރާ ޖޫރިމަނާ ފައިސާއިން ނުލިބޭ ބައި މައާފު ކުރުމަށް ސަރުކާރުން މި ނިންމީ ރިޔާސީ އިންތިހާބު ބާއްވަން ހަތަރު ދުވަހަށްވެފައި އޮއްވައެވެ. ރައީސް ޕާކިން ޖޫރިމަނާތައް މަޢާފް ކޮށްދެއްވާފައިވާއިރު، ޑރ. މުއިއްޒު ވަނީ ޕާކިން ޖޫރިމަނާ މަޢާފްކޮށް ދެއްވާނެކަމަށް ވައުދުވެފައެވެ.

ރައީސް ޕާކިން ޖޫރިމަނާ މަޢާފް ކޮށްދެއްވިއިރު، އެމަނިކުފާނުގެ ތެރުޖަމާނު މާރިޔާ ދީދީ ވަނީ މުއިއްޒު މިކަން އިއުލާން ކުރެއްވުުުން ވަރަށް ބޮޑަށް ފާޑު ވިދާޅުވެފައެވެ. މާރިޔާ ވަނީ މިއީ ޕާކިންގެ މައްސަލަ ހައްދުން ނެއްޓިގެންދާނެ ކަމެއްކަމަށްވެސް ވިދާޅުވެފައެވެ.